Yahya 4

1Ureuëng-ureuëng Farisi jideungoe bahwa Isa leubeh jai geupumanö ureuëng nibak Nabi Yahya. ( 2Nyang sibeuna jih Isa keudroe hana geupumanö lé murit-murit Gobnyan.) 3Watée Isa geuteupeue bahwa ureuëng-ureuëng Farisi ka jideungoe hai nyan, gobnyan geutinggai Yudea laju geugisa u Galilea. 4Bak watée geugisa nyan gobnyan harôh geujak rot Samaria. 5Teuma trok laju Isa bak saboh banda di Samaria nyang nan banda nyan Sikhar, hana padub na jiôh nibak tanoh nyang yoh ilée geubri lé Nabi Yakub keu aneuëk gobnyan Nabi Yusuf. 6Disinan na meuteumé mon Nabi Yakub. Isa hék that-that sabab bak geujak nyan, sababnyan kheueh gobnyan geuduek bak binéh mon. Watéenyan kira-kira poh dua blaih uroe. 7- 8Dan murit-murit Isa ka geujak u banda keu jijak bloe peunajoh. Óh lheueh nyan na sidroe ureuëng inong Samaria teuka bak mon nyan keu jijak crông ié. Isa geupeugah bak inong nyan, "Mak, peu kheueh jeuet Lôn lakée jieb ié?" 9Jijaweueb lé ureuëng inong Samaria nyan, "Teungku ureuëng Yahudi, di ulôn nyoe ureuëng Samaria; pakon teungku lakée jieb ié bak ulôn?" (Sabab ureuëng-ureuëng Yahudi hana hubongan ngon ureuëng Samaria.) 10Geujaweueb lé Isa, "Meunyoe droeneueh neuteupeue meuneubri Allah dan soe nyang meulakée jieb ié bak Droeneueh, pasti droeneueh keudroe nyang lakée jieb ié bak ureuëng nyan, dan Gobnyan teuma geubri keu droeneueh ié udeb." 11Kheun ureuëng inong nyan, "Teungku hana meutima, dan mon nyoe lhok lumpah na. Dipat Teungku meuteumé ié udeb? 12Nabi Yakub, bapak indatu kamoe, geubri bak kamoe mon nyoe. Gobnyan keudroe nyang cok ié mon nibak teumpat nyoe; meunan cit teuma ngon aneuëk-aneuëk gobnyan dan beulatang peulara gobnyan. Peue kheueh Teungku pike teungku leubeh rayeuk nibak Nabi Yakub?" 13"Ureuëng nyang jieb ié nyoe teuma jiteuka glaih lom," geupeugah lé Isa, 14"teuma ureuëng nyang jijieb ié nyang teuma Ulôn bri, ureuëng nyan hana teuma glaih le siumu masa. Sabab ié nyang Ulôn bri nyan jeuet keu mata ié lam tuboh ureuëng nyan nyang jiteubiet uluwa dan teubri bak ureuëng nyan udeb seujati dan keukai." 15Kheun ureuëng inong nyan, "Teungku, neubri kheueh keu ulôn ié nyan, mangat ulôn hana glaih le; dan hana peureulée le lôn riwang keunoe keu lôn jak crông ié." 16"Jak kheueh, tawök lakoe droeneueh, dan gisa kheueh keunoe," kheun Isa. 17"Ulôn hana meulakoe," Jaweueb inong nyan. "Keubiet beutôi lagée kheun droeneueh," geupeugah lé Isa. 18"Sabab droeneueh ka tameukawen limong go, dan ureuëng nyang udeb meusajan ngon droeneueh bak saát nyoe bukon lakoe droeneueh " 19"Jinoenyoe barô kheueh lôn teupeue bahwa teungku sidroe Nabi," jipeugah le inong nyan. 20Indatu kamoe geuseumah Allah bak bukét nyoe, teuma bansa teungku jipeugah bahwa di Yerusalem mantong kheueh teumpat ureuëng jiseumah Allah." 21"Peucaya kheueh," kheun Isa bak ureuëng nyan, "bak saboh watée manusia teuma jiseumah Bapak, hana le nibak bukét nyoe, dan bukon teuma di Yerusalem. 22Droeneueh ureuëng Samaria neuseumah nyang hana neuturi, seudangkan kamoe ureuëng Yahudi kamoe seumah Gobnyan nyang kamoe turi, sabab keuseulamatan teuka nibak ureuëng Yahudi. 23Teuma watée jih keubiet teuka, ka teuka, bahwa ngon kuasa Roh Allah manusia teuma jiseumah Bapak sibagoe Allah nyang beutôi nyang geuharab lé Bapak. 24Sabab Allah nyan Roh, teuma ngon kuasa Roh Allah manusia hase jiseumah Bapak lagée toh Gobnyan na. 25Ureuëng inong nyan jipeugah bak Isa, "Ulôn kuteupeue Raja Peuseulamat (nyang teupeugah Almaseh) teuma teuka. Meunyoe Gobnyan teuka, Gobnyan teuma geupeugah bak geutanyoe." 26"Ulôn kheueh nyan," jaweueb Isa, "Ulôn nyang saát nyoe teungoh meututoe ngon droeneueh." 27Bak watée murit-murit Isa ka geugisa. Awaknyan hireuen watée jikalon Isa geupeugah haba ngon sidroe ureuëng inong. Teuma hana meusidroe pih lamkawan awaknyan nyang jiteumanyong bak inong nyan, "Peue nyang mak peureulée?" atawa nyang teumanyong bak Isa, "Pakon Bapak neumeututoe ngon inong nyan?" 28Dan ureuëng nyan laju jitinggai teumpat nyan dan laju jiplueng lam banda óh trok keudeh laju jipeugah bak ureuëng-ureuëng nyang na lam banda nyan, 29"Jak takalon ureuëng nyang peugah bak ulôn peue-peue mantong nyang ka lheueh ulôn peubuet. Peu kheueh mungken Gobnyan Raja Peuseulamat?" 30Dan ureuëng nyan pih laju jitinggai banda jihnyan jijak laju ubak Isa. 31Bak watée nyan murit-murit Isa geupakat gobnyan mangat Isa geutem makheun, "Bapak Gurée," kheun awaknyan, "Neumakheun laju." 32Teuma geujaweueb lé Isa, "Na peunajoh bak Ulôn, nyang hana gata teupeue." 33Dan murit-murit Gobnyan laju jiteumanyong sabe keudroe-droe, "Peu kheueh ureuëng laén nyang ba peunajoh keu Gobnyan?" 34Laju geupeugah lé Isa, "Peunajoh Ulôn na kheueh teuseutôt keuheundak Gobnyan nyang utus Ulôn, dan teupeuseuleusoe buet nyang ka geujôk bak Ulôn. 35Gatanyoe tapeugah, 'Peuet buleuen teuk musém mupot.' Teuma Ulôn peugah bak gata: Ngieng lam blang-blang nyang kunéng pade, ka siab keu teupot! 36Ureuëng nyang mupot ka jipeuphon teurimong upah jih dan jipeusapat hase keu udeb nyang seujati dan keukai. Teuma nyang teumabu dan ureuëng nyang mupot jeuet udeb mumangat-mangat ngon gobnyan. 37Pribasa nyoe beutôi cit, 'Nyang sidroe tukang pula, dan nyang laén nyang pot.' 38Ulôn yue bak gata tajak mupot u blang nyang hana gata peubuet; ureuëng laén ka jimubuet disinan, dan gata tateurimong laba nibak buet awaknyan." 39Jai that-that ureuëng Samaria peunduduek banda nyan meuiman bak Isa, sabab ureuëng inong nyan jipeugah, 'Gobnyan geupeugah bak ulôn peue-peue mantong nyang ka lheueh ulôn peubuet.' 40Teuma, watée ureuëng-ureuëng Samaria nyan meurumpok ngon Isa, awaknyan jilakée ngon meuharab that mangat Gobnyan geutem tinggai ngon awaknyan. Teuma Isa tinggai bak teumpat nyan dua uroe treb jih. 41Óh lheuehnyan leubeh jai lom ureuëng nyang meuiman bak Isa sabab peue nyang geupurunoe keudroe bak awaknyan. 42Awaknyan jipeugah bak ureuëng inong nyan, "Kamoe ka kamoe meuiman nibak saát nyoe, kon le sabab peue nyang ka gata peugah bak kamoe, sabab kamoe keudroe pih ka kamoe deungoe Gobnyan, dan kamoe teupeue bahwa Gobnyan na kheueh Nyang Peuseulamat donya." 43Óh ka lheueh dua uroe tinggai di Sikhar, Isa geujak teuma u Galilea. 44Isa keudroe ka geupeugah, "Sidroe Nabi hana jihoreumat di nanggroe jih keudroe." 45Teuma watée Gobnyan ka trok u Galilea, ureuëng-ureuëng nyang na disinan jisambot Gobnyan ngon galak até, sabab awaknyan na di Yerusalem watée Uroe Raya Paskah, dan ka jikalon mandum nyang geupeubuet lé Isa. 46Óh lheuehnyan Isa geugisa lom u Kana di Galilea, bak teumpat Gobnyan ka lheueh geu-ubah ié jeuet keu ié anggô. Lam banda nyan na sidroe peugawée peumeurintah, aneuëk ureuëng nyan teungoh sakét brat di Kapernaum. 47Watée ureuëng nyan jideungoe bahwa Isa ka teuka u Galilea nibak Yudea, ureuëng nyan laju jijak bak Isa dan jilakée Gobnyan beugeutem jak u Kapernaum mangat geutem peupuléh aneuëk Gobnyan nyang karab maté. 48Isa geupeugah bak peugawée peumeurintah nyan, "Meunyoe gatanyoe hana takalon buet-buet nyang ajaéb, gata hana tapatéh." 49"Teungku," kheun peugawée peumeurintah nyan, "bubagaih kheueh neujak sigohlom aneuëk ulôn maté." 50Geupeugah lé Isa bak ureuëng nyan, "Jakwoe kheueh laju, aneuëk gata ka puléh." Ureuëng nyan jipatéh peue nyang geupeugah lé Isa, laju ureuëng nyan jijak. 51Bak teungoh rot ueh, peulayan-peulayan ureuëng nyan jijak bak ureuëng nyan sira jipeugah lagéenyoe, "Aneuëk Teungku ka puléh." 52Laju peugawée nyan jitanyong bak awaknyan poh padub aneuëk nyan phon puléh. Awaknyan jijaweueb, "Kira-kira poh sa cot uroe deumam jih gadôh." 53Laju ayah aneuëk nyan teuingat peue nyang ka geupeugah lé Isa bunoe, "Aneuëk gata puléh." Teuma peugawéenyan meunan cit banmandum keuluwarga jih meuiman ubak Isa. 54Nyan kheueh buet ajaéb nyang keudua nyang geupeubuet lé Isa di Galilea óh ka lheueh Gobnyan teuka nibak Yudea.

will be added

X\