1 Tawarikh 12

1Bak watée Nabi Daud geupeuplueng droe nibak Raja Saul, gobnyan geupeu aséng droe u Ziklag. Le that peujuang nyang seutia lom meupeungalaman jijak meugabong deungon gobnyan. 2Awak nyang teuka nyan nibak sukée Benyamin saban cit lagée Raja Saul. Awaknyan carông that jitimbak aneuk panah meunan cit meunyoe jimeugeulawa -- bah kheueh nyan deungon jaroe uneuen meunan cit deungon jaroe wie. 3- 7Peumimpén awaknyan na kheueh Ahiezer dan Yoas aneuëk-aneuëk Semaa nibak Gibea. Nyoe kheueh nan-nan peujuang nyan: Yeziel dan Pelet aneuëk-aneuëk Azmawet Berakha dan Yehu ureuëng Anatot Yismaya ureuëng Gibeon, peujuang nyang meusyeuhu nyang jeuet keu sidroe lamkawan peumimpén keulompok "Tridasawira". Yeremia, Yehaziel, Yohanan dan Yozabad ureuëng Gedera Eluzai, Yerimot, Bealya, Semarya dan Sefaca ureuëng Harufi Elkana, Yisia, Azareel, Yoezer dan Yasobam nibak kawöm Korah Yoëla dan Zebaja aneuëk-aneuëk Yeroham ureuëng Gedor. 8Bak watée Nabi Daud mantong na bak teumpat kuta gobnyan di padang pasi, le that-that peujuang nyang meusyeuhu dan meupeungalaman nibak sukée Gad teuka jijak meupeusaho droe deungon gobnyan. Awaknyan na kheueh peujuang-peujuang nyang lumpah carông jipeuguna peurisai dan kapak; awaknyan deuh jih ceubeuh-ceubeuh ngon beurani lagée singa dan grak awaknyan saban lagée rusa. 9- 13Nyoe kheueh nan-nan awaknyan nyang geususon meunurot pangkat: Ezer, Obaja, Eliab, Mismana, Yeremia, Atai, Eliel, Yohanan, Elzabad, Yeremia, Makhbanai. 14Siladum nibak ureuëng-ureuëng Gad nyan na kheueh peuwira-peuwira manyang na aneuëk buah 1.000 droe; dan siladum teuk na kheueh peuwira-peuwira nyang na aneuëk buah 100 droe. 15Ka lheueh teujadi nibak buleuen sa, bak watée Krueng Yordan teungoh jiék ié raya teuma peuwira-peuwiranyan laju jijak jeumeurang lam krueng nyan dan jiuse laju bubena peunduduek nyang na tinggai di pantôn-pantôn nyan bah kheueh nyan nyang na tinggai disiblaih utimu meunan cit nyang na tinggai disiblaih ubarat krueng nyan. 16Bak saboh watée na saboh kawan ureuëng nibak sukée Benyamin dan sukée Yehuda jijak ubak kuta Nabi Daud. 17Nabi Daud laju geujak meurumpok ngon awaknyan sira geupeugah, "Meunyoe gatanyoe tateuka sibagoe rakan keu tajak tulông ulôn, silakan tameugabong deungon kamoe. Kamoe sambot gatanyoe deungon sigala mangat até. Teuma meunyoe gatanyoe ngon niet nyang jeuhet takeuneuk khianat ulôn ubak musoh, bahpi ulôn hana lôn peubuet jeuhet ateueh gata, Po teu Allah nyang geuseumah lé indatu geutanyoe geuteupeue nyan, dan gobnyan teuma geuhuköm gata nyoe." 18Sidroe lamkawan awaknyan, nyang nan jih Amasai, nyang óh dudo jeuet keupeumimpén keulompok nyang teuboh nan "Tridasawira", ka jikuasa lé Roh Po teu Allah laju jipeugah, "Daud, aneuëk Isai! kamoe banmandum kamoe tulông gata! Seumoga gata dan awaknyan nyang jibantu gata meuhase. Po teu Allah na blaih gata!" Dan ban geudeungoe habanyan Nabi Daud laju geusambot awaknyan dan geu baiát laju awaknyan jeuet keupeuwira gobnyan. 19Bak watée Nabi Daud meusajan deungon ureuëng Filistin geujak prang Raja Saul, siladum nibak tantra sukée Manasye jijeumeurang blaih Nabi Daud. Nyang seubeuna jih Nabi Daud hana geubantu ureuëng-ureuëng Filistin nyan. Lé peumimpén Filistin jiyue woe gobnyan u Ziklag sabab awaknyan jitakot gobnyan geupaleng geudong blaih Raja Saul dan jikhianat awaknyan. 