1 Tawarikh 29

1Laju geupeugah lé Nabi Daud ubak banmandum ureuëng nyang na meusapat disinan, "Nibak banmandum aneuëk agam ulôn, Nabi Sulaiman kheueh nyang geupiléh lé Po teu Allah. Teuma jihnyan mantong that putik gohlom na peungalaman, seudangkan buet-buet nyoe keubit that rayeuk. Lom teuma nyang teupeudong nyan bukon kheueh saboh meuligoe keu manusia, teuma na kheueh Baét keu TUHAN Allah. 2Bahan-bahan keu baét nyan meunan cit deungon mubagoe macam peurabot jih ka ulôn keubah deungon sigala keumampuan ulôn. Nibak ulôn ka na lôn keubah méuh, pirak, peurunggu, beuso, kayée, batée-batée meuhareuga dan batée-batée peumata, meunan cit deungon batée-batée nyang meubagoe wareuna keu hiasan-hiasan dan lumpah that le batée pualam. 3Dan sabab cinta ulôn keu Baét Po teu Allah ulôn ka teuma ulôn seurah pirak ngon méuh nibak hareuta milék ulôn keudroe: 4- 5méuh nyang paleng gét na 100 ton leubeh, dan pirak nyang aseuli leubeh kureueng na teuma 240 ton keu ngon seupoh nibak bintéh Baét TUHAN, dan keu beunda-beunda nyang harôh jipeubuet lé ureuëng teunaga ahli. Nyang kheueh, jinoenyoe solom nyang jitem bri peuseumahan keu TUHAN deungon sigala mangat até?" 6Lé sababnyan, bubena ulée kawöm, ulée sukée, bubena peuwira dan nyang tanggong jaweueb hareuta milék raja geupeugah bahwa awaknyan pih na meuheut keuneuk bri sumbangan. 7Lé awaknyan pi laju jibri nyang teupeugah lom nyoe, atranyoe keu ngon peugét Baét TUHAN: méuh 170 ton leubeh, pirak 340 ton leubeh, peurunggu rab na 620 ton, dan beuso 3.400 ton leubeh. 8Ureuëng-ureuëng nyang na batée peumata jijok laju ubak Yehiel mangat teupeutamong lam kaih Baét TUHAN. (Yehiel na kheueh sidroe lamkawan ureuëng Lewi nibak kawöm Gerson.) 9Rakyat jijok nyan deungon rela até keu TUHAN dan awaknyan galak that sabab ka le that nyang ka jipeuseumah. Meunan cit deungon Nabi Daud lumpah that galak até jih. 10Dikeue rakyatba nyan Nabi Daud laju geupujo TUHAN. Gobnyan geupeugah, "Ya TUHAN Po teu Allah nyang geuseumah lé Nabi Yakub indatu kamoe, teupujo kheueh TUHAN siumu masa! 11Droeneueh keubit rayeuk dan meukuasa, Droeneueh mulia, jaya dan agong. Peue mantong na di langét dan nyang na di ateueh bumoe na kheueh atra Droeneueh. Droeneueh raja nyang agong, nyang mat kuasa ateueh peue-peue nyang na. 12Mandum keukayaan dan keumakmuran asai jih nibak Droeneueh; peue-peue mantong nyang na Droeneueh kuasa deungon teunaga dan keudaulatan Droeneueh; Droeneueh meukuasa hase neupeujeuet so mantong ureuëng jeuet keu ureuëng rayeuk dan teuga. 13Jinoenyoe, Ya Allah kamoe, kamoe peugah syukoe ubak Droeneueh, dan kamoe pujo nan Droeneueh nyang agong. 14Ulôn ngon rakyat ulôn nyang sikeubit jih hana meuhase kamoe jok sapeue keu Droeneueh, sabab peue mantong nyoe na kheueh atra Droeneueh dan peue nyang kamoe bri nyoe na kheueh atra Droeneueh cit teuma. 15Droeneueh neuteupeue ya, TUHAN, saban cit lagée indatu kamoe, kamoe pih kamoe rasa udebnyoe saban lagée ureuëng jamé dan ureuëng aséng. Udeb kamoe lagée bubayang yohmasa ilée, dan kamoe hana jeuet kamoe tuwoe ubak maté. 16Ya TUHAN, Allah kamoe, banmandum barang nyang muyuemnyoe kamoe peusapat disinoe keu teupeudong saboh baét keu Droeneueh mangat kamoe hase kamoe horeumat keu nan Droeneueh nyang suci. Teuma banmandum nyan kamoe teurimong nibak Droeneueh keudroe dan atranyan na kheueh atra Droeneueh keudroe. 