Ezra 3

1Bak buleuen nyang keutujoh, ureuëng-ureuëng Israel ka tinggai teutab di banda jihnyan maséng-maséng. Bak tanggai sa buleuen nyan awaknyan jimeusapat di Yerusalem, 2laju lé Yesua bin Yozadak meunan cit deungon rakan-rakan gobnyan bubena teungku imeum dan Zerubabel aneuëk Sealtiel meunan cit deungon kawöm syedara gobnyan, jipeudong lom miseubah Po teu Allah Israel. Deungon na lagéenyan awaknyan ka jeuet jitot keureubeuen lom di ateueh miseubah nyan, nyang paih deungon peutunyok-peutunyok nyang na teutuléh didalam kitab Huköm Nabi Musa, hamba Allah nyan. 3Bahpi awaknyan jitakot keu peunduduek nyang na di nanggroe nyan, teuma awaknyan teutab cit jipeudong miseubah nyan di teumpat phon teupeudong. Dan deungon na nyang lagéenyan awaknyan laju jipeuphon lom jipeuseumah keureubeuen nyang teutot, bah kheueh nyan óh watée beungoh meunan cit óh watée seupôt uroe. 4Meunan cit awaknyan jipeuna Uroe Raya Jambo Ôn, nyang paih deungon peuratoran nyang ka teupeuteutab keu nyan; dan tieb-tieb uroe jipeuseumah keureubeuen nyang ka teupeuteutab nibak uroenyan. 5Seulaén nibaknyan awaknyan seucara teuato jipeuseumah teuma keureubeuen nyang teutot meunan cit deungon keureubeuen Uroe Raya Buleuen Barô, dan keu banmandum uroe raya nyang laén nyang teupeuna keu teuseumah TUHAN. Meunan cit awaknyan jipeuseumah teuma keureubeuen keugalak até ubak TUHAN. 6Bahpi Baét TUHAN gohlom teupeuphon peudong lom, teuma nibak tanggai sa buleuen tujoh rakyat ka jipeuphon tot keureubeuen keu TUHAN. 7Rakyat laju jijok sumbangan péng guna keu upah utoih kayée ngon utoih batée. Meunan cit lé rakyat hana jituwoe jikirém peunajoh deungon ié jieb, meunan cit deungon minyéuk zaiton u banda-banda Tirus dan banda Sidon guna jih mangat teutuka deungon kayée ceumara Libanon nyang na di banda-banda nyan. Kayéenyan laju jiba u Yafo meulalu laôt. Banmandum nyan geupeubuet lé rakyat deungon na idhin nibak Kores, raja Persia. 8Dan nibak buleuen nyang keudua, nibak thon nyang keudua óh ka lheueh ureuëng Israel jiwoe u Yerusalem, jipeuphon kheueh lé awaknyan jipeudong lom Baét TUHAN. Zerubabel, Yesua dan rakan-rakan gobnyan nyang saboh bansa, bubena teungku imeum, ureuëng Lewi, paneuk haba, banmandum ureuëng nyan beukaih nyang teuböih, banmandum meukeureuja. Ureuëng-ureuëng Lewi nyang meu-umu 20 thon u ateueh geutunyok mangat jeuet keumando nibak seumeugöt Baét TUHAN nyan. 9Dan Yesua, ureuëng Lewi nyan, meusajan deungon aneuëk-aneuëk syedara gobnyan, dan meunan cit deungon Kadmiel deungon aneuëk-aneuëk gobnyan cit teuma (kawöm Hodawya) meusajan-sajan jikawai nibak teumpat teupeugöt Baét TUHAN nyan. Awaknyan jibantu lé ureuëng Lewi nibak kawöm Henadad. 10Nibak watée ureuëng-ureuëng nyang meubuet bangunan ka jipeuphon peudong keunaleueng Baét TUHAN, lé teungku imeum nyang meupeukayan jubah sira geumat beureuguih nibak jaroe laju geucok teumpat maséng-maséng. Meunan cit deungon ureuëng-ureuëng Lewi nibak kawöm Asaf ka teudong disinan sira jimat nibak jaroe gobnyan maséng-maséng saboh gong ubit. Awaknyan laju geumeurateb sira jipuja pujo ubak TUHAN sisuai deungon peuratoran nyang ka geupeuteutab yoh mantong udeb Nabi Daud. 11Rakyat jimeuca-e ngon nyanyoe puja dan pujo ubak TUHAN, sira jiulang-ulang nibak baréh keuneulheuh, meunoe kheueh su cae nyan, "TUHAN nyan lumpah that jroh; dan geunaséh Gobnyan keu Israel keukai dan abadi." Banmandum rakyat jiseumurak ngon geumbira sira jipujoe TUHAN, sabab keunaleueng Baét TUHAN ka jipeuphon keubah teuma. 12Le that-that lamkawan teungku-teungku imeum, ureuëng-ureuëng Lewi, dan ulée-ulée kawöm nyang ka tuha-tuha umu jih ka lheueh jikalon Baét TUHAN yoh masa ilée. Yoh watée jingieng teupeuduek keunaleueng Baét TUHAN nyang na jinoe, laju jimo ba-e ngon su nyang teuga. Teuma ureuëng-ureuëng nyang laén nyang na teuka disinan jiseumurak meuhubo sabab geumbira mangat that até, 13sampoe hana hase le teubeuda ureuëng mo deungon ureuëng seumurak. Su jih pih lumpah that meudeungkeng, sampoe teudeungoe jiôh nyang meutaga.

will be added

X\