2 BEˬTUˆLUˆ 1

1Yeˬsuˇ Ka li-euˬ zaˬ k'aˆ hawˇ-eu g'aˬ k'ehˇ pyeu ̭-eu ngaˇ Siˇmoˬ Beˬtuˆluˆ, Miˬyehˇ hawˇ-eu Ka k'o ̭-eu g'aˬ pyeu ̭-eu Yeˬsuˇ Ka li-euˬ yaw tsaˬ yaw dawˇ jeˬ baˬ da neh nga ma ̭-euˬ jah-eu jeˬ-ahˇ duˇ-eu aˇ poeˬ k'aˆ dui dui-eu jah-eu jeˬ za taˬ-euˬ deuˬ jawˇ gaˇ sahˬ bo ̭ bo ̭ ahˇ la ̭-eu ma. 2Miˬyehˇ hawˇ-eu aˬ dui-euˬ Sahˬpaˬ Yeˬsuˇ-ahˇ naw ma ̭ siˬ nya-eu jeˬ baˬ da neh, guiˬ lahˬ yaw dzahˇ hawˇ-eu nui saˇ o ̭-eu jeˬ-ahˇ tiˬ byah tiˬ lo ̭ za lu ̭-uˇ. 3Aˬ yaw ̭-euˬ yaw sheh ̭ k'ahˬ sehˇ hawˇ-eu muiˬ dui byah dui dui-eu jeˬ-ahˇ aˬ dui za nya ni, aˬ dui-ahˇ kuˇ-euˬ g'aˬ-ahˇ aˬ dui siˬ nya-eu la ̭ k'oeˇ, Miˬyehˇ-ahˇ yaw zeu baw-awˇ deh ̭ nya-eu g'aˇ duˬ, aˬ dui k'aˇ loˬ-eu jeˬ dawˬ tawˆ lu ̭ Miˬyehˇ-euˬ muiˬ-eu shawˇ-eu baoˬ aˬ dui-ahˇ bi ̭ la ̭-euˬ meh. 4K'oeˇ lo ̭-ehˇ mˇ nehˬ la ̭-eu la ̭ k'oeˇ, aˬ yaw ̭ neh aˬ dui-ahˇ bi ̭ ma lehˇ saˇ jaˇ dzaˬ taˬ-euˬ huiˬ dui poeˬ dui dui-eu la ̭ sawˬ aˬ dui-ahˇ bi ̭ la ̭-euˬ meh. La ̭ sawˬ k'oeˇ deuˬ-aˬ, miˇ tsaˬ heu k'oeˇ taˆ jaˆ-eu shiˬ shaˬ jiˇ nui k'ahˇ baˬ da neh luˬ-iˇ seˇ-iˇ-eu jeˬ-ahˇ naw ma ̭ buˬ-iˇ law-iˇ-awˇ, Miˬyehˇ-euˬ yaw deh ̭ deh ̭-eu jeˬ-ahˇ naw ma ̭ bi za-eu g'aˇ duˬ bi ̭ laˬ-euˬ la ̭ sawˬ pyeu ̭-eu meh. 5K'oeˇ miˇ neh, naw ma ̭ leh jeh dui dui-eu la ̭ k'oeˇ, jah-eu jeˬ k'oeˇ taˆ muiˬ-eu jaˬ-euˬ jeˬ bi lahˬ laˇ-awˬ. Muiˬ-eu jaˬ-eu jeˬ k'oeˇ taˆ zaˬ siˬ tsawˇ gahˇ bi lahˬ laˇ-awˬ. 6Zaˬ siˬ tsawˇ gahˇ k'oeˇ taˆ yawˬ ha-euˬ nui ma-ahˇ g'aˬ leˇ-eu jeˬ bi lahˬ laˇ-awˬ. Yawˬ ha-euˬ nui ma-ahˇ g'aˬ leˇ-eu jeˬ k'oeˇ taˆ daˬ coeˇ oˇ coeˇ-eu jeˬ bi lahˬ laˇ-awˬ. Daˬ coeˇ oˇ coeˇ-eu jeˬ k'oeˇ taˆ Miˬyehˇ-ahˇ yaw zeu baw-eu jeˬ bi lahˬ laˇ-awˬ. 7Miˬyehˇ-ahˇ yaw zeu baw-eu jeˬ k'oe taˆ Ka li zaˬ cawˬ cawˬ gaˬ-eu jeˬ bi lahˬ laˇ-awˬ. Ka li za