HEˬBYEHˇ 9

1Dawˬ ma saˇ jaˇ yaw beh hmˬ la ̭ k'oeˇ, uˬ duˬ aˬ joˆ-ehˇ ya tahˬ-eu zahˇ sahˇ k'o ̭ deuˬ ahˇ-awˇ, tsawˇ haˬ zaˬ neh jahˇ-euˬ uˬ duˬ tahˬ-eu jawˇ duˬ k'aw ̭ baw-eu meh. 2Muiˬ-eu shawˇ-eu Jawˇ duˬ lehˇ kuˇ-eu Sehˬg'awˆ la ̭ nyiˇ lawˆ, g'awˆ taˬ-euˬ meh. K'oeˇ-euˬ la ̭ k'oeˇ, tsiˇ k'mˬ do ̭ daˆ duˬ hawˇ-eu Miˬyehˇ-ahˇ lawˇ nehˬ-euˬ ka muˇ ciˬ daˆ-eu hawˬ jeh tiˬ jeh jaˆ-eu meh. 3Lawˆ kaˬ saˬ paˇ nyiˬ hmˬ tiˬ hmˬ-euˬ naˇ k'ah paw, Muiˬ dui Shawˇ dui dui-eu Jawˇ duˬ lehˇ kuˇ-eu Sehˬg'awˆ paˇ jaˆ-eu meh. 4K'oeˇ-euˬ la ̭ k'oeˇ, shuiˇ neh jahˇ taˬ-euˬ tsiˇ yaw saw jeˬ do ̭ damˬ-eu lawˇ duˬ maˬ ehˇ, maˬ naˆ kaˬ muˇ ahˇ-eu shuiˇ ciˬ cuˇ ciˬ ahˇ taˬ-euˬ shuiˇ yaw taˬ-euˬ Dawˬ ma saˇ jaˇ Bahˬ keuˆ maˬ ehˇ, baw nmˬ tso ̭-eu Aˬloˬ-euˬ gawˬ yoeˬ maˬ ehˇ, zahˇ dawˬ k'o ̭ dawˬ tseˇ dawˬ bo ̭ taˬ-euˬ k'aˬ lo teˇ bya ̭ nyiˬ bya ̭ maˬ ehˇ, bi jaˆ-euˬ meh. 5Dawˬ ma saˇ jaˇ Bahˬ keuˆ k'oeˇ taˆ, Jeˬluˇbeˬ mawˇ kawˇ bi jaˆ-euˬ meh. Jeˬluˇbeˬ mawˇ kawˇ-euˬ aˬ dahˇ k'oeˇ, iˬ baˇ pyehˬ nehˬ-eu jawˇ duˬ k'oeˇ taˆ aˬ dahˇ cawˬ ja taˬ-euˬ meh. Ehˇ k'aw ̭, jawˇ duˬ heu tsahˇ aˬ joˆ-ehˇ g'eh-eu jawˇ duˬ pyeu ̭-eu gaˇ kawˆ nymˬ-mˇ yaw duˬ duˬ-ehˇ maˬ dzawˇ duˬ nya-a siˬ. 6Uˬ duˬ tahˬ-eu jawˇ duˬ k'oeˇ tsahˇ-ahˇ ta ̭ leˇ-awˇ, zahˇ sahˇ k'o ̭ heu lo ̭-ehˇ jaˆ-eu meh. Piˇ ma deuˬ sehˬ g'awˆ la ̭ nyiˇ lawˆ-ahˇ yawˬ nah na lu ̭ uˇ leˇ-awˇ, yawˬ ha-euˬ gaˇ ya mˇ-eu meh. 7Piˇma Yaw huiˬ g'aˬ teh ̭-ehˇ sehˬ g'awˆ la ̭ k'oeˇ lawˆ-ahˇ ya uˇ leˇ-awˇ, tiˬ k'o ̭ tiˬ poˆ teh ̭-ehˇ ya uˇ leˇ-eu meh. Aˬ yaw ̭ k'oeˇ lo ̭-ehˇ uˇ leˇ ngeh, yawˬ ha-euˬ iˬ baˇ g'aˇ duˬ maˬ ehˇ, tsawˇ haˬ zaˬ deuˬ neh iˬ baˇ meh lehˇ maˬ siˬ nya-ehˇ mˇ lehˬ-euˬ iˬ baˇ g'aˇ duˬ maˬ ehˇ, Miˬyehˇ-ahˇ lawˇ-eu g'aˇ duˬ shiˬ ya yuˇ ahˇ g'eh-eu meh. 8Sehˬ g'awˆ la ̭ nyiˇ lawˆ k'oeˇ gaˇ k'aˇ jaˆ k'oeˇ keuˆ ni, Muiˬ dui shawˇ dui dui-eu Jawˇ duˬ k'oeˇ tsahˇ-ahˇ uˇ leˇ-eu