JO IBRU 11

1Niye aye ma moko gin ma dano geno, en gin ma niaŋowa maber ni, jami ma pe gineno komgi gitye. 2Pire omiyo Lubaŋa opwoyo jo macon. 3Pi niye waniaŋ ni, Lubaŋa yam oketo lobo kulu ki lokke, mumiyo gin ma nen gitiyo nia ki i kom gin ma pe nen. 4Pi niye Abel otyero gitum maber ma kato pa Kain woko bot Lubaŋa; meno omiyo gipwoye ni kite atir, kun Lubaŋa aye obedo cadenne pi gamo motte. En oto, ento pi niyene omiyo pud loko. 5Pi niye Enoka yam gitiŋo gitero woko malo wek pe obil to. Pe gimedo ki noŋone, pien Lubaŋa onoŋo doŋ otere woko. I kare ma pud peya gitere, gimiyo lok me caden i kome, ni oyomo cwiny Lubaŋa. 6Laboŋo niye pe twerre me yomo cwinye, pien ŋat ma mito nyiko cok bot Lubaŋa myero oye ni en tye ada, dok bene ni en miyo bakacic bot jo ma yenye. 7Pi niye Nua bene, ka Lubaŋa ociko en pi gin ma peya onen, owinyo doge, ka doŋ opayo yeya pi laro jo me ode. Niyene-nu omiyo kop oloyo lobo, omiyo en onoŋo kit ma atir ma bino pi niye. 8Pi niye Abraim owinyo dog Lubaŋa i kare ma olwoŋe me cito i lobo mo mukene ma onoŋo yam en mito miye ni obed mere. En oa ki i lobo tugi kun pe ŋeyo ka ma ecito iye. 9Pi niye omiyo en obedo macalo welo i lobo ma yam Lubaŋa ociko pire, macalo ebedo i lobo pa lurok, kun bedo i kema gin ki Icaka ka Yakobo, ma gin bene gimiyogi kit cikke acel-lu. 10Pien en onoŋo tye ka kuro gaŋ ca ma tye ki gutine ducu matek, ma Lubaŋa aye obedo ŋat mugoyo calle, ki lagedone kikome. 11Pi niye omiyo Cara onoŋo teko me yac, kadi bed mwaka me nywalle onoŋo doŋ okato woko. Man otimme pien en otamo ni, ŋat ma ociko-ni genne. 12Man omiyo i kom laco acel, ma yam rom ki ŋat muto, oa iye lwak likwayo mapol ata calo lakalatwe me polo, ki dok calo kweyo me dog nam ma kwanone loyo dano woko-ni. 13Jo magi ducu guto i kom niye, ma pud peya gimiyogi gin ma ceŋ Lubaŋa ociko pire, ento guneno anena ki ka mabor, gumoto ki kunnu, dok bene gutuco ni gin gibedo macalo lurok dok welo i wi lobo. 14Pien jo ma loko lok kit meno ginyuto ka maleŋ ni gitye ka yenyo lobo tugi kikome. 15Ka kono nene gubedo ka tamo pi lobo ma yam gin gua ki iye ca, kono gunoŋo yo me dok cen iye. 16Ento gin gitye ka paro pi lobo maber makato maca ca woko, en aye pacogi ma i polo. En meno gin mumiyo lewic pe mako Lubaŋa ka ce gilwoŋe ni Lubaŋagi, pien en doŋ otyeko yubo botgi gaŋ. 17Pi niye Abraim, ka yam giteme, otyero Icaka macalo gitum bot Lubaŋa; ŋat ma Lubaŋa ocikke bote oyubbe me tyero wode acel keken macalo gitum bot Lubaŋa, 18ma yam giloko pire ni, “Litino pa Icaka aye gibilwoŋogi ni likwayu.” 19En onoŋo otamo ni, Lubaŋa tye ki twero me cero dano ki i kin jo muto; dok bene gitwero waco ni Icaka odwogo i ciŋ Abraim calo oa ki i kin jo muto. 20Pi niye Icaka olamo gum i kom Yakobo ki Ecau pi kare me anyim. 