Yudas 1

1Syedara-syedara nyang ka geutawök dan that-that geugaséh lé Allah Bapak, dan jijaga keu Isa Almaseh. Sibagoe hamba Isa Almaseh, ulôn -- Yudas -- syedara nibak Yakobus, 2meuharab: Seumoga Allah geubri beureukat, rakhmat dan seujahteura u ateueh gata ngon meulimpah-limpah. 3Syedara-syedara nyang lôn cinta! Ulôn biet-biet ngon meukeusut lôn tuléh surat keu gata keuhai keuseulamatan nyang ka tarasa meusajan geutanyoe. Teuma jinoenyoe ulôn teurasa keu lôn peuingat gata ngon surat nyoe mangat gata teutab meujuang keu iman gata nyang ka geubri sigoe nyan lé Allah keu siumu masa bak umat Gobnyan. 4Sabab ngon hana tasada, na okeunum-okeunum ka teuntée nyang jipeurhoh droe lamkawan geutanyoe. Awaknyan ureuëng-ureuëng jeuhet nyang jiputa balek haba keuhai rakhmat Allah tanyoe, keujiteumé keuseumpatan jipeupuih hawa nafeusu awaknyan. Dan awaknyan hana jiaku Isa Almaseh, sibagoe sidroe tok nyang meukuasa dan Tuhan geutanyoe. Yoh awaikon huköman keu awaknyan ka lheueh teutuléh lam Alkitab. 5Banmandum nyan ka gata teupeue. Teuma ulôn teutab lôn peuingat bak gata keuhai pakriban Tuhan geupeuseulamat umat Israel nibak nanggroe Meusé, teuma óh lheueh nyan geupoh maté ureuëng-ureuëng nyang hana jipatéh lamkawan awaknyan. 6Ingat kheueh teuma bak malaikat nyang jilewat bataih kuasa awaknyan, akhé jih jijak jitinggai teumpat tinggai awaknyan keudroe. Allah geuranté malaikat-malaikat nyan ngon ranté nyang keukai, bak teumpat nyang seupôt dimiyueb bumoe. Nibak teumpat nyan awaknyan teutab teuteun sampoe trok ubak huköman teupeu rhot ateueh awaknyan nibak Uroe nyang luwabiasa nyan teuma. 7Ingat kheueh banda Sodom dan Gomora meunan cit banda-banda nyang na bak-bak binéh nyan, nyang peunduduek disinan jipeubuet hai-hai lagée nyang jipeubuet lé malaikat-malaikat nyan. Awaknyan jipeubuet hai-hai nyang cabui dan beujat, akhé jih awaknyan teuseksa ngon huköman apui nyang keukai, sibagoe peuingat keu mandum manusia. 8Meunan cit ngon okeunum-okeunum nyan sabe jimeukhayal sampoe awaknyan jipeugét desya ateueh tuboh jih keudroe. Awaknyan jipandang miyueb that keukuasaan Po teu Allah dan jihina bubena makhlok nyang mulia nyang na lam syeuruga. 9Malaikat Mikhael keudroe, nyang jeuet keu ulée kawan bubena malaikat-malaikat, hántom na geupeubuet lagée nyan bagoe. Bak watée gobnyan geumeudakwa ngon Iblih keuhai soe nyang hak ateueh manyét Nabi Musa, malaikat Mikhael hana geujeuet geuhuköm Iblih ngon tutoe haba nyang meuhina. Teuma nyang geupeugah lé Mikhael na kheueh, "Tuhan teuma geudôt gata!" 10Teuma ngon cara jihina-hina lagée nyan, dumna awaknyan laju jiseurang peue-peue mantong nyang hana jimuphom. Awaknyan saban lagée dumna beulatang nyang hana meuakai, nyang jiteupeue hai-hai ngon pikeran jih mantong. Teuma lé hai-hai nyan kheueh nyang jeuet keusabab awaknyan hanco. 11Mupaloe that awaknyan! Awaknyan ka jicok rot nyang jijak lé Kain. Mangat meuteumé péng, awaknyan jipeurhot droe lam ceurucong nyang sisat, sabab lagée Bileam. Dan awaknyan pih teupeuhanco sabab meubeurontak saban lagée Korah. 