G'AˬK'EHˇ 26

1Sahˬ paˬ Aˬgiˇpaˆ Pawˇluˆ-ahˇ ehˇ-eu, "Nawˬ-euˬ gaˇ kawˆ nawˇ ngehˬ-eu aˬ kawˬ-aˬ jaˆ meh." K'oeˇ ngeh, Pawˇluˆ aˬ la ̭ caw ja-awˇ, aˬ yaw ̭-euˬ gaˇ kawˆ heu lo ̭-ehˇ ehˇ-eu meh. 2"Sahˬ paˬ Aˬgiˇpaˆ-oˇ, Yuˇdaˆ tsawˇ haˬ neh ngaˬ-euˬ gaˇ kawˆ k'aˇ daˬ taˬ-euˬ yawˬ jeˬ na lu ̭-ahˇ, iˬ nah nawˬ-euˬ mehˬ shi ngaˇ ya ngehˬ k'o ̭-eu heu-aˬ, ngaˬ-euˬ g'aˇ duˬ guiˬ lahˬ huiˬ-eu tiˬ jeˬ meh lehˇ noeˬ miˇ-a. 3Aˬ jeˬ miˇ neh ehˇ naˇ, Yuˇdaˆ tsawˇ haˬ-euˬ zahˇ sahˇ k'o ̭ hawˇ-eu aˬ yaw ̭ ma ̭ tiˬ k'ehˬ maˬ taˬ ni ja dzaˬ-eu gaˇ kawˆ nawˇ yaw muiˬ paˬ-ehˇ siˬ nya-eu meh. K'oeˇ miˇ neh, nui ma g'awˬ mahˇ ni taˬ-awˇ ngaˇ ja gaˇ tiˬ poˆ naˇ haˬ nehˬ la ̭ lehˇ shaˇ-eu ma. 4"Ngaˇ nyiˇ ngeh neh aˬ joˆ-ehˇ deh ̭ daˆ jawˇ daˆ la ̭-euˬ gaˇ kawˆ, Yuˇdaˆ tsawˇ haˬ deuˬ siˬ nya jiˇ meh. Yaw beh ngaˬ-euˬ miˇ k'ahˬ-ahˇ aˬ joˆ-ehˇ deh ̭ ya ̭-awˇ, aˇ nah Yeˬluˇsaˬlehˬ meuˬ-ahˇ aˬ joˆ-ehˇ deh ̭-euˬ aˬ yaw ̭ ma ̭ siˬ nya jiˇ meh. 5Aˬ yaw ̭ ma ̭ ehˇ doˆ maw ̭ law nmˇ-aˬ, aˬ dui-euˬ uˬ duˬ tahˬ-eu zahˇ sahˇ k'o ̭ la ̭ k'oeˇ aˬ cawˬ naˆ maˬ tseˇ zahˇ sahˇ k'o ̭-ahˇ caw teh byah dui dui-eu aˇ muˇ pyeu ̭-eu Paˬliˬsehˇ aˇ muˇ la ̭ k'oeˇ, yaw beh neh ngaˇ uˇ leˇ-euˬ aˬ yaw ̭ ma ̭ siˬ nya jiˇ meh. 6Nymˬ-mˇ ngaˇ heu gaˇ heu lo ̭-ehˇ bi pa ̭-awˇ bi naˇ haˬ lu ̭-eu heu k'aw ̭ ni, aˬ dui-euˬ aˬ poeˬ aˬ bawˇ deuˬ-ahˇ Miˬyehˇ neh dzaˬ taˬ ya ̭-euˬ saˇ jaˇ-ahˇ ngaˇ noeˬ tmˬ-eu baˬ da neh ya daˬ-eu jeˬ pyeu ̭-eu ma. 7Aˬ dui-euˬ tsawˇ jeuˬ tseˇ nyi ̭ jeuˬ lu ̭, uˬ ci ̭ nah g'ahˇ maˬ ehˇ, Miˬyehˇ-ahˇ uˬ duˬ tahˬ tahˬ-ehˇ noeˬ tmˬ lu ̭-eu k'oeˇ k'aw ̭, nymˬ-mˇ ngaˇ noeˬ tmˬ lu ̭-eu heu hmˬ meh. Sahˬ paˬ-oˇ, k'oeˇ lo ̭-ehˇ noeˬ tmˬ-eu heu hmˬ baˬ da neh Yuˇdaˆ tsawˇ haˬ deuˬ ngaˬ-ahˇ yaˇ k'aˬ ja-eu meh. 8Aˬ jeˬ miˇ neh naw ma ̭ heu gaˇ uiˬ laˇ taˬ-euˬ tsawˇ haˬ deuˬ, shiˇ-euˬ tsawˇ haˬ-ahˇ Miˬyehˇ bi g'o ̭ deh ̭ laˇ nya meh lehˇ ehˇ gaˇ maˬ jah coeˇ te." 9"Naˬzaˬlehˇ tsawˇ haˬ Yeˬsuˇ-euˬ tsawˇ myahˇ-ahˇ k'aˇ coeˬ k'aˇ ciˆ-eu jeˬ dawˬ tawˆ lu ̭ mˇ-eu tsaˬ teh ̭-a lehˇ ngaˇ noeˬ-euˬ ma. 10Yeˬluˇsaˬlehˬ meuˬ-ahˇ ngaˇ maˇ maˇ ni k'oeˇ lo ̭-ehˇ mˇ-euˬ ma. Piˇ ma aˬ yui ̭ deuˬ-ahˇ aˬ kawˬ-aˬ shaˇ-awˇ, Miˬyehˇ-euˬ tsawˇ haˬ g'awˬ mya ni nyeh ̭-awˇ tawˬ-ahˇ dawˆ-euˬ uˬ ta ̭, aˬ yaw ̭ ma ̭-ahˇ seh ̭-eu g'aˇ duˬ bawˬ dzaˬ tsehˆ gaˇ ngaˇ k'aw ̭ ahˇ leˇ-euˬ ma. 11Aˬ yaw ̭ ma ̭-ahˇ uˬ duˬ tahˬ nymˇ la ̭ k'oeˇ g'awˬ mya poˆ bi k'ehˬ bi k'aˆ ni ngaˇ jahˇ-awˇ, aˬ yaw ̭ ma ̭-euˬ jah-eu jeˬ-ahˇ bi byehˇ dzeh-eu g'aˇ duˬ ngaˇ leh jeh dui dui-euˬ ma. Aˬ yaw ̭ ma ̭-ahˇ ngaˇ nui ma pehˇ dui dui-euˬ miˇ neh, aˬ cawˬ miˇ k'ahˬ-ahˇ jaˆ-eu meuˬ deuˬ-ahˇ keuˆ ni le le-ehˇ aˬ yaw ̭ ma ̭-ahˇ k'ehˬ haw k'aˆ haw-euˬ ma. 12"K'oeˇ lo ̭-ehˇ mˇ leˇ-eu g'aˇ duˬ, piˇ ma aˬ yui ̭ deuˬ-ahˇ aˬ kawˬ-aˬ shaˇ-awˇ, Daˬmaˬsehˇ meuˬ-ahˇ ngaˇ le-euˬ ma. 13Sahˬ paˬ-oˇ, gaˇ pehˇ-ahˇ nah loˆ ceh laˇ ngeh, nahˇ ma naˆ maˬ tseˇ k'aˆ dui dui-eu yaw sheh ̭ mˬ-ahˇ neh tahˬ tehˬ le ̭-awˇ, ngaˇ hawˇ-eu ngaˬ nehˬ-ehˇ le lu ̭-eu tsawˇ haˬ deuˬ-euˬ tiˬ jawˬ bya le-euˬ meh. 14Nga ma ̭ yawˬ g'aˬ na lu ̭ miˇ tsa coˬ dzeh-euˬ ma. K'oeˇ naˇ, Heˬbyehˇ dawˬ-ahˇ neh, ngaˬ-ahˇ heu lo ̭-ehˇ ehˇ-eu teˇ saˇ-ahˇ ngaˇ ya gaˬ-euˬ ma. 'Sawˇluˆ-oˇ, Sawˇluˆ-oˇ, aˬ jeˬ miˇ neh nawˇ ngaˬ-ahˇ k'ehˬ te. Mawˇ neˇ-ahˇ tsawˆ-eu daˇ ceh-ahˇ behˆ-eu mawˇ neˇ lo ̭-ehˇ, yawˬ haˇ yawˬ ha laˆ tahˬ laˆ naˇ-eu jeˬ nawˇ mˇ-eu nga' lehˇ ehˇ-eu meh. 15'Sahˬpaˬ-oˇ, nawˇ aˬ suˇ g'aˬ te' lehˇ ngaˇ naˇ haˬ ngeh, heu lo ̭-ehˇ ehˇ k'o ̭ nehˬ la ̭-euˬ meh. 'Ngaˇ-aˬ, nawˇ k'ehˬ lu ̭-eu Yeˬsuˇ ma. 16Tuˇ-awˇ gawˬ yaw ̭ yaw ̭-awˬ. Nawˬ-ahˇ ngaˬ-euˬ gaˇ bi mˇ-eu lehˇ, nawˬ-euˬ mehˬ shi ngaˇ doˆ le-euˬ ma. Iˬ nah ngaˬ-ahˇ nawˇ ya mawˇ-euˬ gaˇ kawˆ heu hawˇ-eu, mehˬ hu paw ngaˬ neh nawˬ-ahˇ bi mawˇ-euˬ gaˇ kawˆ deuˬ, aˬ cawˬ-ahˇ nawˇ ya dzawˇ mehˬ nehˬ meh. 17Iˇsaˬleˬlaˆ tsawˇ haˬ deuˬ hawˇ-eu aˬ cawˬ tawˇ jeuˬ deuˬ jawˇ gaˇ nawˬ-ahˇ ngaˇ k'ehˇ g'eh-awˇ, aˬ yaw ̭ ma ̭-euˬ aˬ la ̭ la ̭ k'oeˇ nawˬ-ahˇ ngaˇ bi buˬ-iˇ ma. 18Aˬ yaw ̭ ma ̭ jah-eu la ̭ k'oeˇ iˬ baˇ pyehˬ nehˬ-euˬ jeˬ-ahˇ za-awˇ, Miˬyehˇ neh tseˇ doˆ-euˬ tsawˇ haˬ deuˬ nehˬ-ehˇ jawˇ duˬ za nya ni aˬ yaw ̭ ma ̭-euˬ myaˆ nuiˆ nawˇ pah nehˬ-awˇ, yaw zahˇ la ̭ k'oeˇ neh yaw sheh ̭-ahˇ ya sheuˬ k'o ̭ la ̭ nehˬ-awˇ, Saˬdaˬ-euˬ baoˬ uˬ moˆ jawˇ lu ̭-eu deuˬ-ahˇ Miˬyehˇ jawˇ paw ya sheuˬ k'o ̭ la ̭ nehˬ meh' lehˇ ehˇ-eu meh. 19"K'oeˇ miˇ neh, sahˬ paˬ Aˬgiˇpaˆ-oˇ, mˬ k'oeˇ taˆ neh oe-euˬ yaw sahˇ la ̭ k'oeˇ bi siˬ bi mawˇ-le-euˬ jeˬ-ahˇ ngaˇ maˬ naˇ haˬ geu ̭ ni maˬ byehˇ-aˬ. 20Daˬmaˬsehˇ meuˬ-ahˇ neh aˇ dahˬ beh-awˇ, Yeˬluˇsaˬlehˬ meuˬ-ahˇ maˬ ehˇ, Iˇsaˬleˬlaˆmiˇ k'ahˬ k'ahˬ lah ni-ahˇ maˬ ehˇ, aˬ cawˬ tsawˇ jeuˬ deuˬ-ahˇ maˬ ehˇ, iˬ baˇ noeˬ poˆ-awˇ Miˬyehˇ jawˇ paw g'o ̭ k'o ̭ laˇ-eu uˬ ta ̭, aˬ yaw ̭ ma ̭ iˬ baˇ noeˬ poˆ-euˬ ngaˇ lehˇ siˬ duˬ laˇ ni mˇ-awˬ shaˇ-awˬ lehˇ ngaˇ dawˬ mehˬ mehˬ-euˬ ma. 21Ngaˇ k'oeˇ lo ̭-ehˇ mehˬ-euˬ baˬ da neh, Uˬ duˬ tahˬ nymˇ nymˇ ma la ̭ k'oeˇ Yuˇdaˆ tsawˇ haˬ deuˬ ngaˬ-ahˇ nyeh ̭-awˇ seh ̭-eu lehˇ leh jeh-euˬ meh. 22Ehˇ k'aw ̭, iˬ nah keuˆ ni Miˬyehˇ ngaˬ-ahˇ caw ba nehˬ la ̭-eu miˇ neh, heu gaˇ yaw ̭-awˇ, huiˬ zaˬ nyiˇ zaˬ heu myaˆ ni g'eh-eu mehˬ shi saˇ kiˇ ya kamˬ lu ̭-eu ma. Nymˬ-mˇ ngaˇ ehˇ lu ̭-eu gaˇ kawˆ heu-aˬ, Miˬyehˇ g'aˇ duˬ ngehˬ dah-eu deuˬ hawˇ-eu Moˇseˬ neh aˬ kaˇ heu lo ̭-ehˇ pyeu ̭ laˇ teh ̭-a lehˇ ehˇ taˬ ya ̭-euˬ gaˇ kawˆ aˬ yaw ̭ tiˬ hmˬ ma. 23Ka li-aˬ, shiˇ-euˬ jeˬ-ahˇ ya daˬ-awˇ, g'o ̭ deh ̭ beh beh laˇ-euˬ g'aˬ pyeu ̭-awˇ Yuˇ daˆ tsawˇ haˬ-ahˇ maˬ ehˇ, aˬ cawˬ tsawˇ jeuˬ deuˬ-ahˇ maˬ ehˇ, ka k'o ̭-eu yaw sheh ̭ gaˇ kawˆ tahˇ k'awˬ teh ̭-a lehˇ ehˇ-eu gaˇ kawˆ k'oeˇ hmˬ meh." 24Pawˇluˆ aˬ yaw ̭-euˬ gaˇ kawˆ ngehˬ k'o ̭-awˇ k'oeˇ lo ̭-ehˇ dzawˇ lu ̭ ngeh, sahˬ paˬ Beˬtuˇ aˬ yaw ̭-ahˇ guˇ-awˇ ehˇ-eu, "Pawˇluˆ-oˇ, nawˇ uˬ tsehˆ-euˬ ngaˇ. Nawˇ tsawˇ gahˇ aˇ dzehˬ dzaw dzeuˇ-awˇ dzaw uˬ-euˬ ngaˇ." 25Pawˇluˆ ehˇ-eu, "Sahˬ paˬ Beˬtuˇ-oˇ, ngaˇ uˬ-iˇ-euˬ maˬ ngeuˇ. Aˬ diˇ aˬ maˇ ngeuˇ-eu jeˬ-ahˇ ngaˇ ehˇ lu ̭-eu ma. 26Sahˬ paˬ Aˬgiˇpaˆ-oˇ, gaˇ kawˆ heu deuˬ nawˬ-euˬ mehˬ shi k'aˬ duˬ ni ngaˇ ehˇ peuˬ ma. Aˬ jeˬ miˇ neh ehˇ naˇ, gaˇ kawˆ heu nawˇ siˬ lu ̭-eu meh. Gaˇ kawˆ heu baˇ za ̭-ahˇ pyeu ̭ laˇ-euˬ maˬ ngeuˇ-eu miˇ neh, yawˬ jeˬ na lu ̭ nawˇ siˬ jiˇ meh lehˇ ngaˇ ehˇ tsehˆ peuˬ ma. 27Sahˬ paˬ Aˬgiˇpaˆ-oˇ, Miˬyehˇ g'aˇ duˬ ngehˬ dah-eu deuˬ-ahˇ nawˇ maˬ jah loˇ. Nawˇ jah meh lehˇ ngaˇ siˬ nya ma." 28Sahˬ paˬ Aˬgiˇpaˆ Pawˇluˆ-ahˇ ehˇ-eu, "Aˇ yamˬ heu myah teh ̭ la ̭ k'oeˇ, ngaˇ Ka li zaˬ pyeu ̭ laˇ ni nawˇ jahˇ nya ma lehˇ noeˬ te loˇ." 29Pawˇluˆ ehˇ-eu, "Aˇ yamˬ yaw nymˇ yaw myahˇ taˬ ehˇ. Nawˇ hawˇ-eu iˬ nah ngaˇ ehˇ gaˇ k'aˇ naˇ haˬ lu ̭-eu tsawˇ haˬ heu deuˬ dawˬ tawˆ lu ̭, ngaˇ shmˇ caˆ daˬ lu ̭-eu heu tiˬ hmˬ maˬ ngeuˇ naˇ, ngaˬ lo ̭-ehˇ jah-eu tsawˇ haˬ pyeu ̭ laˇ ni, Miˬyehˇ-ahˇ ngaˇ guiˬ lahˬ shaˇ lu ̭ ma." 30K'oeˇ naˇ, sahˬ paˬ Aˬgiˇpaˆ maˬ ehˇ, sahˬ paˬ Beˬtuˇ maˬ mehˇ, Beˬlaˬniˇ maˬ ehˇ, aˬ yaw ̭ ma ̭ nehˬ-ehˇ k'aˇ nuiˇ lu ̭-eu deuˬ maˬ ehˇ, g'o ̭-iˇ-eu lehˇ tuˇ laˇ jiˇ-euˬ meh. 31Aˬ yaw ̭ ma ̭ g'o ̭ doˆ le-awˇ tiˬ g'aˬ tiˇ g'aˬ ehˇ-eu, "Tsawˇ haˬ heu g'aˬ-ahˇ seh ̭ paˬ-ehˇ, maˬ ngeuˇ naˇ tawˬ-ahˇ dawˆ paˬ-ehˇ mˇ lehˬ taˬ-euˬ tiˬ jeˬ-iˬ maˬ jaˆ law hawˇ ngaˬ laˬ." 32Beˬtuˇ-ahˇ Aˬgiˇpaˆ ehˇ nehˬ-eu, "Tsawˇ haˬ heu g'aˬ sahˬ paˬ Gehˇsaˬ neh yaˇ k'aˬ bi daˇ la ̭ lehˇ maˬ shaˇ law nmˇ-aˬ, aˬ yaw ̭-ahˇ pyehˬ nehˬ nya lawˇ hawˇ nga."

will be added

X\