1 Lɛgŋ nyam Jesu as in e jam ɛsɛl lɛw yony a luku, ɛtŋ n’ɔŋ wɛl abusu lele lɛc ab eke -li k’ogŋ abŋ eŋuŋ fɛŋ ke -l’ewlm ɔl ɛsɛl. 2 Ɛtŋ l’ɛrm wɛl eke -li k’im -li dad Nyam e gbreŋgbi usu a ec’odad, ke -l’ewlm ɔ́lu. 3 N’ɔm wɛl ów ninɛ: "K’òcr usu im ec’ob kaka k’ɔnymn ab: kpama, ekpr, ob ij, os yɛji. Ke ɔny ɛm ec’ɛgŋ kaka k’ócm mob sus ɛm ɛjeci akrm af. 4 Usu fɛŋ eke wɛl b’ow eb ɔny a, ànŋn gbugŋ a cɛ toŋ bake ŋ́gbroŋn yogŋ a. 5 Usu fɛŋ eke agŋ k’ow ɛgŋm ebm ɔny a, ̀ŋ̀gbroŋn ɛl ec’ɛb ab ɛm, ke cícr ɔny ec’akr sɛc a okr ɛl es. Na b’ow ij ɛl e nuŋ af e daŋku Nyam ec’any af." 6 Jam ɛsɛl a im ɛtŋ am ɛc baŋn baŋn fɛŋ dad Amani Mamn a ec’odad, ɛtŋ usu a fɛŋ -n’am ewlm ɔ́lu. 7 Lɛgŋ ab ɛm a, Erɔd Antipas ek’el Galile wus af ec’es ɛw ɛs a iri wɛl am dad ów a ek’am ɛy a ec’amani. Ɛtŋ l’úwm elel eke li ki dadr any, aŋke agŋ bɛb am dad ɛsɛ Jan mij ok nuŋ ɛs ek’in uw a, in igb luw ɛm. 8 Agŋ oglog am dad eke ow’n b’ow in el kokoba ɔb ɛs Eli anake in ɛwl in ow a. Ɛtŋ bɛb am dad eke ow’n b’ow in el godo godo e kokoba ɔb ɛsɛl a e nyam anake in igb luw ɛm a. 9 Kɔ Erɔd am tutr ów dad ɛsɛ: "Kɔ m’ubr Jan nuŋ; ɛtŋ bogŋ ec’ɛgŋ anake m’am iri in e lís ec’ów ab ee?" Ɛtŋ n’am ɔl eke li k’ɛkn Jesu. 10 Eke ɛrm ɛsɛl a ɛwl mɛny ow a, -n’am dad Jesu ów a fɛŋ eke -li kokr a e low. Ɛtŋ Jesu ot ɛl ab im baŋn nyam eke wɛl b’ɛsŋ Bɛtsayida e saw eke -li k’anŋ ɛl sɔny. 11 Kɔ eke -l’okr yogŋ a, agŋ nɔnɔ gbɛl uw any ɛtŋ am us’r jam im. Jesu eb ɛl ɛtŋ am dad ɛl Nyam e gbreŋgbi usu a e low ɛtŋ n’am ewlm ɔ́lu a ek’am ibrm eke k’ewl a. 12 Eke lɛgŋ am ew es a, jam ɛsɛl lɛw yony a ow ɛŋn Jesu ɛtŋ dad’r ninɛ: "Ɛgŋ gbɛl, òk bieku ab es ím baŋn baŋn lele sikpukpu ɛm ab yec’ɛtŋ ke -n’ɛŋn ob ij lele es ɛru usu ab, aŋke aŋa eke s’anŋ a el usu saw ɛm." 13 Kɔ li dad wɛl ninɛ: "Ɔny obi, ɔ̀ŋn ɛl ob -l’ij!" Ɛtŋ jam ɛsɛl a ɔdu eb ninɛ: "Futufutu yen lele ɔcn yony ab cɛ s’ɔnym ab. Kɔ erur eke si k’im s’ɔl ob ij ɛbm agŋ nɔnɔ na ee?" 14 (Agŋ egŋ ek’anŋ ɛl ɛm yogŋ a ɔtu ek’ij agŋ fandi yen). Jesu dad in e jam ɛsɛl ninɛ: "Dàdr ɛl -l’ok es eku eku ɛm ek’ɔtu eke k’ij agŋ ekŋ yony lele lɛw lɛw ab." 15 Jam ɛsɛl a ɛlum ɛtŋ ɔŋ ɛl -l’ok es ɛbɛn. 16 Jesu oc futufutu yen a lele ɔcn yony ab ab igbl any ogŋ afr, ɛtŋ ɛlu Nyam bia. Li bubr ɛm n’ɔŋ in jam ɛsɛl a, ɛtŋ -li cɛc -n’ɔŋ bieku a. 17 Agŋ a fɛŋ ij ob a lok iy, ɛtŋ ɛmɛny ow wal es. Ɛtŋ jam ɛsɛl a ot ekpr a eke wal es a as luku, ɛtŋ ow iy mulu lɛw yony. 18 Lɛgŋ nyam, Jesu ocr sos es im Nyam ŋɔŋn ɛm; jam ɛsɛl a yɛji im in ab. N’am ibrm wɛl l’ɛsɛ: "Kɔ ayaf agŋ a bi dadr ɛm e lís ee?" 19 -L’ɔdu -l’eb -li dad ninɛ: "Agŋ bɛb bi dad eke ŋ Jan mij ok nuŋ ɛs. Agŋ oglog b’ɛsɛ ŋ Eli. Ɛtŋ bɛb bi dad ɛsɛ ŋ godo godo e kokoba ɔb ɛsɛl ab ɛm e nyam eke in igb luw ɛm." 20 Eke -li dadr ɛbɛn a, Jesu ibrm ɛl ninɛ: "Ɛtŋ kɔ ɔny obi ɔny obi a ayaf b’ocar’m ee?" Ɛtŋ Piɛr ɔdu eb dad ninɛ: "Ŋ el Nyam e Mesi!" 21 Eke Piɛr dad ɛbɛn a, Jesu ijl ɛl nɛny kpoŋ kpoŋ kpoŋ ninɛ: "Kì dadr low na k’okr ɛgŋ kaka." 22 Ɛtŋ ɛmɛny li dad ninɛ: "Ow it ek’ɛgŋ ec’ Iy k’ij gbre nɔnɔ, ke agŋ ekpekp, egb waw ɛsɛl ɛgbɛl, lele ol e low yɛgm ɛsɛl ab ígŋ ɛlu’l es, ɔ́ŋ wɛl ibi’r ke sɛgŋ nyahan l’ígb agŋ ek’uw ab ɛm." 23 Ɛtŋ li dad agŋ a fɛŋ ninɛ: "Ek’ɛgŋ nyam am erur eke k’us’m jam a, ow it ke li kí tutrm in e lís owi, ke sɛgŋ fɛŋ l’ábu in obi ec’olikŋ a, ke l’ús’m jam. 24 Tasi ɛm a, ɛgŋ yec’eke b’ow erur eke ki dogŋn in e sel a b’ow irmn. Gbɛkɔ ɛgŋ yec’eke b’ow irmn in e sel a b’ow ɛŋn. 25 Eke ɛgŋ nyam ɔny wus ec’ob a fɛŋ ɛtŋ l’irmn in e sel a, ke bla ow b’ow eel il ab ee? 26 Ek’ɛgŋ ɛ́s b’ɔny ɛm sosiɛm lele ɛm ec’odad ab ec’a, ɛbɛn ɛgŋ ec’ Iy yɛji ɛ́s b’ow ɔny in e lís, lɛgŋ eke li b’ow l’ow in ec’anygbɛl ɛm a, anygbɛl ek’el Ɛs lele afr ɛrm ɛsɛl lala ab eci. 27 Low nawrɛ m’am dad ɔny: agŋ a eke anŋ aŋa a e bɛb b’ow ɛkn Nyam ec’ es ɛw a gbuŋ ke -l’uw." 28 Eke ow ij sɛgŋ niwn eke li dad odad na a, Jesu uyu lafɛny nyam af, in lele Piɛr, Jan lele Jak ab eke li ki ŋɔŋn Nyam. 29 Eke n’am ŋɔŋn Nyam a, in ec’any a itŋn ɛtŋ in e mob sus ɛm a yɛji ufu toŋ am jɛjn. 30 Kpɛkŋ agŋ yony ok ɔkm am