12Bak watée gata teungoh tapeuna khanuri, sikeub awaknyan biet luwat that-that watée takalon lamkawan gata. Sabab awaknyan jimakheun ngon leuha lumpah na biet hana malée-malée, nyang jipeupeunteng na kheueh droe jih keudroe. Awaknyan lagée awan nyang jiba lé angén, teuma awan nyan hana jipeutreun ujeuen. Meunan cit awaknyan lagée bak kayée nyang hana meuhase jimuboh bah pih watée nyan teungoh musém boh kayée; bak kayée nyang teubot ukeue jih dan ka maté banmandum. 13Saban lagée gulumbang nyang hebat lam laôt nyang jipeuteubiet kuboh, meunan cit awaknyan jipeukuboh buet-buet jih nyang keubiet that-that malée. Awaknyan na kheueh lagée bintang-bintang nyang jijak bansaboh langét dan keu awaknyan ka geukeubah teumpat jih lé Allah nibak teumpat nyang paleng seupôt keu siumu masa. 14Henokh, keuturonan keu tujoh nibak Nabi Adam, yoh masa ilée ka lheueh geupeugah keuhai ureuëng-ureuëng nyan. Geupeugah lé Henokh, "Kalon, Tuhan teuma teuka ngon meuribée-ribée malaikat nyang suci 15keugeujak peuhakém banmandum manusia. Tuhan teuma geuhuköm ureuëng-ureuëng jeuhet sabab buet-buet awaknyan nyang beujat. Dan Gobnyan teuma geuhuköm ureuëng meudesya ngon doraka sabab mandum tutoe haba meuhina nyang jipeugah." 16Ureuëng-ureuëng nyan sabe-sabe lam keuadaan tunu sira jipeusalah ureuëng laén. Awaknyan udeb meunurot peue-peue nyang jikheun lé awaknyan keudroe nyang peunoh ngon desya. Awaknyan jipeu mbong-mbong droe ngon haba nyang sulet, dan jilieh ureuëng laén keujiteumé laba. 17Teuma Syedara-syedara lôn nyang teucinta, ingat kheueh ubak peue nyang ka geupeugah lé rasui-rasui Tuhan tanyoe Isa Almaseh. 18Awaknyan leubeh ilée geupeugah ubak gata watée ka tho akhé jamén teuma teuka ureuëng-ureuëng nyang jihina gata, na kheueh ureuëng-ureuëng nyang udeb meunurot peue-peue nyang jikheun lé até awaknyan nyang meudesya. 19Awaknyan nyoe kheueh ureuëng-ureuëng nyang jipeuteuka mucrebre ateueh manusia laén. Awaknyan hana jikuasa lé Roh Allah, teuma lé peue-peue nyang meuheuét lé tabiát donya. 20Teuma gata, Syedara-syedara lôn, peusaneut kheueh laju udeb gata ngon dasai jih iman gata ubak Isa Almaseh. Iman gata nyan suci lumpah na. Dan meudoá kheueh sabe ngon kuasa Roh Allah, 21dan udeb kheueh sabe lam lindongan gaséh Po teu Allah seumantong gata preh-preh rakhmat Isa Almaseh Tuhan tanyoe, nyang teuma geubri keu gata udeb seujati dan keukai. 22Keu ureuëng-ureuëng nyang waih-waih até jih, bah kheueh gata tatunyok gaséh sayang. 23Tarek kheueh ureuëng beujiteubiet lam apui keuteupeu seulamat awaknyan. Meunan cit ateueh ureuëng-ureuëng laén bah kheueh gata tatunyok gaséh sayang meusajan ngon peurasaan teumakot, teuma banci kheueh bah pih nyan peukayan awaknyan keudroe nyang ka jipeukuto ngon desya. 24Po teu Allah, nyang hase jaga mangat gata bék rhot, dan nyang hase ba gata ubak hazirat Gobnyan nyang mulia ngon sukacita lom hana meucupa, 25Gobnyan kheueh sidroe sagai Allah, Peuseulamat tanyoe meulalu Isa Almaseh Tuhan tanyoe. Gobnyan kheueh Allah nyang mulia, agong, meukuasa dan meuwibawa yoh awai ilée trok án jinoe dan keu siumu masa! Amin.

will be added

X\