1 Tawarikh 21

1Iblih meuheut that jikeuneuk peuceulaka ureuëng Israel; kareuna nyan Iblih nyan laju jijak rayu Nabi Daud mangat geupeuna seunsus. 2Dan geupeugah kheueh lé Nabi Daud ubak Yoab dan banmandum peuwira gobnyan, "Gata peuna kheueh seunsus bansaboh nanggroe Israel sampoe u gampông-gampông nyang jiôh, sabab ulôn keuneuk teupeue na padubdroe jeumeulah peunduduek bansa Israel nyoe." 3Geujaweueb lé Yoab, "Seumoga TUHAN geupeulipat ganda rakyat Israel sampoe sireutoih goe nibak jeumeulah awaknyan nibak saát nyoe. Nyang Mulia, bukon kheueh ka jeulaih bahwa awaknyan jitaklok ubak Teungku Amphon? Keupeue harôh ta peuna seunsus? Singoh, sabab lé buet nyang salah nyan, banmandum bansa turot jitanggong akibat jih!" 4Teuma raja teutab geumumat ubak peurintah geuh nyan, lé nyan Yoab jijak laju ban saboh nanggroe Israel, sampoe u tieb-tieb gampông nyang paleng jiôh, óh ka seuleusoe laju geugisa u Yerusalem, 5dan geujak lapor laju ubak Raja Nabi Daud hase seunsus gobnyan nyan. Jeumeulah ureuëng agam nyang peunoh carat keu jeuet keu sipa-i na 1.100.000 droe di Israel dan 470.000 droe di Yehuda. 6Teuma sukée Lewi dan sukée Benyamin hana jitamong lam jeumeulah nyan. Yoab hana geupeuna seunsus keu awaknyan sabab gobnyan hana galak jipeubuet peurintah raja nyan. 7Po teu Allah hana galak Gobnyan keu seunsus nyan dan TUHAN laju geuhuköm ureuëng Israel. 8Dan laju geumeu doá Nabi Daud ubak Po teu Allah, "Ya Allah, ulôn keubit that ka meudesya! Neupeu amphon kheueh ulôn, sabab buet ulôn nyan keubit that bangai." 9TUHAN geupeugah ubak Nabi Gad, nyang jeuet keu peunghubong Nabi Daud ngon TUHAN. 10"Tajak peugah kheueh laju ubak Nabi Daud bahwa Ulôn teuma Lônbri lhée boh mangat jipiléh. Peue mantong nyang jitem teuma Lôn peubuet." 11Dan jijak kheueh Gad ubak Nabi Daud jijak peusampoe peue nyang ka geupeugah lé TUHAN ubak gobnyan, "Nyang toh nyang Teungku Amphon piléh: 12Nanggroenyoe keunong musém deuk nyang treb jih na lhée thon, atawa Teungku Amphon neuplueng jilet-let lé musoh nyang treb jih na lhée buleuen, atawa bansaboh nanggroenyoe lhée uroe treb jih geuprang lé TUHAN deungon peudeueng gobnyan nyang sibagoe bala peunyakét, dan malaikat geuba mawöt ho-ho mantong. Neupeuputôh kheueh jinoenyoe peue nyang harôh ulôn peusampoe ubak TUHAN." 13Geujaweueb lé Nabi Daud, "Adoh, cilaka ulôn nyoe! Teuma nibak jihuköm lé manusia, leubeh gét ulôn nyoe geuhuköm lé TUHAN, sabab Gobnyan rayeuk that gaséh sayang Geuh." 14Akhéjih TUHAN laju geupeuteuka bala peunyakét ateueh Israel sampoe na 70.000 droe nyang meuninggai donya. 15Óh lheuehnyan TUHAN geuyue ubak malaikat mangat teujak reuloih Yerusalem. Teuma bak watée malaikat nyan ka trok ubak teumpat ureuëng teungoh ceumeulo boh gandom atra Arauna ureuëng Yebus, TUHAN laju geu-ubah keuputosan Gobnyan keu geuhuköm bansa nyan. Gobnyan geupeugah ubak malaikat nyan, "Kaseb! Piôh!" 16Nabi Daud leumah geukalon malaikat nyan meulayang-layang lamkawan langét ngon bumoe. Deungon peudeueng nibak jaroe, malaikat nyan ka siab keuneuk geujak peubinasa Yerusalem. Lé sababnyan Nabi Daud dan peumimpén-peumimpén rakyat, nyang bak watée nyan teungoh jisôk peukayan ija krông sabab tanda meunyeusai, laju geusujut ateueh tanoh. 