G'AˬK'EHˇ 7

1Piˇ ma yaw huiˬ g'aˬ Saˬteˬpaˬ-ahˇ naˇ haˬ-eu, "Aˬ yaw ̭ ma ̭ ehˇ-eu ngeuˇ meh loˇ." 2Saˬteˬpaˬ ehˇ-eu, "Aˬ yui ̭ aˬ nyiˇ aˬ da aˬ ma deuˬ-oˇ, ngaˇ ehˇ gaˇ naˇ haˬ sheˇ. Aˬ dui-euˬ aˬ da yaw dzahˇ Aˬbyaˬhaˬ Haˬlaˬ meuˬ-ahˇ maˬ jawˇ-iˇ mi naˆ-ehˇ, Maˬsoˬpoˬtaˬmiˇ miˇ k'ahˬ la ̭ k'oeˇ yaw sheh ̭ k'ahˬ sehˇ huiˬ-eu Miˬyehˇ aˬ yaw ̭-euˬ mehˬ shi doˆ le-awˇ, 3'Nawˬ-euˬ aˬ yui ̭ aˬ nyiˇ deuˬ hawˇ-eu nawˬ-euˬ miˇ k'ahˬ-ahˇ byehˇ dzeh ya ̭-awˇ, ngaˬ neh mehˬ-euˬ miˇ k'ahˬ-ahˇ jawˇ-iˇ-awˬ' lehˇ ehˇ le-euˬ meh. 4K'oeˇ miˇ neh, aˬ yaw ̭-euˬ miˇ k'ahˬ-ahˇ aˬ yaw ̭ byehˇ dzeh ya ̭-awˇ, Haˬlaˬ meuˬ-ahˇ jawˇ-iˇ-euˬ meh. Aˬbyaˬhaˬ-euˬ aˬ da shiˇ dzeuˇ ngeh jawˇ, iˬ nah naw ma ̭ jawˇ lu ̭-eu miˇ k'ahˬ heu k'ahˬ la ̭ k'oeˇ, Miˬyehˇ neh aˬ yaw ̭-ahˇ paˇ bi jawˇ laˇ-euˬ meh. 5K'oeˇ ngeh, Miˬyehˇ aˬ yaw ̭-ahˇ miˇ tsaˬ la ̭ zaˬ tiˬ daˬ hui ni k'aw ̭ maˬ bi ̭-aˬ. Ehˇ k'aw ̭, miˇ k'ahˬ k'oeˇ k'ahˬ aˬ yaw ̭-ahˇ bi ̭-awˇ, aˬ yaw ̭-euˬ miˇ k'ahˬ hawˇ-eu aˬ yaw ̭-euˬ zaˬ deuˬ uˆ deuˬ-euˬ miˇ k'ahˬ bi pyeu ̭ laˇ ma lehˇ, Miˬyehˇ neh saˇ jaˇ dzaˬ-euˬ meh. Miˬyehˇ k'oeˇ lo ̭-ehˇ saˇ jaˇ dzaˬ ngeh, Aˬbyaˬhaˬ zaˬ tiˬ g'aˬ-iˬ maˬ jawˇ le-aˬ siˬ. 6Miˬyehˇ neh aˬ yaw ̭-ahˇ heu lo ̭-ehˇ ehˇ nehˬ-euˬ meh. 'Nawˬ-euˬ zaˬ nawˬ-euˬ uˆ deuˬ-aˬ, aˬ cawˬ tsawˇ jeuˬ-euˬ miˇ k'ahˬ-ahˇ ya jawˇ-iˇ-awˇ, aˬ cawˬ-euˬ zaˬ k'aˆ ya geu ̭-awˇ, aˬ cawˬ k'ehˬ nehˬ k'aˆ nehˬ gaˇ oeˬ yaˇ k'o ̭ byah ni ya daˬ teh ̭-a. 7Ehˇ k'aw ̭, aˬ yaw ̭ ma ̭-ahˇ zaˬ k'aˆ bi geu ̭-euˬ tsawˇ jeuˬ k'oeˇ jeuˬ-ahˇ ngaˇ yaˇ k'aˬ daˇ-awˇ, aˬ yaw ̭ ma ̭-ahˇ miˇ k'ahˬ k'oeˇ k'ahˬ la ̭ k'oeˇ neh bi doˆ laˇ ma. K'oeˇ ngeh, jawˇ duˬ heu tsahˇ-ahˇ aˬ yaw ̭ ma ̭ ngaˬ-ahˇ uˬ duˬ tahˬ teh ̭-a.' 8K'oeˇ naˇ, Miˬyehˇ neh Aˬbyaˬhaˬ-ahˇ baˆ k'oˆ mehˬ dzaˬ yehˬ-eu zahˇ bi jahˇ-eu la ̭ k'oeˇ, dawˬ ma saˇ jaˇ dzaˬ-euˬ meh. K'oeˇ miˇ neh, Iˇtsaˆ deh ̭ le-awˇ tiˬ jaw byah laˇ ngeh, Aˬbyaˬhaˬ neh aˬ yaw ̭-euˬ aˬ li Iˇtsaˆ-ahˇ baˆ k'oˆ mehˬ dzaˬ yehˬ nehˬ-euˬ meh. K'oeˇ lo ̭-ehˇ duˇ ni, Iˇtsaˆ g'eh, aˬ yaw ̭-euˬ aˬ li Yaˬkoˆ-ahˇ baˆ k'oˆ mehˬ dzaˬ yehˬ nehˬ-euˬ meh. Yaˬkoˆ g'eh, aˬ yaw ̭-euˬ aˬ li tseˇ nyi ̭ li-ahˇ baˆ k'oˆ mehˬ dzaˬ yehˬ nehˬ-euˬ meh. Aˬ li k'oeˇ tseˇ nyi ̭ liˬ-aˬ, aˬ dui tsawˇ jeuˬ-euˬ tsawˇ myahˇ doˆ-eu aˬ poeˬ deuˬ pyeu ̭-eu meh. 9"Yaˬkoˆ-euˬ aˬ li deuˬ-aˬ, aˬ yaw ̭ ha mehˇ nmˇ-euˬ aˬ nyiˇ Yoˇsehˆ-ahˇ myaˆ naˆ-eu miˇ neh, aˬ cawˬ-ahˇ ahˬ nehˬ-awˇ, aˬ cawˬ neh Iˇjiˇtuˆ miˆ k'ahˬ-ahˇ zaˬ k'aˆ bi geu ̭-iˇ-eu g'aˇ duˬ ahˬ dzaˬ-euˬ meh. Ehˇ k'aw ̭, Yoˇsehˆ-ahˇ Miˬyehˇ maˬ byehˇ dzeh-ehˇ, 10shaˬ-eu zahˬ-eu jeˬ la ̭ k'oeˇ sheuˬ dzeuˇ nehˬ-euˬ meh. Iˇjiˇtuˆ sahˬ paˬ mehˬ shi Yoˇsehˆ ya le ngeh, Miˬyehˇ aˬ yaw ̭-ahˇ myaˆ pyawˬ pyuˇ-eu jeˬ hawˇ-eu zaˬ siˬ tsawˇ gahˇ bi ̭ neh-euˬ meh. Sahˬ paˬ k'oeˇ g'aˬ neh Yoˇsehˆ-ahˇ aˬ yaw ̭-euˬ miˇ k'ahˬ k'oeˇ taˆ hawˇ-eu sahˬ paˬ-euˬ hawˇ nymˇ k'oeˇ taˆ bi uˆ lahˇ-euˬ meh. 11K'oeˇ naˇ, Iˇjiˇtuˆ miˇ k'ahˬ k'ahˬ lah ni hawˇ-eu Kaˬnaˬ miˇ k'ahˬ la ̭ k'oeˇ meh ̭-eu shu ̭-eu jeˬ keuˆ le-awˇ, shaˬ dui dui laˇ taˬ-euˬ meh. A dui-euˬ aˬ poeˬ deuˬ k'aw ̭, dzaˬ-eu jeˬ maˬ jaˆ-ehˇ shaˬ laˇ taˬ-euˬ meh. 12K'oeˇ ngeh, Iˇjiˇtuˆ miˇ k'ahˬ-ahˇ cehˇ jaˆ-eu gaˇ kawˆ Yaˬkoˆ ya gaˬ ngeh. aˬ yaw ̭-euˬ aˬ li pyeu ̭-eu aˬ dui-euˬ aˬ poeˬ deuˬ-ahˇ pyehˬ g'eh-awˇ, yaw beh tiˬ doˆ bi iˇ haw-euˬ meh. 13Nyiˬ doˆ tiˬ doˆ paˇ bi iˇ ngeh, aˬ yaw ̭ Yoˇ sehˆ pyeu ̭-eu gaˇ kawˆ, aˬ yaw ̭-euˬ mehˇ nmˇ deuˬ-ahˇ Yoˇsehˆ bi siˬ-awˇ, Yoˇsehˆ-euˬ aˬ yui ̭ aˬ nyiˇ gaˇ kawˆ Iˇjiˇtuˆ sahˬ paˬ ya