Zabur 27

1Zabur Nabi Daud. TUHAN na kheueh trang ulôn dan keuseulamatan lôn, hana nyang ulôn takot. TUHAN na kheueh kuta teumpat lôn meulindong, ulôn hana yo meubacut pih. 2Meunyoe lôn jiheuntam lé ureuëng jeuhet nyang keuneuk peumaté lôn, awaknyan kheueh nyang meugantoh dan reubah. 3Bahpi ulôn jikeupong lé pasokan nyang raya, teuma ulôn hana teumakot. Bahpi beureutoh prang jilawan lôn, ulôn teutab meuharab. 4Teuma sapeue nyang ulôn lakée ubak TUHAN, dan nyoe kheueh nyang ulôn harab: Tinggai teutab di Baét TUHAN simantong ulôn udeb, mangat lôn rasa pakriban gét TUHAN keu ulôn dan lôn lakée bimbéngan Gobnyan. 5TUHAN geulindong ulôn watée ulôn ka meukarat; Gobnyan geusöm ulôn didalam Baét Geuh, dan geu beuôt ulôn u ateueh gunong batée. 6Jinoenyoe ulôn ka meunang ateueh musoh nyang na bansilingka lôn; teuma deungon surak nyang meuhubo ulôn peuseumah keureubeuen syuko di Baét Droeneueh; ulôn keuneuk meuca-e dan lôn pujoe TUHAN. 7Ya TUHAN, deungoe kheueh meunyoe ulôn meulakée ubak Droeneueh, neugaséh kheueh keu ulôn dan neujaweueb kheueh lôn! 8Droeneueh meufeureuman, "Teuka kheueh jak seumah ulôn." Ulôn jaweueb, "Ulôn deungon reujang lôn teuka, ya TUHAN; 9bék kheueh neumusöm nibak ulôn." Bék kheueh neubeungéh dan neutulak hamba Droeneueh, sabab Droeneueh nyang ka neutulông ulôn. Bék kheueh neutiek atawa neutinggai ulôn, ya Allah, nyang peuseulamat ulôn. 10Bahpi ayah ngon ma geutinggai ulôn, teuma Allah teutab neupeulara ulôn. 11Neutunyok kheueh bak ulôn keuheundak Droeneueh, ya TUHAN, neubimbéng kheueh ulôn bak jalan nyang beuna, sabab musoh ulôn le lumpah na. 12Bék neujok ulôn ubak nafeusu lawan ulôn, nyang seurang ulôn deungon duseuta dan jiancam teuma. 13Ulôn yakén teuma lôn rasa keubaíekan TUHAN lam udeb lôn lam donya nyoe. 14Meuharab kheueh ubak TUHAN, peukong kheueh dan peuteutab kheueh até droeneueh; nyoe, meuharab kheueh ubak TUHAN.

will be added

X\