17Nabi Daud geumeudoá, "Ya, Allah, ulôn kheueh nyang salah. Ulôn kheueh ya TUHAN nyang yue seunsus nyan. Bansa nyoe meubacut pih hana meusalah! Ya TUHAN, Po teu Allah ulôn, neuhuköm kheueh ulôn dan keuluwarga ulôn, teuma neupeujiôh kheueh mala peutaka nyoe ateueh umat Droeneueh." 18Laju malaikat TUHAN geuyue ubak Gad mangat jijak peusampoe ubak Nabi Daud bahwa gobnyan harôh geujak ék u ateueh teumpat ceumeulo gandom atra Arauna dan geupeudong miseubah di ateueh nyan. 19Lé sababnyan geubeurangkat kheueh Nabi Daud nyang sisuai deungon peurintah TUHAN nyang ka geupeusampoe ubak gobnyan meulalu Gad. 20Diteumpat jambo phui aneuk gandom nyan Arauna dan peuet droe aneuëk gobnyan nyang agam teungoh jiceumeulo boh gandom. Ban leumah jikalon malaikat nyan, ban peuet droe aneuëk Arauna nyan laju jiplueng jijak söm droe. 21Bak watée Arauna jikalon Raja Nabi Daud nyang teuka ubak gobnyan, lé gobnyan laju geujak meurumpok ngon Nabi Daud sira geusujut dikeue nabi Allah nyan. 22Geupeugah lé Nabi Daud ubak Arauna nyan, "Ulôn keuneuk peugöt miseubah diteumpat nyoe keu TUHAN, mangat balanyoe gadôh. Lé sababnyan gata peubloe kheueh tanoh nyoe keu ulôn. Gata peugah kheueh laju padub yuem jih, jeuet lôn bayeue." 23"Ah, neucok mantong ya Teungku Amphon," jijaweueb lé Arauna, "dan neupeubuet kheueh laju peue nyang Teungku Amphon anggab nyan get. Nyoepat na leumô-leumô keureubeuen nyang teutot, dan keu kayée apui jih Teungku Amphon jeuet neungui papeuen-papeuen alat ceumeulo aneuk gandom nyoe. Meunan cit jeuet neucok aneuk gandom nyan keu peuseumahan. Banmandum nyan ulôn jok, bék neubayeue lé Teungku Amphon bahpi mubacut." 24Teuma geujaweueb lé Nabi Daud, "Bék meunan! Ulôn keuneuk bayeue yuem jihnyoe deungon yuem nyang peunoh. Ulôn hana lôntem keureubeuen keu TUHAN peue nyang atra gata atawa sapeue-sapeue nyang ulôn teumé deungon cuma-cuma." 25Dan Nabi Daud laju geubayeue keu Arauna deungon péng méuh nyang le jih na 600 keuteumpat nyan. 26Lé Nabi Daud geupeudong laju saboh miseubah diteumpat nyan keu TUHAN, dan geupeuseumah laju keureubeuen nyang teutot dan keureubeuen peudamé. Óh lheueh nyan gobnyan geumeudoá ubak TUHAN dan TUHAN pih geudeungoe doá gobnyan sira geupeutron apui di langét dan apuinyan laju jilahiëb banmandum keureubeuen-keureubeuen nyan. 27Óh lheuehnyan TUHAN laju geuyue malaikat nyan mangat geujak pasolom u dalam sarong peudeueng nyang ka teusuit nyan, dan malaikat nyan laju geupeubuet peue nyang ka geupeurintah lé TUHAN ubak gobnyan nyan. 28Bak watée geungieng lé Nabi Daud bahwa TUHAN ka geujaweueb doá gobnyan sabab peue nyang ka geupeuseumah nyan, lé nyan teuma gobnyan geupeuseumah lom keureubeuen nibak miseubah nyan. 29Bak watéenyan khimah TUHAN nyang geupeugöt lé Nabi Musa di padang pasi dan miseubah keu teumpat keureubeuen nyang teutot mantong na di teumpat iébadat di Gibeon. 30Teuma Nabi Daud hana geujeuet geujak keudeh keu geujak meututoe deungon Po teu Allah, sabab gobnyan teumakot that-that keu peudeueng malaikat TUHAN.

will be added

X\