Zabur 101

1Zabur Nabi Daud. Ulôn keuneuk meuca-e keuhai keuseutiaan dan keuadelan, keu Droeneueh, ya TUHAN, ca-e puja dan pujoe lôn! 2Ulôn keuneuk kalon cara udeb nyang hana meucupa. Pajan kheueh Droeneueh neuteuka ubak ulôn? Ulôn keuneuk udeb suci di rumoh ulôn, 3keujeuhetan hana ulôn peubiyeu. Ulôn banci nibak buet ureuëng murtad, dan hana lôntem meu urosan deungon awaknyan. 4Ulôn hán lôntem peubuet curang dan hán lôntem rhoh jampu bak buet nyang jeuhet. 5Ureuëng nyang galak ba peusuna deungon cara seungab-seungab ureuëng nyan ulôn peubinasa. Ureuëng nyang sombong dan manyang até ureuëng nyang lagée nyan hana ulôn peubiyeu. 6Ulôn galak ubak ureuëng nyang seutia ubak Po teu Allah; ureuëng nyang lagée nyan jeuet jitinggai di baét ulôn. Ureuëng nyang udeb lam keuadaan gleh hana meucupa ureuëng nyang lagéenyan jeuet jipeutimang ulôn. 7Ureuëng teumipée hana jeuet jitinggai di baét ulôn; ureuëng nyang galak sulet jihnyan hana meuteun dikeue ulôn. 8Phon nibak uroe ubak uroe ulôn peuhanco ureuëng-ureuëng jeuhet nyang na di nanggroe nyoe. Banmandum ureuëng nyang jipeubuet buet nyang jeuhet ureuëng nyan ulôn sampôh gleh nibak Banda TUHAN.

will be added

X\