20Nyoe kheueh nan-nan ureuëng peujuang nibak sukée Manasye nyang jidong blaih Nabi Daud bak watée gobnyan teungoh geujak u Ziklag: Adnah, Yozabad, Yediael, Mikhael, Yozabad, Elihu dan Ziletai. Maséng-maséng awaknyan na jiba tantra 1.000 droe. 21Awaknyan na kheueh peujuang nyang paleng peukasa dan nyang tulông Nabi Daud geulawan geurombolan. Teuma óh dudo awaknyan ka jeuet keu peuwira-peuwira didalam angkatan prang Israel. 22Rab tieb-tieb uroe na mantong ureuëng nyang jijak meugabong deungon Nabi Daud, dan hana treb óh lheuehnyan pasokan Nabi Daud ka lumpah rayeuk. 23- 37Bak watée Nabi Daud di Hebron le that-that peujuang nyang ka teulateh nyang jijak meugabong deungon gobnyan. Awaknyan jijak tulông gobnyan mangat gobnyan jeuet keuraja keugeunantoe Saul, paih lagée janji TUHAN. Jeumeulah awaknyan na kheueh lagéenyoe: nibak sukée Yehuda: 6.800 droe, leungkab deungon peurisai dan kapak. Nibak sukée Simeon: na 7.100 droe nyang ka teulateh. Nibak sukée Lewi: 4.600 droe. Aneuëk buah Yoyada jipimpén keuturonan Nabi Harun: na 3.700 droe. Kawöm syedara Zadok, ureuëng peujuang muda nyang beuhé ngon beurani: 22 droe -- banmandum nyan na kheueh ulée keuluwarga. Nibak sukée Benyamin (sukée Raja Saul): na 3.000 droe; nyang leubeh le nibak sukée Benyamin teutab seutia ubak Raja Saul. Nibak sukée Efraim: na 20.800 droe ureuëng nyang paleng meusyeuhu didalam kawöm jih maséng-maséng. Nibak sukée Manasye nyang na tinggai disiblaih ubarat Krueng Yordan: na 18.000 droe nyang jitunyok mangat jijak baiát Nabi Daud jeuet keuraja. Nibak sukée Isakhar: na 200 droe peumimpén meusajan deungon aneuëk buah gobnyan; peumimpén-peumimpén nyoe carông that jipeu teuntée peue nyang harôh jipeubuet lé rakyat Israel bak watée nyang paih. Nibak sukée Zebulon: na 50.000 droe nyang that-that carông jipeuguna peue mantong alat sinjata, dan siab keujijak muprang; awaknyan na kheueh ureuëng-ureuëng nyang seutia dan teupeucaya. Nibak sukée Naftali: na 1.000 droe peumimpén meusajan deungon 37.000 tantra nyang leungkab deungon peurisai dan kapak. Nibak sukée Dan: na 28.600 droe nyang ka teulateh. Nibak sukée Asyer: na 40.000 droe nyang ka siab keujijak muprang. Nibak sukée-sukée nyang na tinggai disiblaih u timu Krueng Yordan, na kheueh Ruben, Gad dan seubagian nibak sukée Manasye: 120.000 nyang that-that carông jingui mubagoe alat sinjata. 38Banmandum peujuang nyan jijak laju u Hebron lam keuadaan siab muprang dan ka meuteukat keuneuk jibaiát Nabi Daud jeuet keuraja di bansaboh nanggroe Israel. Dan banmandum ureuëng Israel nyang laén pih ka si até keuneuk jipeubuet nyang lagéenyan. 39Na lhée uroe treb jih peujuang-peujuang nyan tinggai disinan deungon Nabi Daud sira jimakheun peunajoh ngon ié jieb nyang ka teukeubah keu awaknyan lé ureuëng Israel nyang laén. 40Nibak sukée-sukée utara nyang jiôh pi na kheueh nibak sukée Isakhar, Zebulon dan Naftali, awaknyan laju jijak sira jipasang keuleudée, unta, bagal, dan leumô nyang peunoh deungon barang peunajoh nyang teupeudieng di ateueh rhueng jih: lamkawan barang-barang peunajoh nyan na kheueh: teupông, boh ara, boh kismis, anggô dan minyéuk zaiton. Dan meunan cit awaknyan jiba sajan leumô ngon bubiri mangat teusie dan teupajoh. Banmandum nyan na kheueh sibagoe tanda padubna galak jih rakyat di banmandum nanggroe Israel.

will be added

X\