1 Tawarikh 13

1Raja Nabi Daud laju geupeuna pakat deungon banmandum peuwira gobnyan bah kheueh nyang na aneuëk buah 1.000 droe meunan cit nyang na aneuëk buah 100 droe. 2Laju gobnyan geupeugah ubak banmandum peuwiranyan, "Meunyoe gatanyoe banmandum situju, dan geupeu idhin lé Po teu Allah geutanyoe, pakriban meunyoe ta kirém sidroe utosan ubak bubena teungku imeum dan ureuëng-ureuëng Lewi di gampông-gampông awaknyan, meunan cit ubak banmandum bansa geutanyoe nyang laén mangat tayue teuka awaknyan jijak meugumpôi deungon geutanyoe disinoe. 3Óh lheuehnyan tajak cok laju Peuto Peujanjian Allah, nyang ka jipeubiyeu teutiek meunan mantong watée keurajeuen nanggroe geumat lé Raja Saul." 4Banmandum ureuëng Israel nyang meugumpôi nyan galak that-that dan usuinyan jiteurimong seucara bulat. 5Dan Nabi Daud laju geupeusapat rakyat Israel bansaboh nanggroe, phon nibak bataih di nanggroe Meusé di seulatan sampoe trok u Hamat di utara, mangat teujakcok Peuto Peujanjian TUHAN nyan nibak Kiryat-Yearim dan teuba laju u Yerusalem. 6Dan Nabi Daud laju geujak meusajan deungon awaknyan u banda Baala, nyan kheueh Kiryat-Yearim, didalam wilayah sukée Yehuda mangat teujakcok Peuto Peujanjian Allah. Peuto nyan geuboh nan na kheueh "TUHAN nyang meutahta di ateueh Kerub". 7Óh watée ka trok gobnyan u Baala, awaknyan laju jicok Peuto Peujanjian nyan lam rumoh Abinadab, dan jipeu-ék laju u ateueh geureubak peudati nyang mantong barô. Uza dan Ahyo ji-iréng geureubak peudati nyan rot likot, 8seudangkan Nabi Daud dan banmandum bansa Israel laju geulikak ngon meunari sira geumeu ca-e ngon peunoh seumangat, keu geubri horeumat ubak Po teu Allah sira geuseukok keucapi, rapa-i, simbal dan beureuguih. 9Bak watée awaknyan ka trok ubak teumpat ureuëng ceumeulo aneuk gandom atra si Kidon, leumô-leumô nyang teungoh jitarek geureubak nyan laju meugantoh, dan Uza laju jisunyueng jaroe jih sira jimat Peuto Peujanjian nyan mangat bék rhot bak tanoh. 10- 11Bak watéenyan cit teuma TUHAN beungéh keu Uza sabab buet jihnyan na kheueh sibagoe teuhina keu TUHAN. Dan Uza pih laju geupoh maté disinan lé TUHAN. Dan phon watéenyan teumpat nyan geuboh nan "Peres-Uza". Nabi Daud beungéh that-that sabab TUHAN ka geupeubinasa Uza. 12Teuma Nabi Daud geutakot cit keu Po teu Allah sira geupeugah, "Jinoenyoe pakriban cara jih Peuto Peujanjian nyan mangat hase ulôn ba?" 13Lé sababnyan Nabi Daud hana jeuet geuba Peuto Peujanjian TUHAN nyan u Yerusalem, teuma geukeubah mantong di rumoh Obed-Edom, ureuëng Gat. 14Peuto nyan tinggai disinan na lhée buleuen treb jih dan TUHAN laju geubri beureukat keu keuluwarga Obed-Edom meunan cit deungon banmandum nyang na hareuta gobnyan.

will be added

X\