1 JO TECALONIKA 5

1Ento lok ma dok i kom kare, ki nino, utmegiwa, pe myero aco pire botwu, 2pien wun kikomwu doŋ wuŋeyo maber ni, nino pa Rwot bibino macalo lakwo ma bino i dyewor. 3Ka dano giwaco ni, “Kuc tye, piny okwe mot, gin mo marac pe,” to biturugi atura calo arem me nywal ma turu dako muyac, ka larre biloyogi woko. 4Ento wun pe wutye i piny macol, utmegiwa, ma twero miyo nino-nu turuwu atura calo lakwo. 5Pien wun ducu wubedo jo me ceŋ, jo me dyeceŋ; wan pe jo me dyewor nyo me piny macol. 6Pi meno, pe myero waninu anina macalo jo mukene, ento wabed ka neno piny kun wagwokke. 7Pien jo ma nino, ginino dyewor, jo ma mer ki koŋo gimer bene dyewor, 8ento wan jo me dyeceŋ myero wabed jo ma wagwokke. Waruku niye ki mar gubed nyonyo me geŋo korwa, waruku bene gen me larre obed tok wiwa me lweny. 9Pien Lubaŋa pe oyerowa ni kinigane opot i komwa, ento ni walarre pi Rwotwa Yecu Kricito, 10ma yam oto piwa, ni wek kadi ka waneno nyo wanino, wabibed kwo kacel kwede. 11Pi meno wucuk cwinywu kekenwu, dok wukonnye bene kekenwu wek wudoŋ i cwinywu, ŋat acel acel okony lawote me doŋo, kit macalo wutye ka timone-ni. 12Wabako dogwa botwu utmegiwa, wuwor jo ma tye ka tic i kinwu ma gicanne piwu i Rwot, kun gipwonyowu. 13Wuket deyo madwoŋ i komgi pi ticgi, dok wumargi bene. Wubed ki kuc i kinwu kekenwu. 14Dok wabako dogwa botwu, utmegiwa, wujuk jo ma balo kare laboŋo tic, wucuk cwiny jo ma cwinygi odoko nyap, wukony jo ma goro, wudi cwinywu bene i kom dano ducu. 15Wunen maber ni ŋat mo i kinwu pe ocul gin marac pi tim marac ma gitimo i kome, ento kare ducu wutem me timo ber i kinwu kekenwu ki bot jo ducu. 16Cwinywu obed yom kare ducu. 17Wuleg Lubaŋa ma pe wukeŋ. 18Wumi pwoc i kit gin ducu, pien meno aye gin ma Lubaŋa mito ki botwu i Kricito Yecu. 19Pe wugeŋ Cwiny Maleŋ me tiyo ticce i iwu, 20pe wuca bene lok ma Lubaŋa miyo bot dano me atita, 21ento wubed ki waŋ mabit me neno jami ducu; wumak gin maber matek. 22Wukwer tim maraco ducu. 23Lubaŋa kikome ma en won kuc omiwu wudok jo maleŋ i yo ducu, ogwok cwinywu ki tipowu ki komwu wek wubed laboŋo lok mo ma loyowu i kare me dwogo pa Rwota Yecu Kricito. 24Ŋat mulwoŋowu-ni genne, dok bitiyo. 25Utmegiwa, wuleg Lubaŋa piwa. 26Wumot utmego ducu ki mot me mar. 27Acikowu matek i nyiŋ Rwot ni, myero wukwan waraga man bot utmego ducu. 28Kica pa Rwotwa Yecu Kricito obed kwedwu.

will be added

X\