Zabur 21

1Keu teupimpén kor. Zabur Nabi Daud. 2Ya TUHAN, raja harok that sabab Droeneueh ka neupeukong gobnyan; gobnyan meusuka cita sabab meunang nyang Droeneueh bri! 3Droeneueh ka neupeupeunoh keuheundak até gobnyan, dan ka neubri peue nyang geulakée lé gobnyan. 4Droeneueh teuka ubak gobnyan deungon beureukat nyang meulimpah, dan neupeungui mahkota méuh ateueh ulée gobnyan. 5Gobnyan geulakée udeb, laju neubri keu gobnyan, dan panyang umu keu siumu masa. 6Sabab sinulông Droeneueh gobnyan ka jeuet keu ureuëng nyang lumpah teuhoreumat, neupeu jeuet gobnyan meusyeuhu dan meugah that. 7Neubri beureukat keu gobnyan lam tieb-tieb watée; keuhai teuka Droeneueh sampoe jeuet gobnyan peunoh deungon suka cita. 8Raja geumeuharab ubak TUHAN Nyang Mahamanyang, gobnyan sabe lam aman sabab gobnyan na kheueh geunaséh TUHAN. 9Gobnyan teuma geudrob banmandum musoh geuh, dan geuteun banmandum ureuëng nyang banci Gobnyan. 10Gobnyan teuka lagée apui nyang hu meu ble-ble keu teupeuhanco awaknyan. Awaknyan teuma teupeuhanco lé meureuka TUHAN, dan lé apui hu nyang teupeuhangoh peue nyang na. 11Nibak keuturonan awaknyan hana nyang tinggai bahpi meusaboh, raja teuma geupeutaloe awaknyan bube nyang na. 12Meunyoe awaknyan jipeuget reuncana jijak lawan raja, tipée muslihat awaknyan hana meuhase. 13Gobnyan geutimbak aneuk panah geuh, sampoe awaknyan jigisa dan jiplueng laju. 14Kamoe pujoe Droeneueh ya TUHAN, sabab rayeuk lumpah na kuasa Droeneueh, kamoe meuca-e ngon meunyanyoe sira kamoe pujoe keupeukasaan Droeneueh.

will be added

X\