Hakém-Hakém 20

1Dan teuka kheueh banmandum umat Israel nibak daerah Dan di utara sampoe u Bersyeba di seulatan, dan Gilead di timu, keu meurumpok ubak teumpat teumawök nyan. Awaknyan meusapat dan meusaho di Mizpa dikeue TUHAN. 2Banmandum nyan na 400.000 droe tantra nibak pasokan nyang jak ngon gaki. Peumimpén-peumipén nibak tieb-tieb sukée bansa Israel teuka cit keunan. 3- 4Óh lheueh nibaknyan di ureuëng-ureuëng nibak sukée Benyamin ka jideungoe bahwa banmandum ureuëng Israel nyang laén ka geumeugumpôi di Mizpa. Dan jiteumanyong kheueh lé ureuëng-ureuëng Israel nyan ubak ureuëng Lewi nyang selir jih ka jipoh maté nyan, "Ci gata peugah ubak kamoe pakriban buet nyang jeuhet nyan jeuet na!" Geujaweueb lé ureuëng Lewinyan, "Ulôn ngon gundek ulôn nyan kamoe piôh sikeujab di Gibea di dalam wilayah Benyamin dan kamoe mudom disinan. 5Óh lheuehnyan teuka kheueh ureuëng-ureuëng Gibea ubak kamoe bak watée malam uroe jijak mita ulôn. Awaknyan laju jikeupông rumoh teumpat kamoe mudom nyan deungon meukeusut awaknyan jikeuneuk poh maté ulôn, teuma óh lheuehnyan awaknyan laju jipeukosa gundek ulôn sampoe án maté. 6Lé ulôn laju ulôn cok manyét nyang ka maté nyan dan ulôn koh-koh laju óh lheueh nyan ulôn kirém ubak ban dua blaih boh sukée bansa geutanyoe maséng-maséng sikrak. Ulôn peubuet hai nyang lagéenyan sabab ureuëng Gibea nyan ka jipeubuet nyang jeuhet dan lumpah malée bala nyan keunong u ateueh bansa Israel. 7Gatanyoe banmandum nyang na disinoe na kheueh bansa Israel. Jadi jinoenyoe hainyan ulôn lakée peudapat nibak gata banmandum!" 8Deungon sireuntak ureuëng-ureuëng Israel nyang na meugumpôi di teumpat nyan laju jidong dan jipeugah, "Geutanyoe banmandum hana nyang jeuet nyang woe ubak khimah maséng-maséng atawa u rumoh droe. 9Nyoe kheueh nyang geutanyoe peubuet: Geutanyoe tatiek undi mangat teupeuteuntée ureuëng-ureuëng nyang harôh jijak prang Gibea. 10Siper siploh nibak banmandum ureuëng agam bansa Israel harôh jipeuna peunajoh keu awaknyan nyang jak meuprang. Nyang laén laju jijak prang Gibea mangat teuhuköm awaknyan sabab buet nyang jeuhet nyang ka awaknyan peubuet lamkawan umat Israel." 11Meunan kheueh cara jih umat Israel ka jimeusaboh keu jijak prang Gibea. 12Óh lheueh nyan lé ureuëng Israel laju jikirém bubena ureuëng gobnyan u dalam wilayah sukée Benyamin keu jijak peusampoe haba nyoe: "Keujeuhetan peue nyang ka teujadi u ateueh gatanyoe? 13Gata seurah kheueh banmandum ureuëng-ureuëng jeuhet nyang beujat di Gibea nyan ubak kamoe mangat awaknyan kamoe poh maté dan deungon na nyang lagéenyan kamoe ka kamoe sampôh buet nyang jeuhet nyan lamkawan bansa Israel." Teuma ureuëng Benyamin hana jipako peue nyang ka jipeu ingat lé ureuëng Israel nyang laén nyan. 14Malah banmandum banda nyang na di dalam wilayah Benyamin nyan dan ureuëng-ureuëng Benyamin jijak u Gibea keu jijak meuprang ngon ureuëng-ureuëng Israel nyang laén nyan. 15- 16Bak uroenyan awaknyan laju meusapat nibak banda-banda jihnyan na 26.000 droe tantra. Dan disampéng nyan teuma na cit peunduduek Gibea ka teuma meusapat 700 droe ureuëng nyang teupiléh dan teulatéh. Banmandum ureuëng jawie nyang gét that campen jiseumeurhom ngon batée ngon cara jipeuguna lagée ali-ali. Meunyoe awaknyan jigeulawa ngon ali-ali nyan, pasti keunong dan hana mieh meubacut pi. 17Blaih ureuëng Israel nyang laén pi ka teuma meusapat 400.000 droe tantra nyang ka teulatéh. 18Tantra umat Israel nyan jijak laju ubak teumpat iébadat di Betel, dan jiteumanyong ubak Po teu Allah, "Ya TUHAN, sukée toh kheueh lamkawan kamoe nyang harôh kamoe jak prang ureuëng Benyamin nyan?" TUHAN geujaweueb, "Sukée Yehuda." 19Óh singoh beungoh nyan beurangkat kheueh laju awaknyan dan laju jipeudong khimah to ngon banda Gibea. 20Awaknyan laju jipeudong baresan angkatan prang jih meuhadab keue ngon banda nyan, dan laju jiprang. 21Dan bubena angkatan prang Benyamin nyan laju jiteubiet ngon jijak prang awaknyan óh lheueh nyan tantra Israel maté na 22.000 droe nibak uroenyan. 22- 23Sabab ka taloe nyan, jijak kheueh laju ureuëng Israel nyan ubak teumpat iébadat óh trok keunan laju jimo ba-e ubak TUHAN disinan sampoe án malam. Awaknyan jiteumanyong, "TUHAN, peu kheueh kamoe harôh kamoe jak meuprang lom ngon syedara-syedara kamoe ureuëng-ureuëng Benyamin nyan?" Geujaweueb lé TUHAN, "Nyoe, jak kheueh laju." Lé sababnyan angkatan prang Israel kana seumangat lom, sampoe awaknyan jiatoe lhom pasokan jihnyan lagée bak uroe nyang phon. 24Keu nyang keudua jih awaknyan jijak prang angkatan prang Benyamin nyan. 25Dan keu nyang keu dua teuma ureuëng-ureuëng Benyamin nyan jiteubiet jijak seurang awaknyan. Goenyan awaknyan jipoh maté teuma na l8.000 droe tantra nyang teulatéh nibak angkatan prang Israel. 26Dan jijak kheueh lom ureuëng Israel nyan u Betel laju jijakmoe ba-e ubak TUHAN. Disinan awaknyan jipuasa sampoe án malam uroe dan jipeuseumah keureubeuen peudamé dan keureubeuen nyang teutot keu TUHAN. 27- 28Bak watéenyan Peuto Peujanjian Po teu Allah na di Betel, dan Pinehas aneuëk Eleazar, cucoe Nabi Harun, meutugaih sibagoe teungku imeum. Dan jitanyong kheueh lé umat Israel ubak TUHAN, "TUHAN, peu kheueh kamoenyoe kamoe jak prang lom syedara-syedara kamoe ureuëng-ureuëng Benyamin nyan, atawa peu kheueh harôh kamoe peupiôh meuprang nyoe?" Geujaweueb lé TUHAN, "Seurang kheueh awaknyan! Singoh beungoh Ulôn teuma Lôn peumeunang gata." 29Watée jideungoe jaweueb TUHAN nyan, di ureuëng Israel laju jikeubah tantra gobnyan nibak teumpat-teumpat nyang teusöm ban sikeulileng Gibea. 30Dan nibak uroe nyang keulhée awaknyan jijak maju ngon jijak eungkoe angkatan prang Benyamin, deungon sinuson angkatan nyan teutab lagée nyang ka-ka meuhadab u Gibea lagée nyang ka jipeubuet nibak uroe-uroe sigohlom nyan. 31Meunan cit ngon ureuëng-ureuëng Benyamin jijak seureubu cit u ateueh pasokan Israel, dan awaknyan teupanceng keu jitem teubiet nibak banda. Lagée nyang ka lheueh-lheueh, awaknyan ka jipoh dumna ureuëng Israel dalam padang raya diluwa banda nibak rot ueh nyang teutuju u Betel dan meunan cit nibak rot ueh nyang teutuju u Gibea. Lhée ploh droe tantra Israel bak watéenyan teupoh maté. 32Lé sababnyan lé ureuëng Benyamin jisangka awaknyan ka geupeutaloe ureuëng Israel lagée nyang ka-ka. Teuma tantra Israel ka na reuncana awaknyan jikeuneuk surot mangat teupanceng lom tantra Benyamin nyan u jalan-jalan raya, jiôh nibak banda. 33Bak watée pasokan inti Israel nyan jisurot, dan jisuson baresan lom di Baal-Tamar, ureuëng-ureuëng awaknyan nyang jipeuteumpat bansikeulileng Gibea, deungon meugagéeh dan bagaih-bagaih jiteubiet nibak teumpat awaknyan jimusöm di daerah luwa banda. 