1 Tawarikh 26

1Nyoe na kheueh peumbagian tugaih keu ureuëng-ureuëng Lewi nyang jeuet keu nyang kawai Baét TUHAN. Nibak kawöm Korah jitunyok Meselemya aneuëk Kore nibak keuluwarga Ebyasaf. 2Gobnyan na tujoh droe aneuëk agam nyang teudafeutar meunurot urotan umu: Zakharia, Yediael, Zebaja, Yatniel, 3Elam, Yohanan, Elyoënai. 4Lheuehnyan teutunyok teuma Obed-Edom. Gobnyan geubri beureukat lé Po teu Allah deungon 8 droe aneuëk agam nyang teudafeutar meunurot urotan umu: Semaya, Yozabad, Yoah, Sakhar, Netaneel, 5Amiel, Isakhar dan Peuletai. 6- 7Semanya aneuëk tuha Obed-Edom na jimeu aneuëk 6 droe aneuëk agam: Otni, Refael, Obed, Elzabad, Elihu dan Semakhya; banmandum nyan na kheueh ureuëng-ureuëng peunteng dalam kawöm awaknyan sabab awaknyan gagah peukasa, nyang paleng meugah Elihu dan Semakhya. 8Keuhai buet teukawainyan kawöm Obed-Edom teubri teuma 62 droe ureuëng agam nyang peukasa. 9Kawöm Meselemya teubri teuma na 18 droe ureuëng nyang peukasa. 10Nibak kawöm Merari teutunyok teuma Hosa. Gobnyan na peuet droe aneuëk agam: Simri (jihnyan bukon aneuëk tuha, teuma teuangkat jeuet keu peumimpén lé ureuëng syiek geuh), 11Hilkia, Tebalya dan Zakharia. Banmandum nyan na 13 droe anggota keuluwarga Hosa nyang jeuet keu nyang kawai Baét TUHAN. 12Ureuëng nyang kawai Baét TUHAN teubagi dalam keulompok-keulompok meunurot kawöm jih. Dan meunan cit keu awaknyan teubri cit tugaih-tugaih didalam Baét TUHAN saban lagée nyang ka teubri keu ureuëng Lewi. 13Tieb-tieb kawöm bah kheueh nyan kawöm nyang rayeuk meunan cit deungon kawöm nyang ubit, teutarek undi mangat teuteupeue bak babah pintoe geureubang nyang toih awaknyan meuteumé tugaih. 14Selemya meuteumé tugaih nibak babah pintoe geureubang di siblaih u timu. Nabi Zakharia aneuëk gobnyan, nyang sabe geubri naseuhat nyang jroh-jroh, meuteumé tugaih nibak babah pintoe geureubang di siblaih utara. 15Obed-Edom meuteumé tugaih nibak babah pintoe di siblaih u seulatan seudangkan aneuëk-aneuëk gobnyan meuteumé tugaih teujaga gudang peuleungkapan. 16Supim dan Hosa meuteumé tugaih nibak pintoe siblaih u barat dan pintoe geureubeng Syalekhet nyang na nibak rot nyang meusineungoh. Tugaih teukawai ka geuato lagéenyan bagoe deungon nyan sabe na ureuëng kawai di tieb-tieb babah pintoe geureubang. 17Tieb-tieb uroe disiblaih u timu sabe na 6 droe peungawai, siblaih utara 4 droe dan siblaih u seulatan 4 droe. Meunan cit deungon gudang-gudang peuleungkapan na ureuëng jaga 4 droe: 2 droe tieb-tieb saboh gudang. 18Nibak papilyun siblaih si ubarat na teuma meutugaih 4 droe peungawai nibak rot dan 2 droe tukang kawai nibak papilyun nyan keudroe. 19Meunan kheueh cara jih teubagi tugaih kawai keu kawöm Korah dan kawöm Merari. 20Ureuëng-ureuëng nyang laén lam sukée Lewi teujok tanggong jaweueb ateueh hareuta beunda Baét TUHAN dan ateueh gudang-gudang teumpat teukeubah nyang teupeuseumah-peuseumah keu Po teu Allah. 21Na sidroe aneuëk agam Gerson nyang nan jih Ladan; gobnyan jipeutron na meupadub boh keulompok kawöm, jitamong cit keunan kawöm Yehiel aneuëk jihnyan. 22Aneuëk-aneuëk Yehiel, nyang nan jih Zetam dan Yoël, teubri tanggong jaweueb ateueh gudang-gudang dan keuhai péng Baét TUHAN. 23Keuturonan Amram, Yizhar, Hebron dan Uziel pi awaknyan meuteumé tugaih. 24Sebuel nibak kawöm Gersom, aneuëk Nabi Musa, na kheueh nyang kawai hareuta beunda Baét TUHAN. 25Gobnyan na hubongan keuluwarga deungon Selomit meulalu Eleazar syedara Gersom. Garéh keuturonan Eliezer sampoe ubak Selomit na kheueh lagéenyoe: Eliezer, Rehabya, Yesaya, Yoram, Zikhri, Selomit. 26Selomit dan wareh kawöm jihnyan meutanggong jaweueb ateueh banmandum peuseumahan nyang geubri lé Nabi Daud, lé ulée-ulée keuluwarga, peumimpén-peumimpén kawöm, dan bubena peuwira-peuwira manyang. 27Peue-peue nyang teujok nyan na kheueh siladum nibak hareuta nyang teureupah di mideuen prang dan awaknyan peuseumah khusos lam Baét TUHAN. 28Paneuk haba, Selomit dan keuluwarga jihnyan meutanggong jaweueb ateueh peue mantong nyang ka teuseurah keu peuguna khusos lam Baét TUHAN, jitamong cit keunan keu peuseumahan-peuseumahan nyang teujok meulalu Nabi Samuel ka geubri lé Raja Saul, lé Abner aneuëk Ner, dan lé Yoab aneuëk Zeruya. 29Keuturonan Yizhar, na kheueh Kenanya dan aneuëk-aneuëk gobnyan, teubri tugaih sibagoe administrasi nanggroe dan tugaih-tugaih nibak kantô peungadelan di Israel. 30Peue mantong urosan keu agamaan dan urosan peumeurintahan di Israel bagian barat Krueng Yordan geuseurah ubak Hasabya, dan keu 1.700 droe waréh kawöm gobnyan: banmandum nyan na kheueh ureuëng-ureuëng meusyeuhu keuturonan Hebron. 31Peumimpén keuturonan Hebron na kheueh Yeria. Bak thon nyang keupeuet ploh geumat keurajeuen lé Nabi Daud laju jipeuna seulidek keuhai keuturonan Hebron. Nibak hase teuseulidek nyan teunyata na sipa-i-sipa-i nyang peukasa nyang tinggai di Yazer didalam wilayah Gilead. 32Peue mantong urosan keu agamaan dan peumeurintahan di Israel siblaih u timu Krueng Yordan -- na kheueh wilayah sukée Ruben, Gad dan siladum sukée Manasye -- teuseurah teuma ubak 2.700 ulée keuluwarga Yeria, banmandum nyan na kheueh ureuëng meusyeuhu nyang geupiléh lé Raja Nabi Daud.

will be added

X\