2 GAWˇLIˬTU 3

1Nga ma ̭ yawˬ haˇ yawˬ ha k'ahˬ sehˇ paˇ jehˆ gaˇ duˇ-eu nga loˇ. Aˬ cawˬ jahˇ lu ̭-eu lo ̭-ehˇ, nga ma ̭ g'eh naw ma ̭ jawˇ gaˇ laˇ ngeh naw ma ̭ ha geu ̭ nehˬ la ̭ ni aˬ cawˬ neh nga ma ̭-euˬ gaˇ kawˆ naw ma ̭-ahˇ bo ̭ nehˬ-euˬ sahˬ bo ̭ yuˇ le ̭-eu loˬ ta loˇ. Maˬ ngeuˇ naˇ, nga ma ̭ aˬ cawˬ jawˇ gaˇ iˇ ngeh, aˬ cawˬ nga ma ̭-ahˇ ha geu ̭ nehˬ la ̭ ni, naw ma ̭ neh nga ma ̭-euˬ gaˇ kawˆ bo ̭ nehˬ-euˬ sahˬ bo ̭ yuˇ g'eh-eu loˬ ta loˇ. 2Naw ma ̭-euˬ mawˇ do-aˬ, tsawˇ haˬ yawˬ g'aˬ na lu ̭ siˬ nya gui nya ni nga ma ̭-euˬ nui ma-ahˇ bo ̭ myahˬ taˬ-euˬ sahˬ bo ̭ pyeu ̭-eu ma. 3Naw ma ̭-aˬ, Ka li neh bo ̭ ahˇ le ̭-awˇ nga ma ̭ neh hehˇ le ̭-euˬ sahˬ bo ̭ tiˬ dzeh pyeu ̭-eu meh. Sahˬ bo ̭ heu dzeh-ahˇ sahˬ uiˇ zmˬ-awˇ bo ̭ taˬ-euˬ maˬ ngeuˇ-a. Deh ̭ lu ̭-eu Miˬyehˇ-euˬ Yaw sahˇ-ahˇ zmˬ-awˇ bo ̭ taˬ-euˬ meh. K'aˬ lo teˇ bya ̭ k'oeˇ taˆ bo ̭ taˬ-euˬ maˬ ngeuˇ-a. Tsawˇ haˬ-euˬ nui ma teˇ bya ̭ k'oeˇ taˆ bo ̭ taˬ-euˬ meh. 4Ka li-ahˇ g'oe-eu la ̭ k'oeˇ Miˬyehˇ-ahˇ nui ma huiˬ k'aˇ za-eu miˇ neh ngaˇ heu lo ̭-ehˇ ehˇ peuˬ-eu ma. 5Gaˇ heu nga ma ̭ mˇ nya ma lehˇ ehˇ paˬ-ehˇ nga ma ̭ la ̭ k'oeˇ tiˬ jeˬ-iˬ maˬ ahˇ. Nga ma ̭ mˇ nya-eu k'oeˇ-aˬ, Miˬyehˇ neh bi ̭ la ̭-euˬ jeˬ pyeu ̭-eu meh. 6Bo ̭ doˆ taˬ-euˬ zahˇ dawˬ k'o ̭ dawˬ-ahˇ maˬ ta ̭-ehˇ, Yaw sahˇ Miˬyehˇ-ahˇ ta ̭-eu dawˬ ma saˇ jaˇ yaw shui ̭ g'aˇ duˬ nga ma ̭ gaˇ mˇ nya ni Miˬyehˇ neh jahˇ nehˬ la ̭-euˬ meh. Bo ̭ doˆ taˬ-euˬ zahˇ dawˬ k'o ̭ dawˬ-aˬ, bi shiˇ-eu jeˬ pyeu ̭-eu meh. Ehˇ k'aw ̭ Yaw sahˇ Miˬyehˇ-aˬ, bi deh ̭ laˇ-eu jeˬ pyeu ̭-eu meh. 7Zahˇ dawˬ k'o ̭ dawˬ k'oeˇ-aˬ, k'aˬ lo k'oeˇ taˆ ta ̭ bo ̭ taˬ-awˇ, Zahˇ dawˬ k'o ̭ dawˬ k'oeˇ bi ̭ le ngeh, Miˬyehˇ-euˬ yaw sheh ̭ k'ahˬ sehˇ doˆ le-euˬ meh. Moˇseˬ-euˬ myaˆ pyawˬ k'oeˇ taˆ bya-eu yaw sheh ̭ k'oeˇ-aˬ, tiˬ k'ehˇ laˇ k'ehˬ teh ̭-ehˇ gmˬ-eu yaw sheh ̭ pyeu ̭ k'aw ̭, yaw sheh ̭ aˇ dzehˬ-ehˇ k'aˆ-eu miˇ neh Iˇsaˬleˬlaˆ tsawˇ haˬ deuˬ Moˇseˬ-euˬ myaˆ pyawˬ-ahˇ maˬ haw peuˬ-a. Shiˇ-eu jeˬ bi keuˆ le-eu Zahˇ dawˬ k'o ̭ dawˬ k'aw ̭, k'oeˇ naˆ naˆ-ehˇ g'eh-eu yaw sheh ̭ k'ahˬ sehˇ la ̭ k'oeˇ oe-euˬ ngeuˇ naˇ, 8Yaw sahˇ Miˬyehˇ neh mˇ-euˬ gaˇ deuˬ-ahˇ ta ̭ leˇ-eu yaw sheh ̭ k'ahˬ sehˇ-aˬ, aˇ naˆ ni paˇ k'aˆ dzehˬ nmˇ. 9Iˬ baˇ ahˇ gaˇ k'ehˬ nehˬ k'aˆ nehˬ le-euˬ k'oeˇ jeˬ k'oeˇ naˆ ni yaw sheh ̭ k'ahˬ sehˇ ahˇ naˇ, tsawˇ haˬ zaˬ-ahˇ Miˬyehˇ mehˬ shi yaw tsaˬ yaw dawˇ tsawˇ haˬ bi pyeu ̭ laˇ ni mˇ-eu heu jeˬ aˇ naˆ ni yaw sheh ̭ k'ahˬ sehˇ paˇ ahˇ dzehˬ nmˇ. 10Maˇ maˇ ni ehˇ naˇ, nymˬ-mˇ-euˬ yaw sheh ̭ k'ahˬ sehˇ heu hmˬ bya dzehˬ-eu miˇ neh, aˇ hu bya dui dui-euˬ yaw sheh ̭ k'ahˬ sehˇ k'oeˇ hmˬ miˆ-iˇ-euˬ gaˇ duˇ meh. 11Tiˬ k'ehˬ tiˬ yamˬ teh ̭-ehˇ gmˬ-eu jeˬ la ̭ k'oeˇ k'aw ̭ yaw sheh ̭ k'ahˬ sehˇ ahˇ-eu ngeuˇ naˇ, mˬ maˬ maˬ byaˆ zaˇ ziˇ gmˬ-eu jeˬ la ̭ k'oeˇ yaw sheh ̭ k'ahˬ sehˇ aˇ naˆ ni paˇ ahˇ paˬ nga. 12Nga ma ̭ heu lo ̭-ehˇ noeˬ tmˬ taˬ-euˬ miˇ neh, tiˬ paw ̭-iˬ maˬ guˆ ni ngehˬ peuˬ tmˇ peuˬ-eu ma. 13Nga ma ̭-aˬ, Moˇseˬ-ahˇ maˬ duˇ. Moˇseˬ-aˬ, aˬ yaw ̭-euˬ myaˆ pyawˬ k'oeˇ taˆ bya-eu yaw sheh ̭ k'ahˬ sehˇ k'oeˇ byoˆ-iˇ gaˇ Iˇsaˬleˬlaˆ tsawˇ haˬ deuˬ maˬ bi mawˇ-eu g'aˇ duˬ, myaˆ pyawˬ-ahˇ saˬ paˇ dehˬ kaˬ-euˬ meh. 14Ehˇ k'aw ̭, aˬ yaw ̭ ma ̭ nui ma g'ahˇ-eu meh. Iˬ nah keuˆ ni aˬ yaw ̭ ma ̭ dawˬ ma saˇ jaˇ yaw oeˇ-ahˇ k'aˇ gui ngeh, myaˆ pyawˬ-ahˇ saˬ paˇ dehˬ kaˬ taˬ-euˬ k'oeˇ maˬ yuˇ dzeh-aˬ siˬ. Aˬ jeˬ miˇ neh ehˇ naˇ, ka li-ahˇ maˬ ta ̭ naˇ myaˆ pyawˬ-ahˇ dehˬ kaˬ taˬ-euˬ saˬ paˇ k'oeˇ maˬ yuˇ dzeh nya-a. 15Ngeuˇ meh. Iˬ nah keuˆ ni Moˇseˬ-euˬ Zahˇ dawˬ k'o ̭ dawˬ-ahˇ aˬ yaw ̭ ma ̭ k'aˇ gui ngeh, aˬ yaw ̭ ma ̭-euˬ nui ma-ahˇ saˬ paˇ k'oeˇ hmˬ dehˬ kaˬ taˬ-euˬ meh. 16Ehˇ k'aw ̭, tsawˇ haˬ tiˬ g'aˬ Sahˬpaˬ Miˬyehˇ jawˇ gaˇ g'o ̭ k'o ̭ laˇ naˇ, saˬ paˇ k'oeˇ hmˬ-ahˇ yuˇ dzeh nehˬ-eu meh. 17Nymˬ-mˇ Sahˬpaˬ Miˬyehˇ lehˇ ehˇ-eu heu-aˬ, Yaw sahˇ Miˬyehˇ-ahˇ ehˇ-eu meh. Sahˬpaˬ Miˬyehˇ-euˬ Yaw sahˇ-aˬ, aˬ dui-ahˇ bi buˬ bi law-iˇ la ̭-eu meh. 18Aˬ dui dawˬ tawˆ lu ̭ myaˆ pyawˬ-ahˇ saˬ paˇ maˬ dehˬ kaˬ taˬ-ehˇ, Sahˬpaˬ Miˬyehˇ-euˬ yaw sheh ̭ k'ahˬ sehˇ aˬ dui-ahˇ tahˬ le lu ̭ meh. Sahˬpaˬ Miˬyehˇ-euˬ Yaw sahˇ jawˇ gaˇ neh oe-euˬ yaw sheh ̭ k'ahˬ sehˇ k'oeˇ aˬ dui-ahˇ tiˬ jawˇ saˇ-iˬ tiˬ jawˇ yaw sheh ̭ k'ahˬ sehˇ bi huiˬ dzehˬ laˇ-awˇ, aˬ yaw ̭-ahˇ duˇ leˇ ni aˬ dui-ahˇ bi paˇ laˇ lu ̭-eu meh.

will be added

X\