17Ulôn meuteupeue bahwa TUHAN neu ujoe até tieb-tieb manusia dan TUHAN neugalak keu até nyang gleh murni. Deungon até nyang tuloih ikhlas dan mangat até ulôn peuseumah banmandum nyoe keu Droeneueh. Ulôn ka lheueh ulôn ngieng pakriban umat Droeneueh nyang na meusapat disinoe jiba peuseumahan awaknyan keu Droeneueh deungon seunang até. 18Ya TUHAN Allah, TUHAN nyang geuseumah lé Nabi Ibrahim, Nabi Ishaq dan Nabi Yakub, indatu kamoe, bah kheueh TUHAN neujaga mangat umat Droeneueh teutab cinta Droeneueh lagée nyang ka teujadi nibak uroenyoe dan neutulông kheueh mangat awaknyan siumu masa teutab seutia ubak Droeneueh. 19Neubri kheueh keu Nabi Sulaiman, aneuëk agam ulôn, keuheundak nyang bit-bit mangat jeuet jiseutôt banmandum peurintah Droeneueh dan mangat jipeudong baét iébadat nyang peusiapan jih ka lheueh ulôn peubuet." 20Óh ka lheueh geumeudoá nyang lagéenyan, Nabi Daud laju geupeugah ubak ureuëng ramé nyang na disinan, "Pujoe kheueh TUHAN Po teu Allah gata!" Teuma di ureuëng ramé nyan pih laju geumeurateb ngon jipujoe TUHAN, Allah nyang geuseumah lé indatu awaknyan. Lheuehnyan awaknyan laju jisujut sira jibri horeumat ubak TUHAN dan raja. 21Uroe nyang laén awaknyan laju jisie beulatang peulara keu jipeuseumah sibagoe keureubeuen keu TUHAN, dan uengkot sie nyan laju geubagi-bagi keu rakyat. Seulaén nibak nyan na teuma 1.000 boh leumô agam, 1.000 boh bubiri agam dan 1.000 boh teuma bubiri muda nyang geusie dan geutot deungon sampoereuna di ateueh miseubah. Meunan cit awaknyan jipeuseumah teuma anggô nyang ka teupeuwajéb keu keureubeuen-keureubeuen nyan. 22Bak uroenyan awaknyan jipajoh khanuri deungon galak dan mangat até dikeue Po teu Allah. Dan nyang keu duagoe jih awaknyan jipeumaklumkan Nabi Sulaiman sibagoe raja. Ateueh nan TUHAN, awaknyan laju geubaiát Nabi Sulaiman sibagoe raja dan Teungku Imeum Zadok geu baiát sibagoe teungku imeum. 23Dan sibagoe geunantoe Nabi Daud ureuëng syiek gobnyan, Nabi Sulaiman geuduek nibak takhta nyang ka geupeuteutab lé TUHAN. Gobnyan na kheueh raja nyang ade lom carông dan jiseugan lé banmandum bansa Israel. 24Banmandum peujabat keurajeuen dan tantra sampoe ubak aneuëk-aneuëk agam Nabi Daud nyang laén pih jiaku Nabi Sulaiman nyan sibagoe raja. 25TUHAN ka geupeujeuet banmandum rakyat jikagom keu Raja Nabi Sulaiman dan geupeujeuet gobnyan keu raja nyang paleng hebat nibak raja tohmantong nyang ka lheueh jimat peurintah ateueh nanggroe Israel. 26Nabi Daud aneuëk Isai geumat peurintah bansaboh nanggroe Israel 27peuet ploh thon treb jih. Di Hebron na geumat peurintah nyang treb jih 7 thon dan di Yerusalem na 33 thon. 28Gobnyan ureuëng kaya dan teuhoreumat dan meuninggai donya bak umu nyang ka seb tuha. Nabi Sulaiman aneuëk agam gobnyan jeuet keuraja keugeunantoe gobnyan. 29Riwayat udeb Nabi Daud nibak phon sampoe akhé ka na teucetet didalam kitab Nabi Samuel, Nabi Natan dan Nabi Gad. 30Didalam kitab nyan teucalitra keuhai peumeurintahan gobnyan, kuasa gobnyan dan peue mantong nyang na teujadi u ateueh droe gobnyan, ateueh Israel dan keurajeuen-keurajeuen nyang na tô-tô ngon nanggroe Israel.

will be added

X\