1 Tawarikh 18

1Hana padubna treb teuma óh lheuehnyan Raja Nabi Daud laju geujak prang ureuëng Filistin sampoe taloe dan banda Gad geuteumé reubot meunan cit deungon gampông-gampông nyang na tô-tô disinan banmandum habéh geureupah. 2Meunan cit deungon ureuëng Moab ka habéh geupeutaloe lé Nabi Daud seuhingga ureuëng Moab nyan jibayeue upeti keu gobnyan. 3Óh lheueh nyan Nabi Daud laju geupeutaloe Hadadezer, nyang mat keurajeuen di Zoba tô ngon wilayah Hamat di nanggroe Siria. Bak watéenyan Hadadezer teungoh jijak keuneuk jak reupah wilayah nyang tô deungon pucok Krueng Efrat. 4Lam prang nyan Nabi Daud geuteumé reubot 1.000 boh geuritan prang, dan geudroeb 7.000 droe sipa-i nyang meuguda meunan cit na 20.000 droe sipa-i nyang jijak ngon gaki. Dan banmandum guda ka geupeulapée, dan bacut mantong geutinggai seb keu 100 boh geuritan prang. 5Ureuëng Siria dan Damsyik laju jikirém sipa-i keujijak tulông Raja Hadadezer, teuma lé Nabi Daud laju geupeutaloe awaknyan dan maté sipa-i musoh nyan na 22.000 droe. 6Óh lheuehnyan awaknyan laju jipeudong khimah-khimah prang didalam wilayah awaknyan dan awaknyan taklok dan jibayeue upeti keu Nabi Daud nyan. TUHAN geupeumeunang Nabi Daud dipat mantong gobnyan geumuprang. 7Tameng-tameng méuh nyang jingui lé sipa-i Raja Hadadezer banmandum nyan ka geureupah lé Nabi Daud laju geuba u Yerusalem. 8Seulaén nibak nyan na lom geucok lé Nabi Daud peurunggu nyang lumpah le nibak Tibhat dan Kun, banda-banda nyang yohmasa ilée jikuasa lé Raja Hadadezer. (Teuma óh dudo peurunggu-peurunggu nyan geucok lé Nabi Sulaiman keu geupeugét beujana, dan taméh-taméh dan peukakaih-peukakaih iébadat di Baét TUHAN.) 9Raja Tou di Hamat ka geudeungoe bahwa Nabi Daud ka geupeutaloe banmandum sipa-i Raja Hadadezer. 10Dan gobnyan laju geu kirém Yoram aneuëk agam gobnyan mangat jijak peusampoe saleuem keu Raja Nabi Daud dan jipeugah seulamat ateueh gobnyan meunang, sabab Hadadezer ka kayém that jimuprang deungon Tou. Yoram jijak ubak Nabi Daud sira jiba méuh nyang lumpah that jai sibagoe hadiah, meunan cit deungon pirak dan peurunggu. 11Raja Nabi Daud laju geupeuseumah banmandum nyan keu TUHAN mangat geupeuguna bak watée na upacara iébadat. Meunan cit geupeubuet ateueh barang-barang méuh dan pirak nyang ka geureupah nibak Hadadezer dan bansa-bansa nyangka geupeutaloe, bansa nyan na kheueh bansa Edom, Moab, Amon, Filistin dan Amalek. 12Abisai (mak geuh nan Zeruya) jipeutaloe dan jipoh maté na 18.000 droe ureuëng Edom di Pantôn Asin 13dan laju geupeudong khimah-khimah tantra bansaboh Edom. Deungon nyan teuma taklok kheueh ureuëng-ureuëng Edom ubak Raja Nabi Daud. TUHAN geubri meunang ateueh Nabi Daud dipat mantong na gobnyan geumuprang. 14Meunan kheueh cara jih Nabi Daud geumat keurajeuen bansaboh Israel dan geujaga mangat rakyat gobnyan sabe jipeusaneut deungon ade dan gét-gét. 15- 17Nyoe kheueh nan-nan peujabat nyang geuangkat lé Nabi Daud: Panglima angkatan prang: Yoab aduen Abisai. Seukeutareh meuligoe: Yosafat aneuëk Ahilud. Teungku-teungku imeum: Zadok aneuëk Ahitub dan Ahimelekh aneuëk Abyatar. Seukeutareh nanggroe: Sausa. Ulée kawan tukang kawai pribadi raja: Benaya aneuëk Yoyada. Aneuëk-aneuëk agam Nabi Daud banmandum geumat jabatan nyang peunteng-peunteng didalam peumeurintahan.

will be added

X\