1 Tawarikh 14

1Raja Hiram nibak nanggroe Tirus geukirém duta-duta gobnyan ubak Nabi Daud, meunan cit deungon kayée ceumara Libanon dan tukang-tukang kayée meunan cit deungon tukang batée keujijak peugöt meuligoe. 2Lé sabab nyan Nabi Daud meutamah yakén bahwa TUHAN ka geupeukong gobnyan sibagoe raja Israel dan geupeuteuga keurajeuen gobnyan keu keupeuntengan umat TUHAN. 3Di Yerusalem Nabi Daud geumeukawen lom deungon napadub droe ureuëng inong, dan nibak ureuëng inong nyang geumeukawen nyan gobnyan na geumeu aneuëk lom. 4Aneuëk-aneuëk agam gobnyan nyang lahé di Yerusalem na kheueh: Syamua, Sobab, Natan, Nabi Sulaiman, 5Yibhar, Elisua, Elpelet, 6Nogah, Nefeg, Yafia, 7Elisama, Beelyada dan Elifelet. 8Bak watée jideungoe lé ureuëng Filistin bahwa Nabi Daud ka teubaiát jeuet keuraja ateueh bansaboh nanggroe Israel, awaknyan laju jiteuka jikeuneuk jak drob gobnyan. Lé sababnyan Nabi Daud laju geuteubiet geujak muprang deungon ureuëng nyan. 9Bak watée nyan ureuëng Filistin ka trok ubak Pantôn Refaim dan laju jireubot pantôn nyan. 10Ban geudeungoe lagée nyan Nabi Daud laju geuteumanyong ubak Po teu Allah, "TUHAN, peu kheueh harôh ulôn prang ureuëng Filistin nyan? Dan peu kheueh TUHAN neupeumeunang keu ulôn?" "Nyoe, jak prang laju!" geujaweueb lé TUHAN. "Ulôn na blaih gata!" 11Dan Nabi Daud deungon pasokan gobnyan laju geujak prang bubena ureuëng Filistin nyan di Baal-Perasim dan laju geupeutaloe awaknyan. Geupeugah kheueh lé Nabi Daud, "Allah ka geupeuguna ulôn mangat lôn jak heuntam peutahanan musoh lagée ié raya nyang jipeuhanyot peue mantong lam watée sikeujab." Nyang kheueh sabab jih teumpat nyan geuboh nan Baal-Perasim. 12Bak watée pasokan Filistin ka jiplueng, awaknyan hana meuteumé jiba patong-patong beurala droe jih. Lé Nabi Daud laju geupeurintah bubena patong nyan geuyuetot banmandum. 13Hana treb teuma óh lheuehnyan teuka lom ureuëng Filistin dan jireubot lom Pantôn Refaim. 14Sigoeteuk Nabi Daud geulakée peutunyok ubak Po teu Allah, dan Po teu Allah laju geujaweueb, "Bék gata prang awaknyan rot nyoe, teuma tajak kheueh sira gata wet dan prang kheueh awaknyan rot meurandeh jéh, nyang tô ngon binéh bak kayée meureubo. 15Meunyoe gata na deungoe su tapak lagée su ureuëng nyang teungoh mubareh di ateueh pucök-pucök bak kayée nyan, gata maju dan tapeurab kheueh laju, sabab Ulôn na Lôn jak dikeue gata keu Lôn jak peutaloe ureuëng Filistin." 16Nabi Daud laju geupeubuet peue nyang ka geupeurintah lé Po teu Allah ubak gobnyan. Gobnyan dan pasokan geuh geuseupôt dan jisurot tantra Filistin phon nibak Gibeon sampoe trok u Gezer. 17Lé sababnyan meugah kheueh nan Nabi Daud dipat mantong, dan TUHAN laju geupeutakot bubena bansa laén keu Nabi Daud.

will be added

X\