1 Tawarikh 10

1Ureuëng Filistin jimuprang deungon ureuëng Israel. Awaknyan jimeuheungko ngon jimeuheuntam nibak gunong-gunong Gilboa. Jai that-that ureuëng Israel nyang maté lam prang nyan, dan nyang na mantong tinggai jitamong cit keunan Raja Saul ngon aneuëk-aneuëk agam gobnyan laju geupeuplueng droe. 2Teuma awaknyan jitiyeub rot likot lé ureuëng Filistin dan óh meurumpok lhée droe nibak aneuëk agam Raja Saul nyan laju jipoh maté, nyang keunong poh nyan na kheueh: Yonatan, Abinadab dan Malkisua. 3Muprang nyan keubiet hebat that bak binéh Saul, dan gobnyan keudroe keunong aneuk panah musoh sampoe luka. 4Dan geupeugah kheueh lé Saul ubak peumuda nyang ba seunjata gobnyan, "Tasuit kheueh laju peudeueng gata dan tatöb laju u ateueh ulôn mangat ulôn nyoe bék jipeumeu-én lé ureuëng Filistin nyang hana jituri keu TUHAN nyan." Teuma lé aneuëk mudanyan hana jitem töb Raja Saul sabab jihnyan teumakot that-that. Lé sabab nyan Raja Saul laju geucok peudeueng geuh keudroe laju geupeureubah droe geuh u ateueh peudeueng nyan. 5Bak watée jikalon lé aneuëk muda nyan bahwa Raja Saul ka maté, dan gobnyan pih laju jipeureubah droe u ateueh peudeueng jih dan ureuëng nyan pih maté disinan. 6Dan meuninggai kheueh Raja Saul meusajan deungon aneuëk agam gobnyan nyang lhée droe nyan, dan deungon lagée nyan habéh kheueh riwayat dinasti Raja Saul. 7Bak watée banmandun ureuëng Israel nyang na tinggai di Pantôn Yizreel jideungoe bahwa tantra Israel ka jipeuplueng droe, meunan cit watée jideungoe Raja Saul deungon aneuëk-aneuëk gobnyan ka meuninggai donya, awaknyan laju jiplueng sira jitinggai banda-banda droe jih. Dan teuka laju ureuëng Filistin jijak duek nibak banda nyang ka teutinggai nyan. 8Óh singoh beungoh bak watée ureuëng Filistin trok keunan keu jijak rampok bubena manyét-manyét nyang ka maté nyan, awaknyan laju meurumpok deungon Raja Saul meunan cit deungon ban lhée droe aneuëk agam gobnyan ka maté di gunong-gunong Gilboa. 9Awaknyan laju jisut bajée prang nyang mantong meuleukek nibak badan Raja Saul, dan ulée gobnyan laju jikoh nibak takue sampoe putôh, dan uléenyan laju jiba. Óh lheuehnyan awaknyan laju jikirém utosan ubak bansaboh nanggroe ureuëng Filistin keu jijak peusampoe haba nyang jroh nyan ubak bansa dan dewa awaknyan. 10Bajée prang Raja Saul jikeubah bak saboh kuil awaknyan, dan ulée gobnyan laju jigantung nibak rumoh si Dagon, dewa awaknyan. 11Bak watée peunduduek Yabes di Gilead jideungoe peue nyang ka jipeubuet lé ureuëng Filistin teuhadab Raja Saul, 12Ureuëng-ureuëng nyang paleng beurani lom beuhé ngon tungang laju jijakcok manyét Raja Saul dan aneuëk-aneuëk gobnyan, manyét nyan laju jiba u Yabes. Dan manyét nyan laju jipeukubu udalam jrat dimiyueb bak kayée nyang raya, óh lheuehnyan awaknyan laju jipuasa na tujoh uroe treb jih. 13- 14Raja Saul meuninggai sabab gobnyan hana seutia ubak TUHAN, dan hana geutaát ubak peue nyang ka geupeurintah lé TUHAN ubak gobnyan. Gobnyan hana geulakée peutunyok ubak TUHAN, teuma nyang geulakée na kheueh ubak areuwah-areuwah ureuëng maté. Lé sabab nyan TUHAN geuhuköm gobnyan dan geuseurah takhta gobnyan ubak Nabi Daud aneuëk Isai.

will be added

X\