dad ów Jesu ab: ow el Mois lele Eli ab eke anŋ Nyam ec’usuayl ek’am jɛjn ab ɛm okm sos ɔkm. -N’am dad elel eke Jesu b’ow uw Jerusalɛm, ke ow ɛm in e juma b’ow iy nɛny a. 32 Low na ek’am ɛy a, Piɛr lele lawlɛl ab ab mɛmn ibi. Eke any b’ok ɛl es a, -l’ɛkn Jesu ek’anŋ Nyam ec’usuayl ab ɛm lele agŋ yony eke inym es ab. 33 Eke agŋ a k’ɛlu Jesu es im a, Piɛr dad’r ninɛ: "Ɛgŋ gbɛl, ow akpl eke si k’anŋ aŋa! S’ús nuŋ igŋ usu nyahan: ŋ e nyam, Mois e nyam lele Eli e nyam ab." (Odad cɛ ek’ɛy’r nɛnym ke li dad.) 34 Eke n’am dad odad ɛbɛn a, kpɛkŋ jru ɛy ɛtŋ ubur ɛl fɛŋ es. Eke -l’ɛkan jru na ow am ubur ɛl es a, jam ɛsɛl a erŋn am ɔny. 35 Ɛtŋ lebl nyam anŋ jru ab ɛm am ikŋ dad ɛsɛ: "Ɛgŋ na el ɛm ec’Iy eke mi sɔsum m’oc. Ìrir in e low!" 36 Eke lebl a ikŋ dad odad na bake ok es a, jam ɛsɛl a ɛkn Jesu sɔny coco eke inym es. Low na eke jam ɛsɛl a iri ke ɛkn a, lɛgŋ ab ɛm a -li dadm -l’okm ɛgŋ kaka. 37 Eke lɛgŋ ɛny a, Jesu lele in e jam ɛsɛl ab ab anŋ lafɛny ab af us es ɛtŋ agŋ nɔnɔ ow am ɔbr’r. 38 Bieku ab ɛm yogŋ, ɛgŋ nyam am ɛlu lebl ɔg dad ɛsɛ: "Low yɛgm agŋ ɛs, m’am ŋɔŋn’ŋ, ìs any lɛr ɛm ec’iy na, l’el ɛm ec’iy igŋ ekpɔbi! 39 Abŋ ŋuŋ a b’ɛy’r ɛm a ke n’am ɔg, ow ám ɔny ufŋ’n lɛc ɛm ke sar ám ifl’l nɛny. Ow b’ijr’r gbre toŋ bake sos kikn’n es gbuŋ ke ow ɛ́lu’l es. 40 Mi dad ŋ e jam ɛsɛl a ow ek’ogŋ abŋ ikŋ na, kɔ -l’ɔtum." 41 Eke igŋ a dad ɛbɛn a, Jesu igbl lebl ogŋ dad agŋ a fɛŋ ninɛ: "Wew! Ɔny eel agŋ eŋuŋ eke ɔmn anm ɛm tasi! Ɛmɛny sɛgŋ abi m’it eke mi k’anŋ ɔny ab ee? Ɛtŋ ɛmɛny sakp abi ow it eke mi k’ɛgŋ low na m’eb ee?" Ɛtŋ ca li dad iy ɛs a ninɛ: "Òc ŋ ec’iy a ow aŋa!" 42 Eke iy a am ow titm’n a, abŋ a ɔny ɛlu’l wus ɛtŋ am ɔny ufŋ’n lɛc ɛm. Kɔ Jesu dad odad lebl tuɔtuɔ ɛm ogŋ abŋ ŋuŋ a, ewlm iy a, ɛtŋ l’oc n’ɔŋ ow ɛs. 43 Low na ek’ɛy ɛbɛn a, ow iti agŋ a fɛŋ any, Nyam ec’abusu ligbɛl na ek’ɛy ɔkm a sosiɛm. Ek’ɛgŋ ɛgŋ low am iti any Jesu e low na eke kok a sosiɛm a, li dad in e jam ɛsɛl a ninɛ: 44 "Low na eke ca m’am ow mi dad ɔny a, ùcur ɔnyn es: wɛl b’ow ɔny ɛgŋ ec’ Iy ɛlu agŋ abu ɛm." 45 Kɔ -l’irim odad a okm ɛl es sos ɛm, aŋke Nyam lɔl odad na e nyandrɛ ab es yec’ɛtŋ ke -li k’uwmn any; ɛtŋ ɛmɛny -n’am uru eke -li k’ibrm Jesu low na ec’akr otar a. 46 Sica jam ɛsɛl a am atar ów es eke k’uw ɛl ɛm ec’ɛgŋ eke k’el ɛl ec’anymu ab any. 47 Kɔ Jesu uw ɛl e tutr ab any. L’ɛsŋ iyli nyam ow inym’n es saw, 48 ɛtŋ li dad in e jam ɛsɛl a ninɛ: "Ɛgŋ ek’eb iyli na ɛm sosiɛm a, ke ɛm anake l’eb’m a; ɛtŋ ɛgŋ ek’eb’m a, eb ɛgŋ a ek’ɛrm im a yɛji. Tasi ɛm a, ɛgŋ ek’el ɔny ɛm e likekli a, in ana l’agb l’akm ɔny a." 49 Eke Jesu dad ɛbɛn a, Jan ɔdu eb dad ninɛ: "Ɛgŋ gbɛl, s’ɛkn ɛgŋ nyam eke oc ŋ e nin a am kokr juma ogŋn abŋ eŋuŋ. S’ɛdŋn in, eke l’elm ɛy ec’ɛgŋ a sosiɛm." 50 Ɛtŋ Jesu dad ninɛ: "Ɛgŋ k’ɛ́dŋn in, aŋke ɛgŋ eke ifnm ɔny a el ɔny eci." 51 Eke sɛgŋ a eke Jesu k’uyu afr a ow titm a, ca li bɛbm tasi eke li k’im Jerusalɛm. 52 L’ɛrm agŋ ikŋ’n anym. Eke ɛ́rmu a us ejagb a, -n’im -l’ok Samari eyŋ e baŋn nyam eke -li ki bɛbm ow e lís e low. 53 Kɔ ɛb eyŋ a erurm eke k’eb’r aŋke -l’erurmn eke Jwifɛl k’ɛcr ɛl ogŋ a eci im Jerusalɛm. 54 Eke jam ɛsɛl Jak lele Jan ab b’ɛkn ɛbɛn a, -li dad ninɛ: "Ɛgŋ gbɛl, kɔ erur eke si k’ɔŋ al anŋ afr ow ɛtul ɛl ee?" 55 Jesu ɛwl mɛny lɛr ɛl ɛtŋ ɛnym ɛl abr lebl tuɔtuɔ ɛm. 56 Ɛtŋ -n’im baŋn ɛjeci. 57 Eke -n’anŋn ejagb -n’aam a, ɛgŋ nyam dad Jesu ninɛ: "M’ow m’us’ŋ jam usu fɛŋ eke b’ow im a." 58 Jesu dad’r ninɛ: "Ɛkrɛ b’ɔny ɛl ec’ɔmu wus ɛm eke b’ɛru ɛm, ɔr yɛji b’ɔny ɛl e mel; kɔ ɛgŋ ec’ Iy ɔnym usu nuŋ nyam ek’ɔtu eke k’ɛru es eb sel." 59 Ɛmɛny li dad ɛgŋ ɛjeci nyam ninɛ: "Ùs’m jam." Kɔ ɛgŋ a dad’r ninɛ: "Ɛgŋ gbɛl, ɔ̀ŋ’m abusu m’ím m’oc ɛm ɛs es gbuŋ ke m’ów." 60 Kɔ Jesu dad’r ninɛ: "Yɛ̀b agŋ ek’uw abŋ ɛm a ót ɛl ec’agŋ ek’uw ab es; kɔ ŋ, ìm dad Nyam e gbreŋgbi usu a ec’odad." 61 Ɛmɛny ɛgŋ ɛjeci nyam dad’r ninɛ: "Ɛgŋ gbɛl, m’ow m’us’ŋ jam; gbɛkɔ yɛ̀b m’ím m’ibrm ɛm e gbugŋ ec’agŋ a abusu gbuŋ ke m’ów." 62 Kɔ in yɛji Jesu dad’r ninɛ: "Ɛgŋ eke b’agbr wus, ke b’ɛdŋ mɛny a, akplm Nyam e gbreŋgbi usu a eci."