gaˇ ma maˬ pah laˇ-a siˬ lehˇ, uˬ duˬ tahˬ-eu jawˇ duˬ k'oeˇ tsahˇ-euˬ zahˇ sahˇ k'o ̭-ahˇ ta ̭ leˇ-awˇ Muiˬ-eu shawˇ-eu Yaw sahˇ Miˬyehˇ bya cehˆ ni mehˬ nehˬ la ̭-eu meh. 9Heu-aˬ, nymˬ-mˇ-euˬ aˇ yamˬ heu-ahˇ mehˬ nehˬ la ̭-eu jeˬ pyeu ̭-eu meh. Ehˇ maw ̭-eu dawˬ tsui ̭-a ̭, Miˬyehˇ-ahˇ damˬ nehˬ-euˬ jeˬ hawˇ-eu jeˬ zaˬ seh ̭-awˇ lawˇ-eu shehˇ-eu jeˬ-aˬ, Miˬyehˇ-ahˇ uˬ duˬ tahˬ-eu tsawˇ haˬ-euˬ nui ma muiˬ laˇ shawˇ laˇ ni maˬ mˇ byah nehˬ nya-a lehˇ ehˇ maw ̭-eu meh. 10Aˬ jeˬ miˇ neh ehˇ naˇ, heu deuˬ-aˬ, dzaˬ-eu dawˇ-eu jeˬ hawˇ-eu muiˬ laˇ shawˇ laˇ ni mˇ-eu zahˇ sahˇ k'o ̭ deuˬ-ahˇ teh ̭-ehˇ ta ̭-eu meh. Heu deuˬ-aˬ, Miˬyehˇ zahˇ yaw shui ̭ maˬ laˆ paˇ k'oeˇ keuˆ ni teh ̭-ehˇ geu ̭ nya-eu, la ̭ nyiˇ paw teh ̭-ehˇ ta ̭ leˇ-eu zahˇ sahˇ k'o ̭ pyeu ̭-eu meh. 11Ehˇ k'aw ̭, Ka li-aˬ, nymˬ-mˇ heu gaˇ keuˆ le taˬ-euˬ yaw muiˬ jeˬ heu deuˬ-ahˇ bi ̭ nehˬ la ̭-eu Piˇma Yaw huiˬ g'aˬ lo ̭-ehˇ oe keuˆ taˬ-euˬ meh. Aˬ yaw ̭ gaˇ mˇ lu ̭-eu sehˬ g'awˆ-aˬ, muiˬ dzehˬ byah dzehˬ-eu meh. Sehˬ g'awˆ k'oeˇ-aˬ, tsawˇ haˬ zaˬ neh g'awˆ-euˬ sehˬ g'awˆ maˬ ngeuˇ-eu uˬ ta ̭, beh taˬ-euˬ miˇ tsaˬ tahˬ k'awˇ heu-ahˇ ta ̭-eu seh ̭ g'awˆ maˬ ngeuˇ-a. 12Sehˬ g'awˆ k'oeˇ-ahˇ Yeˬsuˇ le uˇ-awˇ, Muiˬ dui shawˇ dui dui-eu Jawˇ duˬ-ahˇ mˬ maˬ maˬ byaˆ zaˇ ziˇ g'aˇ duˬ tiˬ poˆ uˇ leˇ ngeh, ci ̭ myeh ̭ hawˇ-eu mawˇ neˇ-euˬ shiˬ yuˇ ahˇ g'eh-awˇ lawˇ leˇ-euˬ maˬ ngeuˇ-a. Aˬ yaw ̭-euˬ shiˬ yuˇ ahˇ g'eh-awˇ, mˬ maˬ maˬ byaˆ zaˇ ziˇ ka k'o ̭-eu jeˬ-ahˇ aˬ dui za ni lawˇ leˇ-euˬ jeˬ pyeu ̭-eu meh. 13Ciˬ myeh ̭ hawˇ-eu mawˇ neˇ-euˬ shiˬ hawˇ-eu, mawˇ neˇ mawˇ zaˬ dzah puiˆ-awˇ lawˇ-euˬ lehˇ kuˇ laˆ keuˬ-awˇ, maˬ shawˇ-eu tsawˇ haˬ-ahˇ byaˆ shehˬ naˇ shawˇ laˇ-eu meh. 14K'oeˇ lo ̭-ehˇ jahˇ-eu baˬ da neh shawˇ laˇ nya naˇ, Ka li-euˬ shiˬ baˬ da neh aˇ naˆ ni paˇ shawˇ dzehˬ laˇ nmˇ. Mˬ maˬ maˬ byaˆ zaˇ ziˇ deh ̭-eu Yaw sahˇ Miˬyehˇ-ahˇ g'oe-eu la ̭ k'oeˇ, byah dui dui-eu lawˇ-eu jeˬ lo ̭-ehˇ aˬ yaw ̭-euˬ g'awˇ mawˇ Miˬyehˇ-ahˇ damˬ nehˬ-euˬ meh. Deh ̭ lu ̭-eu Miˬyehˇ-euˬ nui k'ahˇ aˬ dui mˇ nya ni, gaˇ dahˇ maˬ tsoeˬ-eu zahˇ sahˇ k'o ̭ k'oeˇ deuˬ neh maˬ shawˇ nehˬ la ̭ nya-euˬ aˬ dui-euˬ nui ma-ahˇ aˬ yaw ̭ shawˇ nehˬ la ̭ teh ̭-a. 15K'oeˇ baˬ da neh, dawˬ ma saˇ jaˇ yaw shui ̭ pyeu ̭ leˇ ni mˇ-eu g'aˬ-aˬ, Ka li meh. Miˬyehˇ neh kuˇ doˆ-euˬ tsawˇ haˬ deuˬ mˬ maˬ maˬ byaˆ zaˇ ziˇ guiˬ lahˬ jeˬ biˇ za ni, aˬ yaw ̭ k'oeˇ lo ̭-ehˇ mˇ-euˬ meh. Dawˬ ma saˇ jaˇ yaw beh hmˬ-ahˇ g'oe-awˇ deh ̭ lu ̭ ngeh, Ka li shiˇ dah-awˇ tsawˇ haˬ zaˬ deuˬ-ahˇ yawˬ ha neh mˇ-euˬ iˬ baˇ-ahˇ bi buˬ-iˇ nya-euˬ miˇ neh, k'oeˇ lo ̭-ehˇ mˇ pyeu ̭ nya-euˬ meh. 16Jeˬ biˇ bi ̭-eu g'aˇ duˬ bo ̭ tsehˆ taˬ-euˬ sahˬ bo ̭ jaˆ naˇ, jeˬ biˇ bi ̭-eu g'aˬ maˇ maˇ ni shiˇ-euˬ gaˇ kawˆ yaw duˬ ya bi baw meh. 17Aˬ jeˬ miˇ neh ehˇ naˇ, jeˬ biˇ bi ̭-eu g'aˬ k'aˇ deh ̭ k'oeˇ keuˆ ni, jeˬ biˇ k'oeˇ-ahˇ maˬ za nya-a siˬ. Jeˬ biˇ bi ̭-eu g'aˬ shiˇ g'aˬ miˇ tsa teh ̭-ehˇ, jeˬ biˇ k'oeˇ-ahˇ za nya-eu meh. 18K'oeˇ miˇ neh, dawˬ ma saˇ jaˇ yaw beh hmˬ k'aw ̭, tiˬ jeˬ paˬ seh ̭ dah-awˇ shiˬ neh mˇ taˬ-euˬ dawˬ ma saˇ jaˇ pyeu ̭-eu meh. 19Aˇ dahˬ beh ngeh Zahˇ dawˬ k'o ̭ dawˬ la ̭ k'oeˇ k'aˇ bo ̭ taˬ-euˬ zahˇ dawˬ k'o ̭ dawˬ dawˬ tawˆ lu ̭, Iˇsaˬleˬlaˆ tsawˇ haˬ deuˬ-ahˇ Moˇseˬ ehˇ nehˬ-euˬ meh. K'oeˇ naˇ, mawˇ neˇ hawˇ-eu ci ̭ myeh ̭-euˬ shiˬ iˇ cu ̭ nehˬ-ehˇ keuˬ-awˇ, hiˇsoˆ baw nmˬ hawˇ-eu yawˇ ca ̭ hm laˆ duiˆ-awˇ, Zahˇ dawˬ k'o ̭ dawˬ hawˇ-eu Iˇsaˬleˬlaˆ tsawˇ haˬ dawˬ tawˆ lu ̭-ahˇ byaˆ shehˬ-euˬ meh. 20"Shiˬ heu-aˬ, naw ma ̭ bi caw teh-eu g'aˇ duˬ Miˬyehˇ neh naw ma ̭-ahˇ bi ̭-euˬ dawˬ ma saˇ jaˇ-euˬ shiˬ pyeu ̭-eu meh" lehˇ, Moˇseˬ ehˇ-eu meh. 21K'oeˇ lo ̭-ehˇ duˇ ni, Dawˬ ma saˇ jaˇ Sehˬ g'awˆ-ahˇ maˬ ehˇ, uˬ duˬ tahˬ gaˇ zmˬ-eu mˇ myawˬ keu ka deuˬ k'oeˇ taˆ maˬ ehˇ, shiˬ k'oeˇ neh Moˇseˬ byaˆ shehˬ-euˬ meh. 22Zahˇ dawˬ k'o ̭ dawˬ la ̭ k'oeˇ ehˇ taˬ-euˬ-aˬ, yawˬ jeˬ na lu ̭ ehˇ g'aˬ ni-ahˇ shiˬ neh ya shawˇ-awˇ, shiˬ shehˆ-awˇ neh teh ̭-ehˇ iˬ baˇ pyehˬ nehˬ-eu jeˬ-ahˇ za nya-eu meh. 23Maˇ maˇ ni mˬ k'oeˇ taˆ jaˆ-eu jeˬ maˬ ngeuˇ-ehˇ, k'oeˇ-euˬ aˇ baˇ naˇ shmˇ loˆ ni teh ̭-ehˇ g'eh-eu deuˬ-ahˇ, k'oeˇ lo ̭-ehˇ ya mˇ shawˇ-eu meh. Ehˇ k'aw ̭, maˇ maˇ ni mˬ k'oeˇ taˆ jaˆ-eu jeˬ-ahˇ shawˇ-eu g'aˇ duˬ, k'oeˇ naˆ maˬ tseˇ muiˬ dzehˬ-eu jeˬ ya lawˇ ya shehˇ-eu meh. 24Aˬ jeˬ miˇ neh ehˇ naˇ, maˇ maˇ ni g'eh-eu jeˬ maˬ ngeuˇ-ehˇ, k'oeˇ-euˬ aˇ baˇ naˇ shmˇ loˆ ni teh ̭-ehˇ pyeu ̭-eu, tsawˇ haˬ zaˬ neh jahˇ taˬ-euˬ Muiˬ-eu shawˇ-eu jawˇ duˬ-ahˇ Ka li uˇ leˇ-euˬ maˬ ngeuˇ-a. Maˇ maˇ ni mˬ k'oeˇ taˆ aˬ yaw ̭ le uˇ-awˇ, k'oeˇ gaˇ aˬ duiˬ-euˬ dah zaˇ Miˬyehˇ mehˬ shi aˬ yaw ̭ le keuˆ-euˬ meh. 25Yuˇdaˆ tsawˇ haˬ-euˬ Piˇma Yaw huiˬ g'aˬ-aˬ, aˬ yaw ̭ k'o ̭ yaw ̭ jeˬ zaˬ-euˬ shiˬ yuˇ-awˇ, Muiˬ dui shawˇ dui dui-eu Jawˇ duˬ-ahˇ uˇ leˇ-eu meh. Ehˇ k'aw ̭, Ka li-aˬ, aˬ yaw ̭-euˬ g'awˇ mawˇ g'awˬ mya poˆ lawˇ-eu maˬ loˬ-a. 26K'oeˇ lo ̭-ehˇ ya lawˇ law nmˇ-aˬ, mˬ beh miˇ beh ngeh neh aˇ dahˬ beh-awˇ, aˬ yaw ̭ g'awˬ mya poˆ ya kamˇ shiˇ-euˬ teh ̭-a. Ehˇ k'aw ̭, nymˬ-mˇ miˇ tsaˬ heu aˇ saˬ saˬ-eu dawˬ peh peh laˇ-euˬ aˇ yamˬ heu la ̭ k'oeˇ, mˬ maˬ maˬ byaˆ zaˇ ziˇ g'aˇ duˬ gmˬ ni aˬ yaw ̭ tiˬ poˆ teh ̭-ehˇ doˆ le-awˇ, aˬ yaw ̭-euˬ g'awˇ mawˇ lawˇ nehˬ-eu la ̭ k'oeˇ, iˬ baˇ yuˇ dzeh le-euˬ meh. 27Tsawˇ haˬ yawˬ g'aˬ na lu ̭ tiˬ poˆ ya shiˇ-awˇ, shiˇ g'aˬ ngeh Miˬyehˇ neh yaˇ k'aˬ ya bi daˇ teh ̭-a. 28K'oeˇ gaˇ duˇ ni, tsawˇ haˬ g'awˬ mya ni-euˬ iˬ baˇ yuˇ dzeh-eu g'aˇ duˬ, Ka li-euˬ g'awˇ mawˇ tiˬ poˆ lawˇ dah-euˬ meh. Aˬ yaw ̭ tiˬ poˆ paˇ doˆ le teh ̭-a. Ehˇ k'aw ̭, iˬ baˇ shawˇ-eu g'aˇ duˬ oe-euˬ maˬ ngeuˇ-a. Aˬ yaw ̭-ahˇ lo ̭ lu ̭-eu tsawˇ haˬ deuˬ-ahˇ ka k'o ̭-eu g'aˇ duˬ oe-euˬ jeˬ pyeu ̭-eu meh.

will be added

X\