Seulaweut Agong 6

1Ho geunaséh até gata jijak, hei dara-dara jroh rupa? Ho geunaséh até gata jijak, mangat kamoe meusajan-sajan jak mita teuma? 2Geunaséh ulôn ka geujak u lampôh gobnyan, nibak lampôh reumpah-reumpah keu geujak rabe domba-domba u lampôh, dan geupot bungöng-bungöng bakong. 3Ulôn milék geunaséh lôn, dan gobnyan na kheueh milék ulôn, gobnyan geurabe domba-domba di teungoh-teungoh bungöng bakong. 4Gata lagak, hai maméh ulôn, lagée lagak banda Yerusalem, dan lagée ceudah banda Tirzah. Gata sunggoh teupeusona, lagée kawöm sipa-i deungon bupanji nyang na geuba sureuta. 5Paleng kheueh wajah gata nibak ulôn, sabab pandangan gata nyan sunggoh bingong nibak ulôn. Ôk di ateueh ulée gata lagée saboh kawan kaméng nyang teungoh tron nibak bukét-bukét Gilead. 6Gigo gata putéh bak lagée kawan domba nyang ban teucuko dan teupeumanö; meujudo-judo lagée aneuëk-aneuëk domba keumbeu, meusaboh pih hana nyang gadôh. 7Bibi gata lagée bôh geulima teuprah dua, nyang teusöm di balék jilbab gata. 8Bahpih na namploh droe peureumaisuri, dan lapan ploh droe gundek, dan aneuëk-aneuëk dara nyang ramé lumpah na, 9teuma saboh mantong mirah pati lôn, idaman lôn, aneuëk tunggai nyang paleng geusayang lé ma. Aneuëk-aneuëk dara geukalon dan geupujo gobnyan, dan dumna peureumaisuri dan gundek kagum ubak gobnyan. 10Soe kheueh geuhnyan nyang teuka lagée mata uroe beungoh nyang mantong meureukah, gagah lagée buleuen peunoh, ceurah lagée sang surya? Geuhnyan sunggoh meupeusona, lagée kawan sipa-i deungon bupanji nyang geuba sireuta. 11Ulôn kujak u lampôh keunari, lôn jak ngieng bungöng-bungöng keumang nyang na di miyueb leumbah; aléh bak anggô ka jimeupucok, dan bak geulima ka meubungöng. 12Ulôn lumpah that rindu nibak cinta gata, saban lagée lôn rindu keuneuk ék nibak geuritan prang meusajan deungon para bansawan. 13Meunari ngon meulikak kheueh, hai aneuëk dara Sulam, meuputa-puta kheueh, mangat kamoe kagum nibak gata. Keupeue gata keuneuk pandang nibak ulôn, seudangkan ulôn na lôn meulikak di teungoh baresan ureuëng meunonton?

will be added

X\