Ezra 7

1Meuthon-thon teuma óh lheueh nyan, bak watée Artahsasta geumat peurintah sibagoe raja Persia, na sidroe ureuëng agam nyang nan geuh Ezra, gobnyan nibak keuturonan Teungku Imeum Agong Nabi Harun. Garéh keuturonan gobnyan phon di miyueb u ateueh na kheueh lagéenyoe: Ezra Seraya Azarya Hilkia 2Salum Zadok Ahitub 3Amarya Azarya Merayot 4Zerahya Uzi Buki 5Abisua Pinehas Eleazar Teungku Imeum Agong Nabi Harun 6- 7Ezra na kheueh sidroe ureuëng nyang malem dan gobnyan geuteupeue that keuhai Huköm nyang geupeutron lé TUHAN Po teu Allah Israel ubak Nabi Musa. Sabab Ezra geubri beureukat lé TUHAN Allah gobnyan, dan diraja pi hana geupeu kliet peue nyang geulakée lé gobnyan geujok laju. Bak thon nyang keutujoh geumat keurajeuen lé Raja Artahsasta, geujak kheueh Ezra nibak Babel u Yerusalem meusajan deungon saboh kawan ureuëng Israel nyang meubagoe ragam ureuëng jih, na teungku-teungku imeum, ureuëng Lewi, ureuëng meuca-e meunan cit deungon ureuëng nyang meutugaih nibak babah pintoe geureubang Baét TUHAN, dan ureuëng-ureuëng meukeureuja. 8- 9Awaknyan jitinggai Babel nibak tanggai sa buleuen sa dan deungon tulông Po teu Allah, trok kheueh awaknyan u Yerusalem deungon seulamat nibak tanggai sa buleuen limong. 10Ezra ka geucurah sigala peuratian gobnyan ubak teuseulidek Huköm-huköm TUHAN, seulaén keu geupeubuet keudroe, geupeubeuet teuma huköm-huköm nyan ubak bansa Israel. 11Nyoe kheueh dokumen nyang geubri lé Raja Artahsasta ubak Ezra, sidroe teungku imeum nyang malem keuhai Huköm. 12"Nibak Raja Artahsasta keu Teungku Imeum Ezra, ureuëng nyang malem nibak Huköm Allah nyang mat kuasa di dalam syeuruga. 13Ulôn peurintah bahwa banmandum teungku imeum, ureuëng Lewi dan ureuëng Israel nyang laén dipat mantong didalam keurajeuen ulôn, nyang na meuheuet keuneuk jak u Yerusalem, ulôn bri idhin jijak deungon Gata. 14Sabab ulôn dan ban tujoh droe peunaseuhat ulôn teu utôh Gata u Yerusalem dan Yehuda mangat teujak seulidek keuadaan disinan dan teungieng peu kheueh Huköm Allah nyang ka teupeucaya keu Gata, bit-bit tataát. 15Ulôn dan peunaseuhat ulôn keuneuk peuseumah méuh dan pirak ubak Allah Israel, Allah nyang tinggai di Yerusalem. Taba kheueh peuseumahan kamoe nyan. 16Meunan cit taba kheueh teuma banmandum méuh dan pirak nyang ka Gata peusapat bansaboh nanggroe Babel dan peue mantong sumbangan bansa Israel meunan cit deungon teungku-teungku imeum gobnyan keu Baét TUHAN Allah awaknyan di Yerusalem. 17Gata peuguna kheueh péng nyan deungon hemat mangat tateumé bloe leumô agam, bubiri agam, aneuëk bubiri, gandom dan anggô. Gata peuseumah kheueh banmandum nyan di ateueh miseubah Baét TUHAN di Yerusalem. 18Pirak dan méuh nyang na mantong leubeh jeuet Gata peuguna keu Gata keudroe dan rakan-rakan Gata, nyang sisuai deungon keuheundak Po teu Allah Gata. 19Gata jok kheueh ubak Allah di Yerusalem peue mantong peukakaih nyang geubri keu Gata keuteu seumayang di Baét Allah. 20Dan peue mantong peureulée nyang laén di Baét TUHAN, jeuet Gata lakée nibak kaih keurajeuen. 21Meunan cit keu banmandum nyang mat kaih keurajeuen di propinsi Efrat Barat, ulôn peurintah mangat jeuet peue mantong nyang geulakée lé Teungku Imeum Ezra, nyang that-that malem keuhai Huköm Allah nyang meukuasa lam syeuruga, gata jok laju ubak gobnyan beureujang-reujang, 22dan sampoe trok ubak jeumeulah sidubnyoe le: pirak trok 3.400 kilogram, gandom 10.000 kilogram, ié anggô 2.000 arée, minyéuk zaiton 2.000 arée, dan sira sidub nyang teupeureulée. 23Beu até-até dan ceureumat kheueh peue-peue mantong nyang geupeureulée lé Allah nyang mat kuasa lam syeuruga keu Baét Gobnyan, mangat jeuet Gobnyan hana geubeungéh keu ulôn atawa ubak ureuëng-ureuëng nyang mat peurintah óh lheueh ulôn. 24Gata hana jeuet tacok cukée nibak teungku-teungku imeum, nibak ureuëng Lewi, nibak ureuëng nyang meuca-e, nyang jaga babah pintoe geureubang, nibak ureuëng keureuja, atawa baksoe mantong nyang na hubongan jih deungon Baét TUHAN. 25Syedara ulôn Ezra, tapeuguna kheueh hikeumat nyang ka geubri lé Po teu Allah ubak Gata, dan Gata angkat kheueh peumimpén-peumimpén dan hakém-hakém mangat geupimpén banmandum ureuëng nyang na di propinsi Efrat Barat nyang udeb meunurot Huköm Allah Gata. Bah kheueh Gata peuruno banmandum Huköm nyan keu banmandum ureuëng nyang gohlom jiteupeue. 26Somantong ureuëng nyang hana jitaát ubak Huköm-huköm Allah Gata, atawa ubak huköm nanggroe, ureuëng nyan harôh bubagaih teuhuköm maté, atawa teuböih beujiôh, atawa teusita hareuta beunda jih, atawa teupeutamong u dalam glab." 27Laju geupeugah lé Ezra, "Pujoe kheueh TUHAN, Allah nyang geuseumah lé indatu geutanyoe! Allah ka geupeugrak até raja sampoe diraja nyan ka geubri peuratian nyang cukob raya mangat teupeudong lom Baét TUHAN di Yerusalem. 28Deungon tulông Allah ulôn jigalak lé raja, lé peunaseuhat-peunaseuhat dan lé peujabat-peujabat nanggroe nyang meukuasa; TUHAN Allah ulôn ka geupeubeudôh seumangat ulôn, sampoe ulôn ka meuhase ulôn pakat ulée kawöm Israel nyang cukob le keu jitemwoe u Yerusalem."

will be added

X\