siˬ-euˬ meh. 14K'oeˇ naˇ, pehˬ zaˬ ma zaˬ dawˬ tawˆ lu ̭ sheuˬ-awˇ Iˇjiˇtuˆ miˇ k'ahˬ-ahˇ oe-eu g'aˇ duˬ, aˬ yaw ̭-euˬ aˬ da Yaˬkoˆ-ahˇ Yoˇsehˆ tsa ̭ ahˇ g'eh-euˬ meh. Pehˬ zaˬ ma zaˬ dawˬ tawˆ lu ̭ shi ̭ tseˇ ngaˬ g'aˬ byah-eu meh. 15Iˇjiˇtuˆ miˇ k'ahˬ-ahˇ Yaˬkoˆ jawˇ-iˇ-awˇ, aˬ yaw ̭ hawˇ-eu aˬ yaw ̭-euˬ aˬ li dawˬ tawˆ lu ̭, k'oeˇ gaˇ ziˇ deh ̭ jiˇ-euˬ meh. 16Aˬ yaw ̭ ma ̭-euˬ g'awˇ mawˇ-ahˇ Sheˬkmˬ meuˬ-ahˇ ba ̭ k'o ̭ g'eh-awˇ, Haˬmawˬ aˇ jeuˬ-ahˇ Aˬbyaˬhaˬ neh pyuˇ bi ̭-awˇ zeuˇ tsehˆ ya ̭-euˬ lmˬ bymˇ-ahˇ ba ̭ pahˬ-euˬ meh. 17"Miˬyehˇ neh Aˬbyaˬhaˬ-ahˇ saˇ jaˇ dzaˬ taˬ-euˬ lo ̭-ehˇ bi byah laˇ-eu aˇ yamˬ tsaˬ laˇ ngeh, Iˇjiˇtuˆ miˇ k'ahˬ la ̭ k'oeˇ jawˇ lu ̭-eu aˬ dui-euˬ tsawˇ jeuˬ myaˬ dui dui laˇ taˬ-euˬ meh. 18Aˇ saˬ saˬ laˇ ngeh, Yoˇsehˆ gaˇ kawˆ maˬ siˬ nya-eu sahˬ paˬ tiˬ g'aˬ daˆ laˇ-awˇ, Iˇjiˇtuˆ miˆ k'ahˬ-ahˇ uˆ lahˇ-euˬ meh. 19Aˬ yaw ̭-aˬ, aˬ dui-euˬ aˬ poeˬ aˬ bawˇ k'oeˇ deuˬ-ahˇ tsawˇ gahˇ gahˇ-euˬ uˬ ta ̭, g'awˬ shaˬ tiˬ paw ̭-iˬ maˬ gaˬ-aˬ. Zaˬ nahˬ deuˬ bi shiˇ jiˇ-eu g'aˇ duˬ, iˇ kahˇ la ̭ k'oeˇ maˬ bi jawˇ ni, la ̭ nyiˇ bi ciˬ dzeh-euˬ meh. 20K'oeˇ ngeh yamˬ-ahˇ Moˇsehˬ deh ̭ le-euˬ meh. Aˬ yaw ̭-aˬ, muiˬ dui dui-eu aˬ li tiˬ li pyeu ̭-eu meh. Ba la smˇ siˬ byah ni aˬ yaw ̭-ahˇ iˇ kahˇ la ̭ k'oeˇ bo saˆ-awˇ cu-euˬ meh. 21Aˬ yaw ̭-ahˇ la ̭ nyiˇ ciˬ dzeh ha-iˇ ngeh, sahˬ paˬ zaˬ miˬ neh ciˬ cu-awˇ, aˬ yaw ̭-eu ̭ aˬ li lo ̭-ehˇ cu huiˬ geu ̭-euˬ meh. 22Iˇjiˇtuˆ tsawˇ jeuˬ-euˬ zaˬ siˬ tsawˇ gahˇ dawˬ tawˆ lu ̭ aˬ yaw ̭ ya dzaw-awˇ, ngehˬ-eu tmˇ-eu paw dzeˇ maˬ ehˇ, mˇ-eu shaˇ-eu paw dzeˇ maˬ ehˇ, nya dui dui-eu tsawˇ haˬ tiˬ g'aˬ pyeu ̭ laˇ-euˬ meh. 23"Moˇseˬ oeˬ tseˇ k'o ̭ k'awˆ laˇ ngeh, aˬ yaw ̭-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ aˬ cawˬ aˬ joˆ-ehˇ jahˇ nehˬ gaˇ cah haw-iˇ-eu lehˇ noeˬ doˆ leˇ-euˬ meh. 24Iˇsaˬleˬlaˆ tsawˇ haˬ tiˬ g'aˬ-ahˇ Iˇjiˇtuˆ tsawˇ haˬ neh k'ehˬ nehˬ-euˬ gaˇ mawˇ ngeh, aˬ yaw ̭ caw ba nehˬ-iˇ-awˇ, Iˇjiˇtuˆ tsawˇ haˬ k'oeˇ g'aˬ-ahˇ la ̭ poˆ poˆ-awˇ seh ̭-euˬ meh. 25Miˬyehˇ aˬ yaw ̭-ahˇ zmˬ-eu la ̭ k'oeˇ, aˬ yaw ̭-euˬ tsawˇ jeuˬ-ahˇ ka k'o ̭-eu lehˇ g'eh-eu gaˇ kawˆ aˬ yaw ̭-euˬ tsawˇ haˬ deuˬ noeˬ siˬ teh ̭-a lehˇ aˬ yaw ̭ noeˬ-euˬ meh. Ehˇ k'aw ̭, aˬ yaw ̭ ma ̭ maˬ noeˬ siˬ-a. 26Yawˬ nah yawˬ Iˇsaˬleˬlaˆ tsawˇ haˬ nyiˬ g'aˬ yaw kaˬ ceh lu ̭ gaˇ aˬ yaw ̭ mawˇ-awˇ, aˇ kaˬ piˇ nehˬ-eu la ̭ k'oeˇ, 'Naˇ haˬ sheˇ. Iˇsaˬleˬlaˆ tsawˇ haˬ cawˬ cawˬ aˬ jeˬ miˇ neh teu lo ̭-ehˇ ceh dzaˬ te' lehˇ ehˇ nehˬ-euˬ meh. 27Ehˇ k'aw ̭, lehˬ dzehˬ-eu g'aˬ Moˇseˬ-ahˇ dehˬ dzeh-awˇ ehˇ-eu, 'Nga ma ̭-ahˇ uˆ lahˇ-awˇ yaˇ k'aˬ bi daˇ-eu lehˇ nawˬ-ahˇ aˬ suˇ g'aˬ neh k'ehˇ taˬ ta. 28Miˇ nah Iˇjiˇtuˆ tsawˇ haˬ k'oeˇ g'aˬ-ahˇ nawˇ seh ̭-euˬ lo ̭-ehˇ, ngaˬ-ahˇ paˇ seh ̭-eu g'eh te loˇ.' 29Dawˬ k'oeˇ dawˬ-ahˇ Moˇseˬ ya gaˬ ngeh, Iˇjiˇtuˆ miˇ k'ahˬ-ahˇ neh cehˆ-awˇ, Miˇdiˬyaˬ miˇ k'ahˬ-ahˇ cehˆ jawˇ-iˇ-euˬ meh. Aˬ yaw ̭ k'oeˇ gaˇ jawˇ ngeh, aˬ li nyiˬ li jawˇ le-euˬ meh. 30Oeˬ tseˇ k'o ̭ dzeuˇ-iˇ geh, Siˇnaˆ gawˬ jawˬ dawˬ peh baw duˆ tiˬ duˆ-ahˇ do ̭ lu ̭-eu miˬ dzaˬ miˬ lmˇ la ̭ k'oeˇ, mˬ taˆ g'aˬ k'ehˇ tiˬ g'aˬ Moˇseˬ-euˬ mehˬ shi doˆ le-euˬ meh. 31K'oeˇ gaˇ ya mawˇ ngeh, aˬ yaw ̭ zahˬ leˇ-awˇ, baw duˆ dawˬ peh le peh-awˇ haw duˬ leˇ-euˬ meh. K'oeˇ ngeh, SahˬpaˬMiˬyehˇ-euˬ teˇ saˇ aˬ yaw ̭ ya gaˬ-euˬ meh. 32'Ngaˇ-aˬ, naw ma ̭-euˬ aˬ poeˬ aˬ bawˇ pyeu ̭-eu Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ ma' lehˇ ehˇ-eu meh. K'oeˇ ngeh, Moˇseˬ guˆ dui dui-eu miˇ neh yaw dzuˬ dzuˬ-awˇ, maˬ haw cawˬ peuˬ-a. 33Sahˬpaˬ Miˬyehˇ ehˇ-eu, 'Nawˬ-euˬ sehˬ nawˆ lehˆ-awˬ. Nawˇ yaw ̭ lu ̭-eu jawˇ duˬ teu tsahˇ muiˬ-eu shawˇ-eu pehˇ tsahˇ meh. 34Ngaˬ-euˬ tsawˇ haˬ deuˬ Iˇjiˇtuˆ miˇ k'ahˬ la ̭ k'oeˇ k'ehˬ-eu k'aˆ-eu jeˬ-ahˇ yaw k'aˆ-ehˇ ya daˬ lu ̭ gaˇ ngaˇ mawˇ-euˬ ma. Aˬ yaw ̭ ma ̭ shaˬ zahˬ na ̭ dui dui-eu la ̭ k'oeˇ mahˇ lu ̭-eu teˇ saˇ-ahˇ ngaˇ gaˬ-awˇ, aˬ yaw ̭ ma ̭-ahˇ bi buˬ bi law-iˇ-eu lehˇ ngaˇ za ̭ ka le-euˬ ma. Laˇ-awˬ. Ngaˇ nawˬ-ahˇ Iˇjiˇtuˆ miˇ k'ahˬ-ahˇ k'ehˇ g'eh-eu ma.' 35"'Nga ma ̭ k'oeˇ taˆ uˆ lahˇ-awˇ yaˇ k'aˬ bi daˇ-eu lehˇ, aˬ suˇ g'aˬ nawˬ-ahˇ k'ehˇ taˬ ta' lehˇ, aˬ yaw ̭ ma ̭ neh ehˇ nehˬ-awˇ byehˇ dzeh nehˬ-euˬ Moˇseˬ k'oeˇ g'aˬ-aˬ, aˬ yaw ̭-euˬ mehˬ shi baw duˆ la ̭ k'oeˇ ya mawˇ-euˬ mˬ taˆ g'aˬ k'ehˇ neh bi caw ba-eu la ̭ k'oeˇ, aˬ yaw ̭ ma ̭-ahˇ bi uˆ lahˇ-awˇ bi ka k'o ̭-eu g'aˇ duˬ Miˬyehˇ neh k'ehˇ le ̭-euˬ Moˇseˬ pyeu ̭-eu meh. 36Iˇjiˇtuˆ miˇ k'ahˬ la ̭ k'oeˇ maˬ ehˇ, Iˬ ma laˆ shaˆ Yaw neˇ g'ahˇ ceh maˬ ehˇ, bawˇ tsahˬ bawˇ dahˇ la ̭ k'oeˇ oeˬ tseˇ k'o ̭ oeˬ tseˇ myaˇ cah lu ̭ ngeh maˬ ehˇ, zahˬ leˇ paˬ-ehˇ g'eh-eu jeˬ hawˇ-eu k'aˆ jeˬ-ehˇ g'eh-eu g'awˬ mya jeˬ mˇ mehˬ-eu la ̭ k'oeˇ, Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ k'ahˬ la ̭ k'oeˇ neh sheuˬ doˆ g'eh-euˬ meh. 37'Ngaˬ-ahˇ k'ehˇ g'eh le ̭-euˬ lo ̭-ehˇ, Miˬyehˇ g'aˇ duˬ ngehˬ dah-eu tiˬ g'aˬ naw ma ̭ jawˇ gaˇ Miˬyehˇ paˇ k'ehˇ g'eh le ̭ teh ̭-a. Aˬ yaw ̭-aˬ, naw ma ̭-euˬ aˇ jeuˬ aˇ ca pyeu ̭ teh ̭-a' lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-euˬ g'aˬ-aˬ, Moˇseˬ meh. 38Iˇsaˬleˬlaˆ tsawˇ haˬ deuˬ bawˇ tsahˬ bawˇ dahˇ k'aˇ shui ̭ deh yaˇ-ahˇ uiˬ leˇ-awˇ jawˇ ngeh, aˬ yaw ̭ ma ̭ nehˬ-ehˇ jawˇ-euˬ k'oeˇ g'aˬ Moˇseˬ meh. Aˬ dui-euˬ aˬ poeˬ aˬ bawˇ deuˬ nehˬ-ehˇ jawˇ-euˬ k'oeˇ g'aˬ aˬ yaw ̭ meh. Siˇnaˆ Gawˬ jawˬ-ahˇ mˬ taˆ g'aˬ k'ehˇ dawˬ ngehˬ cawˬ le ngeh jawˇ-euˬ g'aˬ k'aw ̭, aˬ yaw ̭ meh. Aˬ dui-ahˇ bi ̭-eu g'aˇ duˬ Miˬyehˇ dawˬ kawˬ za-euˬ g'aˬ k'aw ̭, aˬ yaw ̭ meh. 39"Ehˇ k'aw ̭, aˬ dui-euˬ aˬ poeˬ aˬ bawˇ deuˬ aˬ yaw ̭-euˬ ehˇ dawˬ maˬ naˇ haˬ ni, aˬ yaw ̭-ahˇ dehˬ dzeh-awˇ, Iˇjiˇtuˆ miˇ k'ahˬ-ahˇ g'o ̭-iˇ maw ̭-eu nui ma ahˇ-eu meh. 40K'oeˇ miˇ neh, 'Nga ma ̭-ahˇ mehˬ hu paw bi sheuˬ g'eh-eu g'aˇ duˬ, Miˬyehˇ tiˬ deuˬ tehˆ nehˬ la ̭-awˬ. Nga ma ̭-ahˇ Iˇjiˇtuˆ miˇ k'ahˬ la ̭ k'oeˇ neh sheuˬ doˆ nehˬ la ̭-euˬ Moˇseˬ k'oeˇ g'aˬ aˬ jeˬ g'eh-euˬ maˬ siˬ miˇ-a' lehˇ, Aˬloˬ-ahˇ aˬ yaw ̭ ma ̭ ehˇ nehˬ-euˬ meh. 41K'oeˇ ngeh, mawˇ neˇ mawˇ gaw mawˇ kawˇ tiˬ kawˇ aˬ yaw ̭ ma ̭ tehˆ-awˇ, lawˇ-eu shehˇ-eu jeˬ mˇ-awˇ, aˬ yaw ̭ ma ̭ neh tehˆ-euˬ mawˇ kawˇ k'oeˇ-ahˇ taˬ huiˬ-eu bawˬ-iˬ g'eh-euˬ meh. 42K'oeˇ miˇ neh, Miˬyehˇ neh aˬ yaw ̭ ma ̭-ahˇ byehˇ dzeh nehˬ-awˇ, mˬ k'oeˇ taˆ jaˆ-eu nahˇ ma, ba la, aˬ guiˇ deuˬ-ahˇ uˬ duˬ tahˬ-eu tsawˇ haˬ deuˬ bi pyeu ̭ laˇ-euˬ meh. Miˬyehˇ g'aˇ duˬ ngehˬ dah-eu deuˬ-euˬ sahˬ bo ̭ la ̭ k'oeˇ, heu lo ̭-ehˇ bo ̭ taˬ-euˬ meh. 'Iˇsaˬleˬlaˆ tsawˇ haˬ deuˬ-oˇ, bawˇ tsahˬ bawˇ dahˇ k'aˇ shui ̭ deh-ahˇ, oeˬ tseˇ k'o ̭ oeˬ tseˇ myaˇ byah ni, naw ma ̭ jeˬ zaˬ seh ̭-awˇ lawˇ-euˬ, ngaˬ-ahˇ lawˇ-euˬ maˬ ngeuˇ-a de. 43Mawˇleh miˬ yehˇ sehˬ g'awˆ hawˇ-eu, aˬ guiˇ miˬ yehˇ Leˬpaˬ mawˇ kawˇ, naw ma ̭ ba ̭ ba ̭-ehˇ cah-euˬ meh. Tahˬ pahˬ aˬ ma k'oeˇ deuˬ tehˆ-awˇ, naw ma ̭ uˬ duˬ tahˬ-euˬ miˇ neh, Baˬbuˇloˬ miˇ k'ahˬ nya baˬ-ahˇ, naw ma ̭-ahˇ bi pa ̭ byoˆ g'eh ma.' 44"Aˬ dui-euˬ aˬ poeˬ aˬ bawˇ deuˬ, bawˇ tsahˬ bawˇ dahˇ-ahˇ Dawˬ ma saˇ jaˇ Sehˬ g'awˆ jaˆ-euˬ meh. Miˬyehˇ neh Moˇseˬ-ahˇ ehˇ nehˬ-awˇ bi tsoˆ-euˬ lo ̭-ehˇ, Moˇseˬ neh ya mawˇ-euˬ hmˬ-ahˇ duˇ leˇ ni tsoˆ-euˬ meh. 45Aˬ dui ma ̭-euˬ aˬ poeˬ aˬ bawˇ k'oeˇ deuˬ, aˬ yaw ̭ ma ̭-euˬ aˬ da deuˬ-euˬ la ̭-ahˇ neh sehˬ g'awˆ k'oeˇ hmˬ za-awˇ, aˬ yaw ̭ ma ̭ mehˬ hu paw le g'eh le ̭-eu nehˬ-ehˇ Miˬyehˇ neh bi teh doˆ-euˬ tsawˇ jeuˬ deuˬ-euˬ miˇ k'ahˬ yuˇ geu ̭-eu lehˇ Yawˇshuˆ nehˬ-ehˇ aˬ yaw ̭ ma ̭ le ngeh jawˇ, sehˬ g'awˆ k'oeˇ g'awˆ ba ̭ g'eh-euˬ meh. K'oeˇ naˇ, sehˬ g'awˆ k'oeˇ Daˬbiˇ-euˬ ziˇ-ahˇ keuˆ ni k'oeˇ gaˇ jaˆ-euˬ meh. 46Daˬbiˇ-aˬ, Miˬyehˇ nui ma tsaˬ-eu tsawˇ haˬ tiˬ g'aˬ pyeu ̭-awˇ, Yaˬkoˆ-euˬ Miˬyehˇ bi jawˇ-eu g'aˇ duˬ aˬ yaw ̭ jawˇ duˬ tiˬ tsahˇ tsoˆ-eu aˬ kawˬ-aˬ bi ̭ la ̭ lehˇ, Miˬyehˇ-ahˇ shaˇ-euˬ meh. 47Ehˇ k'aw ̭, Miˬyehˇ g'aˇ duˬ nymˇ tsoˆ-euˬ g'aˬ-aˬ, Sawˇlaˬmoˬ meh. 48"Ehˇ k'aw ̭, Dawˬ tawˆ k'oeˇ taˆ Huiˬ-eu Sahˬpaˬ Miˬyehˇ-aˬ, tsawˇ haˬ zaˬ-euˬ aˬ la ̭ neh tsoˆ-euˬ nymˇ-ahˇ jawˇ-eu maˬ ngeuˇ-a lehˇ, Miˬyehˇ g'aˇ duˬ ngeh dah-eu tsawˇ haˬ neh ehˇ taˬ-euˬ heu lo ̭-ehˇ jaˆ-eu meh. 49'Mˬ maˬ ngaˬ-euˬ dzoeˬ dzaˬ nuiˇ mahˬ, miˇ maˬ ngaˬ-euˬ kuiˇ nawˬ k'awˬ boˆ, Naw ma ̭ ngaˇ paˇ bi jawˇ-eu lehˇ, nymˇ aˬ joˆ-ehˇ tsoˆ-eu g'eh te. Ngaˇ jawˇ naˬ mˇ nya-eu jawˇ duˬ, nui gaˇ aˬ geu tsahˇ paˇ jaˆ ta. 50Mˬ ga miˇ nawˬ dawˬ tawˆ lu ̭-ahˇ, ngaˬ neh beh-euˬ maˬ ngeuˇ ta loˇ.' 51Naw ma ̭ nui ma aˇ naˆ naˆ-ehˇ g'ahˇ te. Naˬ bawˇ aˇ naˆ naˆ-ehˇ tuˇ te. Miˬyehˇ-ahˇ maˬ siˬ nya-eu tsawˇ haˬ deuˬ lo ̭-ehˇ aˇ naˆ naˆ-ehˇ dzawˬ te. Naw ma ̭-aˬ, naw ma ̭-euˬ aˬ poeˬ aˬ bawˇ deuˬ-ahˇ duˇ-awˇ, Muiˬ-eu shawˇ-eu Yaw sahˇ Miˬyehˇ-euˬ dawˬ-ahˇ tiˬ jawˇ-iˬ maˬ naˇ haˬ geu ̭-a. 52Naw ma ̭-euˬ aˬ poeˬ aˬ bawˇ deuˬ neh maˬ bi k'ehˬ maˬ bi k'aˆ haw-euˬ Miˬyehˇ g'aˇ duˬ ngehˬ dah-eu tsawˇ haˬ tiˬ g'aˬ-iˬ maˬ jawˇ-a. Miˬyehˇ-euˬ tsaˬ-eu dawˇ-eu Zaˬk'aˆ oe teh ̭-a lehˇ aˇ hu ngehˬ dah-euˬ deuˬ-ahˇ aˬ yaw ̭ ma ̭ seh ̭-euˬ meh. Nymˬ-mˇ poˆ jawˇ-aˬ, naw ma ̭ yaw tsaˬ yaw dawˇ k'oeˇ g'aˬ-ahˇ aˬ cawˬ-euˬ aˬ la ̭ la ̭ k'oeˇ a nehˬ-awˇ seh ̭-euˬ meh. 53Mˬ taˆ g'aˬ k'ehˇ neh bi ̭ le-euˬ Miˬyehˇ-euˬ zahˇ dawˬ k'o ̭ dawˬ-ahˇ za-euˬ tsawˇ haˬ deuˬ-aˬ, naw ma ̭ meh. Ehˇ k'aw ̭, zahˇ dawˬ k'o ̭ dawˬ k'oeˇ-ahˇ naw ma ̭ maˬ naˇ haˬ geu ̭-a." 54Saˬteˬpaˬ k'oeˇ lo ̭-ehˇ ehˇ gaˇ ya gaˬ ngeh, Bah ̭dzah la ̭ k'oeˇ uˇ-eu tsawˇ haˬ deuˬ aˬ yaw ̭-ahˇ nui ma pehˇ dui dui laˇ-awˇ, seuˬ teu ̭-eu meh. 55Ehˇ k'aw ̭, Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-eu Saˬteˬpaˬ-aˬ, mˬ-ahˇ g'awˇ leuˇ haw ngeh, Miˬyehˇ-euˬ yaw sheh ̭ k'ahˬ sehˇ-ahˇ maˬ ehˇ, Miˬyehˇ-euˬ aˇ maˇ paw Yeˬsuˇ yaw ̭ lu ̭ gaˇ maˬ ehˇ, ya mawˇ-euˬ meh. 56"Haw sheˇ. Mˬ pah taˬ-awˇ, Tsawˇhaˬ-euˬ Zaˬmaˇ k'oeˇ g'aˬ Miˬyehˇ-euˬ aˇ maˇ paw yaw ̭ lu ̭-eu mawˇ laˇ ngaˇ" lehˇ aˬ yaw ̭ ehˇ-eu meh. 57K'oeˇ ngeh, tsawˇ haˬ k'oeˇ deuˬ guˇ k'aˆ le ̭-awˇ, naˬ bawˇ dehˬ tsoeˬ-awˇ Saˬteˬpaˬ jawˇ gaˇ coeˬ g'eh-euˬ meh. 58K'oeˇ naˇ, aˬ yaw ̭-ahˇ meuˬ la ̭ nyiˇ biˬ doˆ-awˇ, k'aˬ lo neh biˬ-euˬ meh. Saˇ kiˇ geu ̭-awˇ haw le-euˬ tsawˇ haˬ deuˬ-aˬ, aˬ yaw ̭ ma ̭-euˬ pehˇ k'ahˬ lehˆ taˬ ya ̭-awˇ, Sawˇluˆ lehˇ kuˇ-eu zaˬ guˬ tiˬ g'aˬ neh bi haw ya ̭-euˬ meh. 59Aˬ yaw ̭ ma ̭ Saˬteˬpaˬ-ahˇ k'aˬ lo biˬ dui dui lu ̭ ngeh, "Sahˬpaˬ Yeˬsuˇ-oˇ, ngaˬ-euˬ sa ̭ laˇ-ahˇ ha geu ̭ nehˬ la ̭-awˬ" lehˇ, Saˬteˬpaˬ guiˬ lahˬ shaˇ-euˬ meh. 60Aˬ yaw ̭ pawˬ tsui ̭ pawˬ dmˬ ga dmˬ-awˇ, "Sahˬpaˬ-oˇ, aˬ yaw ̭ ma ̭ neh mˇ-euˬ yaw lehˬ heu, aˬ yaw ̭ ma ̭-ahˇ iˬ baˇ taˬ taˬ nehˬ." lehˇ ehˇ-eu meh. Aˬ yaw ̭ k'oeˇ lo ̭-ehˇ ehˇ g'aˬ-awˇ shiˇ tsehˆ-euˬ meh.

will be added

X\