cawˬ cawˬ gaˬ-euˬ jeˬ k'oeˇ taˆ g'oeˇ-eu gaˬ-eu jeˬ bi lahˬ laˇ-awˬ. 8Heu deuˬ-aˬ, naw ma ̭ loˬ dui dui-eu jeˬ pyeu ̭-eu meh. Naw ma ̭ heu deuˬ tiˬ byah tiˬ lo ̭ ahˇ naˇ, gaˇ dahˇ tsoeˬ-eu tsawˇ haˬ pyeu ̭ laˇ-awˇ, aˬ dui-euˬ Sahˬpaˬ Yeˬsuˇ Ka li-ahˇ naw ma ̭ siˬ nya-eu jeˬ byah dzehˬ laˇ teh ̭-a. 9Ehˇ k'aw ̭, heu deuˬ maˬ ahˇ-eu tsawˇ haˬ-aˬ, myaˆ nuiˆ maˬ haw mawˇ nya-ehˇ, dzeuˇ laˇ ngeh aˬ yaw ̭ neh mˇ ya ̭-euˬ iˬ baˇ deuˬ-ahˇ tsiˬ shawˇ nehˬ g'aˬ-euˬ gaˇ kawˆ ngehˇ jiˇ teh ̭-a. 10K'oeˇ miˇ neh aˬ yui ̭ aˬ nyiˇ Ka li zaˬ deuˬ-oˇ, Miˬyehˇ neh naw ma ̭-ahˇ kuˇ-awˇ tseˇ doˆ nehˬ la ̭-euˬ jeˬ-ahˇ aˬ myah lu ̭ zi ̭ dah ni tuˆ tehˬ taˬ nya ni, yaw k'aˆ k'aˆ-ehˇ leh jeh-awˬ. K'oeˇ lo ̭-ehˇ mˇ naˇ, jah-eu jeˬ-ahˇ naw ma ̭ tiˬ jawˇ-iˬ maˬ byehˇ dzeh-aˇ. 11K'oeˇ lo ̭-ehˇ mˇ-eu la ̭ k'oeˇ, aˬ dui-ahˇ ka k'o ̭-eu g'aˬ pyeu ̭-eu Sahˬpaˬ Yeˬsuˇ Ka li-euˬ mˬ maˬ maˬ byaˆ zaˇ ziˇ Miˇk'ahˬ la ̭ k'oeˇ uˇ leˇ-eu aˬ kawˬ-aˬ naw ma ̭ tiˬ byah tiˬ lo ̭ za teh ̭-a. 12K'oeˇ miˇ neh, gaˇ kawˆ heu deuˬ-ahˇ naw ma ̭ siˬ nya jiˇ-awˇ, yawˬ ha za taˬ-euˬ yaw tsaˬ yaw dawˇ jeˬ la ̭ k'oeˇ naw ma ̭ zi ̭ dah ni jawˇ lu ̭-eu k'aw ̭, gaˇ kawˆ heu deuˬ ngaˇ naw ma ̭-ahˇ tiˬ k'ehˬ maˬ taˬ ni ja noeˬ nehˬ ma. 13Gaˇ kawˆ heu deuˬ naw ma ̭ maˬ bi ngehˇ-eu g'aˇ duˬ, ngaˇ k'aˇ deh ̭ k'oeˇ keuˆ ni naw ma ̭-ahˇ laˆ noeˬ-eu tsaˬ meh lehˇ ngaˇ noeˬ-eu ma. 14Aˬ dui-euˬ Sahˬpaˬ Yeˬsuˇ Ka li neh ngaˬ-ahˇ bya cehˆ ni ehˇ nehˬ la ̭-euˬ lo ̭-ehˇ, bu ̭-iˇ cehˇ-iˇ nya-eu ngaˬ-euˬ shiˬ shaˬ jiˇ g'awˇ mawˇ heu-ahˇ g'awˬ myahˇ maˬ g'eh-ehˇ ya lehˆ dzeh ya ̭ meh lehˇ ngaˇ siˬ nya ma. 15Ngaˇ shiˇ dzeuˇ ngeh jawˇ, gaˇ kawˆ heu deuˬ-ahˇ naw ma ̭ maˬ bi ngehˇ ni aˬ myah lu ̭ bi noeˬ keuˆ-eu g'aˇ duˬ, ngaˇ k'aˇ g'eh nya-eu lo ̭-ehˇ leh jeh-awˇ ngehˬ g'eh nehˬ ya ̭ ma. 16Aˬ dui-euˬ Sahˬpaˬ Yeˬsuˇ Ka li baoˬ tiˬ byah ni za ̭ le teh ̭-a lehˇ naw ma ̭-ahˇ nga ma ̭ bi siˬ-eu heu-aˬ, aˬ cawˬ neh noeˬ doˆ-awˇ ja-euˬ gaˇ kawˆ yuˇ-awˇ bi siˬ-eu maˬ ngeuˇ. Aˬ yaw ̭-euˬ huiˬ dui mahˇ dui dui-eu baoˬ-ahˇ nga ma ̭ myaˆ ya mawˇ duˬ-euˬ ma. 17Dawˬ tawˆ k'oeˇ taˆ yaw sheh ̭ k'ahˬ sehˇ huiˬ-eu g'aˬ jawˇ gaˇ neh, "Heu-aˬ, ngaˇ nui k'ahˇ shiˇ-eu, ngaˇ gaˬ dui dui-eu ngaˬ Li ma" lehˇ ehˇ doˆ le ̭-awˇ, Aˬda Miˬyehˇ neh aˬ yaw ̭-ahˇ taˬ huiˬ taˬ mahˇ-eu jeˬ hawˇ-eu yaw sheh ̭ k'ahˬ sehˇ bi ̭ nehˬ ngeh, nga ma ̭ k'oeˇ gaˇ jawˇ lu ̭-eu ma. 18Muiˬ-eu shawˇ-eu gawˬ jawˬ k'oeˇ taˆ aˬ yaw ̭ nehˬ-ehˇ nga ma ̭ ya jawˇ lu ̭ ngeh, teˇ saˇ k'oeˇ saˇ mˬ-ahˇ neh mahˇ doˆ le gaˇ nga ma ̭-euˬ naˬ bawˇ neh ya gaˬ-euˬ ma. 19K'oeˇ miˇ neh, Miˬyehˇ g'aˇ duˬ ngeh dah-eu deuˬ neh ngehˬ ya ̭ tmˇ ya ̭-euˬ dawˬ deuˬ-ahˇ nga ma ̭ jah dzehˬ laˇ-euˬ ma. Dawˬ k'oeˇ deuˬ-ahˇ naw ma ̭ yaw muiˬ paˬ-ehˇ naˇ haˬ geu ̭-awˬ. Aˬ jeˬ miˇ neh ehˇ naˇ, k'oeˇ-aˬ, Aˇ nah k'oeˇ nah uˬ bya bya taw taw laˇ-awˇ naw ma ̭-euˬ nui ma la ̭ k'oeˇ shawˬ ga shawˬ muiˇ tsehˬ laˇ ngeh keuˆ ni, yaw zahˇ la ̭ k'oeˇ yaw sheh ̭ bya nehˬ la ̭-eu tsiˇ k'mˬ-ahˇ duˇ-eu meh. 20Ehˇ k'aw ̭, dawˬ tawˆ lu ̭ k'oeˇ taˆ heu lo ̭-ehˇ jeˬ hu siˬ nya taˬ-awˬ. Jaˇli ̭ la ̭ k'oeˇ Miˬyehˇ g'aˇ duˬ ngehˬ dah taˬ-euˬ dawˬ-ahˇ, tsawˇ haˬ tiˬ g'aˬ-iˬ yawˬ haˇ yawˬ ha dawˬ tsui ̭ maˬ yuˇ doˆ mehˬ nya-aˇ lehˇ siˬ nya taˬ-awˬ. 21Aˬ jeˬ miˇ neh ehˇ naˇ, Miˬyehˇ g'aˇ duˬ ngehˬ dah-euˬ dawˬ aˬ geu dawˬ maˬ kaˬ, tsawˇ haˬ zaˬ-euˬ nui ma la ̭ k'oeˇ neh doˆ laˇ-euˬ jeˬ maˬ ngeuˇ-a. Ehˇ k'aw ̭, Miˬyehˇ jawˇ gaˇ neh doˆ le-euˬ dawˬ deuˬ-ahˇ tsawˇ haˬ zaˬ ngehˬ dah ngeh, aˬ yaw ̭ ma ̭-ahˇ Muiˬ-eu shawˇ-eu Yaw sahˇ Miˬyehˇ uˆ lahˇ-awˇ bi ngehˬ-eu meh.

will be added

X\