21Pi niye Yakobo bene, ka doŋ to, olamo gum i kom litino pa Yucepu, kun lamo i kom latin acel acel, ma okulo wiye i wi odoo me komone, me woro Lubaŋa. 22Pi niye Yucepu, i agikki me kwone, oloko pi a pa jo Icrael ki i Ejipt, ka doŋ ociko pi kit macalo myero gibiyike kwede. 23Pi niye, ka yam ginywalo Moses, lunyodone gukane pi dwe adek kun pe gulworo cik pa kabaka, pien onoŋo guneno ni latin ca ber mada. 24Pi niye Moses, ka doŋ odoŋo, pe oye ni myero gilwoŋe ni en e wod pa nya pa Parao, 25kun oyero me neno can kacel ki jo pa Lubaŋa ma ka bedo ki yomcwiny me bal ma ri pi kare manok mo keken-ni. 26En otamo ni yet ma giciro pi Kricito obedo lonyo madit makato lonyo ducu ma tye i Ejipt, pien onoŋo ociko waŋe kun neno mot me kare me anyim. 27Pi niye Moses oa woko ki i Ejipt kun pe lworo kiniga pa kabaka; ociro matek, macalo en neno Lubaŋa ma pe nen. 28Pi niye bene omiyo en okwero nino madit me Kato, dok okiro remo, wek omi lanek litino kayo pe ogudgi. 29Pi niye jo Icrael guŋolo Nam Makwar macalo giwoto ki i wi ŋom mutwo; ento jo Ejipt gumwony woko liweŋ i nam i kare ma gin bene gutemo me kato kit meno. 30Pi niye omiyo cel me Jeriko orette opoto woko piny ma doŋ jo Icrael gurumo pi nino abiro. 31Pi niye Rakab ma obedo malaya pe oto kacel ki jo ma pe gubedo luwiny, pien onoŋo en yam ojolo lurot-piny ki kuc. 32Gin aŋo makato meno ma dok amedde me lokone? Pien kare aye bibedo nok bota me tittiwu pi Gideon, Barak, Samson, Jeputa, Daudi, Camuel ki lunebi-gu, 33ma gin bene pi niye omiyo gulwenyo ki luker me lobo mapatpat, guloyogi, gutiyo gin ma tye atir, gunoŋo gin ma yam Lubaŋa ociko pire. Gutweyo dog labwor-gu woko, 34guneko mac mager woko, gubwot ki i lak pala lucwan. Gorogi olokke odoko tekkom, gudoko jo matek i lweny, guryemo mony pa lurok woko. 35Mon gunoŋo danogi ma yam guto ma doŋ gucer woko. Jo mukene gigoyogi marac, guto kun gukwero ni pe gigonygi, wek gibicer i kwo maber makato. 36Jo mukene giŋalogi, gipwodogi, gitweyogi ki nyor ci giketogi i mabuc. 37Gicelogi ki got, giŋuno igi woko i dul aryo ki mucumeno, ginekogi ki pala lucwan. Gin guloŋo piny kun guruko laa romi ki laa dyegi, ma noŋo can oketo komgi woko, dano ounogi dok gitimogi ki tim maraco. 38Kit jo macalo meno lobo pe romo bedo kwedgi. Gubedo ka wot awota atata i tim, ki i wi godi, kun gibedo i boro ki bur mugwarre matut piny i ŋom. 39Jo magi giŋene maber pi niyegi, ento pe gumedo ki noŋo gin ma yam Lubaŋa ociko pire, 40pien onoŋo Lubaŋa oyubo gin mo maber makato kun otamo piwa, ni meno, gin pe myero gudok jo mabeco muteggi laboŋo wan.

will be added

X\