Ezra 9

1Óh ka seuleusoe banmandum nyan teupeubuet, na meupadubdroe ureuëng-ureuëng patot nibak bansa Israel jijak meuhadab ubak ulôn. Awaknyan jipeugah bahwa rakyat Israel, meunan cit deungon teungku-teungku imeum, dan ureuëng-ureuëng Lewi hana jipeuaséng droe nibak bansa-bansa nyang na tinggai di bansilingka nyan, awaknyan na kheueh bansa Amon, Moab, Meusé, Kanaan, Het, Feris, Yebus dan Amori. Dan di teungku imeum dan ureuëng-ureuëng Lewi pi lagéenyan cit jipeubuet. Awaknyan banmandum jipeubuet buet-buet nyang hina nyang jipeubuet lé bansa-bansa teukutok nyan. 2Ureuëng agam nibak bansa Yahudi jimeukawen deungon ureuëng inong bansa laén, sampoe umat nyang ka geupeukhusos milék TUHAN ka hana aseuli le. Nyang paleng parah lom na kheueh nyang awai that jipeuphon buet lagéenyan na kheueh ureuëng-ureuëng patot dan peujabat Israel. 3Ban lôn deungoe hai lagéenyan, ulôn keubit that banci dan seudeh sampoe ulôn priek-priek peukayan ulôn dan ulôn lot ôk dan janggot ulôn, óh lheuehnyan laju ulôn duek deungon até nyang hanco. 4Ulôn teutab lôn duek nyang lagée nyan sampoe nibak gob jak peuseumah keureubeuen bak watée seupôt uroe. Óh lheuehnyan teuka kheueh ureuëng ramé jijak dong di silingka ulôn. Awaknyan banmandum teumakot sabab teuingat ubak ancaman Allah Israel ateueh desya ureuëng-ureuëng nyang ka jiriwang nibak teumpat nyang teuböih nyan. 5Nibak watée keureubeuen seupôt uroe ka jipeuphon peuseumah, barô kheueh ulôn beudôh nibak teumpat ulôn meuseudeh nyan, dan deungon peukayan nyang ka beukaih-beukaih, laju ulôn sujut dan ulôn sunyung jaroe ubak TUHAN Allah ulôn. 6Ulôn kheun, "Ya, Allah ulôn, ulôn nyoe keubit that malée ulôn beuôt ulée ulôn dikeue Droeneueh. Desya kamoe ka meutumpok-tumpok di ateueh ulée kamoe, ya TUHAN, sampoe ka meusampôh u langét manyang. 7Phon nibak zamén indatu kamoe sampoe án jinoe, kamoe umat Droeneueh nyoe lumpah that raya desya ubak Droeneueh. Nyang kheueh sabab jih dikamoe nyoe, bubena na raja dan bubena teungku imeum kamoe ka jipeutaloe lé raja-raja nanggroe aséng. Kamoe jipoh maté, jireupah dan jiangkot sibagoe ureuëng nyang teuteun. Kamoe ka jipeuhina hana reuda, lagée nyang ka teujadi nibak uroenyoe. 8Teuma bak saát nyoe, ya TUHAN Allah kamoe, Droeneueh banmantong neupeumurah até keu kamoe. Droeneueh ka neupeu beubaih na meupadubdroe lamkawan kamoe nyang ka jipeujeut keu namiet mangat hase kamoe udeb deungon meurdehka dan seujahteura di teumpat nyang khusos nyoe. TUHAN ka neubri keu kamoe udeb nyang barô. 9Nibak watée kamoe mantong jeuet keu namiet ureuëng laén, TUHAN pi hana neutinggai kamoe. TUHAN ka neupeujeuet kamoe jigaséh ngon jisayang lé raja-raja Persia dan jipeu idhin udeb ngon jibri peudong lom Baét Droeneueh nyang ka tinggai rungka-rungka nyan. TUHAN ka neubri keu kamoe teumpat meulindong disinoe, di Yehuda dan Yerusalem. 10Teuma bak saát nyoe, ya TUHAN, Allah kamoe, óh ka lheueh teujadi banmandum nyan, peue nyang hase kamoe peugah? Kamoe ka kamoe peubeuah tutoe haba TUHAN lom teuma, 11nyang ka TUHAN bri keu kamoe meulalu nabi-nabi, hamba-hamba TUHAN. Awaknyan jijak britée ubak kamoe bahwa tanoh nyang keuneuk kamoe duek nyan hana nyang gleh sabab banmandum peunduduek jih phon nibak ujong sampoe ubak ujong ka jipeubuet kuto lom ngon keuji. 12Nabi-nabi nyang tam kamoe bék meukawen meujampu deungon ureuëng nyan, atawa kamoe bantu awaknyan sampoe udeb seujahteura dan makmu. Meunyoe kamoe taát, kamoe teuma jeuet keuteuga dan kamoe pajoh hase tanoh nyan dan kamoe peutron keu ahli waréh kamoe sampoe siumu masa. 13Kamoe ka meudesya dan ka kamoe iengkeue ubak huköm Droeneueh, dan TUHAN ka neuhuköm kamoe. Teuma kamoe teupeue, ya TUHAN Allah kamoe, bahwa huköman nyang TUHAN bri nyan hana brat nyang patot kamoe teurimong, dan kamoe mantong TUHAN peuseulamat. 14Lé sababnyan, panena mungken kamoe peubeuah peurintah-peurintah Droeneueh dan kamoe meukawen meujampu deungon ureuëng-ureuëng nyang jeuhet nyan? Meunyoe hainyan mantong kamoe peubuet, ka pasti TUHAN meureuka nyang lumpah brat u ateueh kamoe sampoe TUHAN neupeuhanco kamoe jeuet keu abée dan hana TUHAN bri udeb keu kamoe bahpi meusidroe pi. 15Ya TUHAN, Allah Israel, Droeneueh lumpah that ade, bahpi lagée nyan TUHAN teutab neubri keu kamoe udeb. Kamoe meungaku ateueh salah kamoe ubak Droeneueh; kamoe hana meuhak keu kamoe meuhadab u hadhirat Droeneueh."

will be added

X\