34Awaknyan na kheueh ureuëng-ureuëng peuniléh nibak ban saboh nanggroe Israel; jeumeulah jih na 10.000 droe. Dan teujadi kheueh prang nyang lumpah hibat bak watée tantra nyang 10.000 droe nyan jijak keupông Gibea. Ureuëng-ureuëng Benyamin meubacut pi hana jisangka bahwa droe jihnyan hana treb le teuma taloe. 35TUHAN geubri keu ureuëng Israel meunang ateueh ureuëng Benyamin, sampoe nibak uroenyan ureuëng Israel ka meuhase jipoh maté na 25.100 droe tantra Benyamin. 36Barô kheueh lé ureuëng Benyamin jisada bahwa jihnyan ka taloe. Pasokan inti Israel nyan deungon jisaja ka jipeuplueng droe nibak ureuëng-ureuëng Benyamin sabab awaknyan jipeubangga aneuëk buah jihnyan di teumpat-teumpat nyang teusöm ban keulileng Gibea. 37Ureuëng-ureuëng nyang teungoh jimusöm nyan bagaih-bagaih jitamong jijak seureubu Gibea; awaknyan laju meutabu hoho mantong bansaboh bandanyan dan jipoh maté banmandum ureuëng nyang na disinan. 38Teuma awaknyan ka sipakat leubeh ilée meunyoe na asab teubai nyang teungoh meukeubok u ateueh bak teungoh-teungoh banda, 39pasokan inti nyang teungoh jisurot harôh jibalek jijak prang musoh. Bak watée nyan ureuëng-ureuëng Benyamin ka jipoh maté kira-kira na lhée ploh droe tantra Israel dan jisangka lé awaknyan jihnyan ka jipeutaloe ureuëng-ureuëng Israelnyan lagée nyang ka jipeubuet yoh awaiphon. 40Teuma na siatnyan mantong asab ka meukeubok u ateueh di teungoh-teungoh banda Gibea nyan. Ureuëng-ureuëng Benyamin gét that teukeujot watée awaknyan jipaleng ulikot dan jikalon laju banmandum banda awaknyan ka habéh tutong. 41Dan bak watée nyan cit teuma pasokan inti Israel jigisa laju jijak seurang, dan bubena tantra Benyamin nyan ka habéh mumang sabab awaknyan ka sada bahwa awaknyan ka pasti taloe. 42Lé sababnyan, awaknyan laju jiplueng nibak ureuëng-ureuëng Israel jituju u padang pasi, teuma bahpi keunan awaknyan jipeuplueng droe teuma teutab hana hase lheueh. Awaknyan ka teukeupông lamkawan pasokan inti Israel dan pasokan nyang teungoh teuka nibak jurosan banda. Ureuëng Benyamin meudeurita taloe nyang lumpah hebat. 43Ureuëng-ureuëng Israel laju jipong dan jitiyeub awaknyan hana piôh-piôh sampoe trok ubak saboh teumpat disiblaih utimu Gibea. Sira jitiyeub, awaknyan pi jipoh maté 4418.000 droe tantra nyang teulatéh nibak angkatan prang Benyamin. 45Tantra Benyamin nyang laén nyan laju jigisa dan jiplueng bansalamle meulalu daerah padang pasi jituju ubak gunong-gunong batée di Rimon. Na 5.000 droe lamkawan awaknyan keunong poh maté diteungoh rot ueh raya. Seudangkan nyang laén nyan jipeucrok laju sampoe u Gideom. Nibak ureuëng nyan na teuma 2.000 droe nyang teupoh maté. 46Deungon nyan, tantra Benyamin nyang teupoh maté nibak uroenyan na 25.000 droe -- banmandum nyan na kheueh tantra nyang gagah beurani. 47Teuma lamkawan awaknyan nyang jiplueng liwat rot padang-padang pasi jituju ubak gunong-gunong batée di Rimon na teuma 600 droe nyang lheueh. Awaknyan tinggai di Rimon na peuet beuleuen treb jih. 48Óh lheuehnyan ureuëng Israel jigisa lom laju jijak prang dan jipoh maté mandum ureuëng Benyamin nyang na tinggai sidroe sapat -- agam, inong, aneuëk manyak meunan cit deungon beulatang peulara jih. Banmandum banda nyang na didaerahnyan jitot ngon apui.

will be added

X\